Read Moyon Naga MAAK 11 Bible Online

MAAK 11 - Moyon Naga bible

MAAK 11

¹Enuw ing Jerusalem envepha phana, Oleep Bungna om Bet-phage vokhehkho Bethani nache Jesu ing asebok meenii ae ningna jinge taka achiir ae,

²“Nenuw nemaana khuw yngkheh omnase vakruw amana nenvaruwh chakthoh, achuw ingkho aongniimahri lola ati yngkheh hengangkhiih muvanenta; amachu bajoh nuwna henruwruw.”

³Achuw yngkheh ing neningna, havi ynchii khaena nenruwva ta ae nave, “Aafhuw ing ithupak nong khaena sichinnii ningka jebathen vakata achiinah taruw.”

⁴Enuw ing vak aeka, lam kuurna om een yngkhehna lola ati yngkheh ynphuwpchu muaeka embajohpa.

⁵Amana ihengiir mee aenche eningna ensii, “Nenuw ing lola ati nenbajoh kha ynchii khaenava?”

⁶Jesu ing eningna ariir vaangkhe embasang tahnache enuw ing enrupa.

⁷Amana lola atichu enuw ing Jesu ningting henruw aeka, ataklina peen tha aeka amana Jesu ing lola taklinache hangongsa.

⁸Amana mee aanem ing lamna enpeen hentha aeka vokhehkho mee areh aenche ruwrae tanii thingbah ana saeh aeka lamna entha.

⁹Changlae Jesu amaana hesi vokhehkho aanuw ahenjii aeng jinge uung ae, “Hosana, Aafhuw rumingna itheng atak i bor aphava! Aang-kaangsehna, Hosana!

¹⁰Aafhuw rumingna inuw vakhae apa Devit Iruwng lipah ijuwngchu Thangnang ing isa bor apeeh ynsuwhrasiing, aangkhengsehna Hosana.”

¹¹Amana Jesu ing Jerusalem ting varuwhka rumniieen sungting varuwhsa; vokhehkho ama ing akuur-paang aangkheng aabuwr nuwna, apha ajungthirtah nache, suum ariinii ae thoh ynruw ing Bethani ting huungsae.

¹²Enuw ing atuknuwche Bethani tanii ing enghungsi raenche, Jesu aven chaamsa.

¹³Ama ing thachang bur ana ompoh yngkhehchu laarkhehna ajemutah nache laanglam ynla vatamo taka ava en. Changvakonchu ama ing avephatah nache ana mahnaka yntanga mumahsa, akhaechuve tha-chang ynlavachii aanii tha phamahrisa.

¹⁴Chutahnache Jesu ing thachang bur tingche ariir, “Achuw ingkho athar vokheh naanla isah phamah rasiing.” Achongchu asebok aeng ensii.

¹⁵Enuw ing Jerusalem hungtung aeka, amana rumniieen sungtingche Jesu varuwhka peehchae aajuwr vokhehkho aanrii mee aechu ithur abasenpa, seersaam repniii vokheh-kho khunu aajuwr ae ongniichu abaruppehpa;

¹⁶amana achuw ingkho rumniieen sungna peehchae ireen, ichi chehmahsa.

¹⁷Amana mee aechu ama ing amanchuwpa: Havi ynziihka om vasahva, “Ka eenchu mee aangkheng khaena ithamsahnii een vachiiva changvakonchu nenuw ing lamruw ae kuw nemanguurpa.”

¹⁸Amana aanchung jaethiim aere thiimthang aenche ensiitahna Jesu havi ynsaangkhe manta manuwka thehtaruw ichii emanjong, akhaechuve enuw ing Jesu chu enchii, vokhehkho ama ing amanchuw ae nache mee aangkheng ngiksa.

¹⁹Khuri ajungvitah nache enuw ing khuwruungchu embathenpa.

²⁰Enuw ing ziing nache enghung-sirae thachang burchu arajung ipha ing ichong emupa.

²¹Chutahnache Pitar ing Jesu chong ynsiika Jesu ningna ariir, “Aafhuw, enla, nang ing thachang bur taklina siraap napeehtah nache thachang burkha chongsa.”

²²Jesu ing aningna abasang, “Thangnang chu thacharuw.”

²³Ki ing neningna atatak ing kariirnah, “Achuw yngkheh ing havana bung tingnge ymphernana chifhuw ting bukra tanaka abarungriirna ching-niiru ing suwhrem vaata ichii ing thacha nave, athacha inuwzii ing suwhvaata.

²⁴Chukhaenache neningna kariirnah, nenuw ing nemandenchu phakenta tatanuwka niih tanuwve phavanenta.

²⁵Amanche nenuw ing nenthamsah raenche thangbaenna ong nenpa inche isii ikha nenraar omchu yngkuhpeehnii ing, achuw yngkheh taklina nenungaeniimah omnave kuhpeehruw.

²⁶Nenuw ing kuhpeehmah tanuwve, thangbaenna ong nenpa ingkho isii ikha nentuchu ikuhpeeh mahnii.”

²⁷Enuw ing athar vokheh Jerusalem ting vathengsae. Amana Jesu ing rumniieen sungna hungsi vaasi aturae, aanchung jaethiim ae, thiimthang ae vokhehkho upa aenche Jesu ningting vak aeka

²⁸aningna ensii, “Ynchii aatuaricheh ing havana nong vakhae i natuva, vokhehkho achuw ing aatuaricheh ipika havana nong vakhae i natuva?”

²⁹Jesu ing eningna ariir, “Ki ingkho neningna chong yngkheh siikachuw abasangruw amanache ki ing ynchii aatuaricheh pha ingka havana nong vakhae i katuva ichiichu riirpehva kata.

³⁰Johon ing baptais atukha thangbaen taniiva changmahka mee ae taniiva?”

³¹Amana enuw ing enareerna chong ynsiisae, “Thangbaen taniiva tamanuwve ama ing ynchii khaena Johon chu nenthacha mahva itavaata?

³²Vokhehkho mee ae taniiva tata enchiireeh incha, enuw ing mee vakhaechu enchii pareeh, akhaechuve mee aangkheng ing Johon chu jaephar remva ichii ing enthacha.”

³³Chu-tahnache enuw ing Jesu ningna embasang, “Kenuw manghuwmah ung.” Jesu ing eningna ariir, “Ki ingkho utanii aatuaricheh pha ingka hava nong vakhae i katuva ichiichu neningna riirmahning.”