Read Moyon Naga MAAK 12 Bible Online

MAAK 12 - Moyon Naga bible

MAAK 12

¹Aanuwnache Jesu ing eningna ynghuwnii ing thamin itong abasenpa, “Mee yngkheh ing vomrip bir yngkheh tuka, aruvaechaap manghirka, asuurnii yngkhehkho khurka, ama-nache arungnii een yngkheh atu. Amachu vomrip bir aarung ae ningna mansirka atak chuve paam yngkheh ting sisa.

²Aphachu hungvika, ama ing vomrip aanlachu topoh iphanii khaena ameenae yngkheh aarung ae ningting ajechiir.

³Enuw ing ama meechu ruw aeka embin vokhehkho yntanga piru ing embathen.

⁴Athar vokheh vomrip bir aafhuw ing ameenae reentaang yngkheh eningna ajechiirtah nache enuw ing ama meechu arusae bakhii aeka vokhehkho ningjak piaeka embathen.

⁵Amana aafhuw ing mee reentaang yngkheh ajechiirtah nareehche enuw ing enthehpa; mee reentaang aanem ae chuve bin aeka amanche mee topoh ae chuve enthehpa.

⁶Aafhuw ing mee yngkheh adeenjaeh sareeh, amachuve aning amansiihpak asapa chuva, ‘Enuw ing kasapa ichuve iruwpak ing hetuvaatae taka akuurchiimniina ajechiir.’

⁷Changvakonchu vomrip bir aarung ae ing enareer ing chong aeka enriir, ‘Havi ampa ruw kuumvachii chuva, huungruw atak i thehtaruw, amanache ama ing thungvachii chaap inuw thungvataruw.’

⁸Chukhaenache enuw ing ruw aeka enthehpa, vokhehkho vomrip bir tanii enrenpa.”

⁹Atii vomrip bir aafhuw ing ynchii tuvaata? Ama ing thengnaka vomrip bir aarung aechu mamaang vaatae, amanche vomrip birchu mee reentaang ningting pivaata.

¹⁰Nenuw ing hava ynthiing thiimziih i nenpamahriva? “Een itu aeng enrimah rung amakharap ingkhe, athurfhuwrungchu ynsuwhsa;

¹¹Havi Aafhuw ing atuva; inuw vakhae mik enna chembe ingiknii pakna.”

¹²Amana enuw ing Jesu chu suwrnungka enchiipa, changvakonchu mee vakhae aechu enchii, akhaechuve Jesu ing thamin atongchu enuw engkhaenava ichii emanghuw tahnava; chutahnache enuw ing Jesu chu ma aeka yngkaesae.

¹³Jesu ing achonglae enuw ing isuwrnii khaena Pharisi mee aere Herot mee ae yngkheh ynnii enjechiirpa.

¹⁴Enuw ing vak aeka Jesu ningna enriir, “Oja, nangve ichumvachii amanche achuwkho chiimahchii ichii kemanghuwsa, akhaechuve nangve miksiing mikruung khaemahchii, changvakonchu Thangnang lamchu ichum ing namanchuwsa. Kesar Rom iruwng ningting ree ipeeh aruse rumah?”

¹⁵Kenuw ing piva kenchiiva chang-mahka pimahva kenchiiva? Enuw ing isachaang entuchu Jesu ing amanghuw tahnache, eningna ariir, “Ynchii khaena kataklina yngennii vachuw? Seersaam yngkheh henchiruw enkata.”

¹⁶Enuw ing seersaam yngkhehchu enghenchipa. Amana Jesu ing ariir, “Havana ynjek i achuw rusae thoh yntinna? Enuw ing Kesar thoh yntinna ta aeka embasang.”

¹⁷Amana Jesu ing eningna ariir, “Kesar taava ichiichu Kesar ningting piruw amanche Thangnang taava ichiichu Thangnang ningting piruw.” Amana enuw ing Jesu ningnache inempak ngiksae.

¹⁸Hangring omah enchii Saduki aeng Jesu ningna theng aeka chong ensii,

¹⁹“Oja, Mosi ing kengkhaena abaziih chuve achuw yngkheh eengkuw ynringhakna aupa ing siti deenru ing thiknaka arumeechu manave, anaepa ing naepang endeennii ing buwhreehva chiiva achiisa;

²⁰eengkuw yngkhehna pasar sarii om ae, aupa ing rupanuw yngkheh abuwhpa, amanche siti deenru ing thiksa,

²¹avomaniinii ing amachu buwhka naepang deenru ing thikreehsa. Vokheh avomanthumnii ningna chenkho aanghakjaeh ing suwhsa,

²²avosariinii ingkho siti deenru ing thiksa. Akuurchiimna rupanuw chukho thiksa.

²³Atii hang-ring inii nache engkheng hangring ae nacha rupanuwchu achuw rumee ynsuwhva chiiva? Yngkhaena ynchii imbe engkheng ing rupanuwchu embuwhpa.

²⁴Amana Jesu ing eningna ariir, ‘Nenuw ing ynthiing thiimziih vokhehkho Thangnang ruwreng nemanghuwmahchu nenraarmah vakhang?

²⁵Enuw ing ithii tanii enghangring raenche, rakhii niichaechang tumahnii ae vokhehkho rakhii niimahnii ae; changvakonchu thangbaen nache vaarmee ae vaangche ongvaatae.

²⁶Amanche ithii ae hangring khaena Mosi ing abaziih thiimbuwrna ynziihka omchu nenuw ing nenpamah riva, amachuve, Abraham, Isak, vokhehkho Jakop ae Thangnang chuping achiisa.’

²⁷Thangnang i ithii ae Thangnang mahva, changvakonchu iring ae khaenava; nenuw inempak nenraarsa.”

²⁸Enuw ing chong hungsii vaansii entuchu thiimthang yngkheh ing siika vokhehkho Jesu ing isajaeh ing abasang aechu amutah nache aningna asii, “Chonghak kaarna ukho ingkhe amaensava?”

²⁹Jesu ing abasang, “Amaensa chuve, ‘Rungaeruw, O Isrel ae, inuw Aafhuw Thangnang yngkheh pangvatah;

³⁰amanche nang ing naafhuw Thangnang chu nabarungriir aangkheng vokhehkho nalaetha aangkheng amanche namanden aang-kheng ing naning mansiihva nachiiva.’

³¹Avomaniinii chuve haviva, ‘Nang ing naveenchaang aechu nataksah vaang naning mansiihva nachiiva.’ Havi chungna aaruungseh reentaang chonghak omah.”

³²Amana thiimthang inche Jesu ningna ariir, “Oja, nang chumnachii; Aafhuw yngkheh pangvatah tachiika ichum ing nariirpa, vokhehkho Aafhuw mahnaka achuwkho omah nachiipa.

³³Amanche nabarungriir aangkheng, nalaetha aangkheng amanche namanden aangkheng ing Thangnang chu naning mansiihva nachiiva, vokhehkho naveenchaang aechu nataksah vaang naning mansiihva nachiiva. Thangnang ting ipifhuw vokhehkho chaatha ipifhuw reentaang aajaeh om chungna havana chonghak ynniimeh inge athurfhuwsehna.”

³⁴Ama mee inche ising ing abasang-chu Jesu ing amutah nache, Jesu ing aningna ariir, “Thangnang lipah thoh nang yndah mahchii.” Aanuwnache Jesu ningna chong siivasii aechu achuw ingkho chehmahsae.

³⁵Jesu ing rumniieenna amanchuw ae raenche ama ing ariir, “Khrista i Devit sapava ta-aeka thiimthang aeng ynsaangkhe ariirpae?

³⁶Devit atakrap ing ynthiing laetha ing amanriirsa, ‘Aafhuw ing ki kaafhuw ningna ariir: Ki ing nang yngensiimah aechu nakhi derna kasiihmahri ae raentaangche, kabaen tachangne ongla.’

³⁷Devit atakrap ing Aafhuw taka a-eensa, chunuwcha ynsaang khenche asapa vachiiva?” Amana mee inempak ing ariirchu rotha irohpak ing enrungae.

³⁸Jesu ing amanchuw ae sungnache jinge chii ing ariir, “Rungop ynsuwr niiaeka ynlen engadik vokhehkho kithiirna mee ing ibariimnaka enchii,

³⁹amanche meekongniina ongnii isaseh engadik, amanche kuurva chaapna iruung ongnii engadik,

⁴⁰muwkhuwnuw ae engeen enruw ensiih vokhehkho achung paamphuwna iseehpak ing enthamsah thiimthang ae khaena ynriimruw. Enuw ing aaruungseh miraar phavaatae.”

⁴¹Jesu ing seer thinnii maensokna ongka mee vakhae ing seer thinnii nache ynsaangkhe seer athasae taka aabuwr. Savang aanem ing seer inem entha.

⁴²Amana muwkhuwnuw sarapak yngkheh vathengka seersaam yngkhepang athasah.

⁴³Amana Jesu ing asebok aechu abuumting ve-eenka eningna ariir, “Ki ing neningna atatak ing kariirnah, havana muwkhuwnuw sarapak inge mee vakhae kaarna seer aanem athasa.

⁴⁴Akhaechuve enuw vakhae ive endeen inuwzii ing ympahnii ing enthasa, changvakonchu muwkhuwnuw ive adeensahmah romrom ing ringniivachii adeensah aangkheng athapa.”