Read Moyon Naga MAAK 13 Bible Online

MAAK 13 - Moyon Naga bible

MAAK 13

¹Jesu ing rumniieen tanii ahung-suwh thoh asebok yngkheh ing aningna ariir, “Enla, Oja, rung re een i aajaehmeh isapae.”

²Jesu ing aningna ariir, “Havana iruungpak een i namuse? Havi akiiraenche rung yngkhehpang ingkho rung yngkheh taklina omahnii.”

³Amana Jesu ing rumniieen alaarna om Oleep Bungna aonglae, Pitar, Jems vokhehkho Andru aeng ynruwhjaeh ing aningna ensii.

⁴“Nariir chong ae i utaraenkhe suwhva chiiva? Vokhehkho nariir chong ae i asuwhphana ynchii aandangnii omvaata, keningna itong-peehra.”

⁵Jesu ing eningna itong abasenpa, “Achuw ingkho ichummah lamting ynruwniimah ing ynriimruw.

⁶Ki Jesu ping ta ae naka mee aanem karumingna thengvaatae, vokhehkho ichummah lamting mee aanem ruwvaatae.

⁷Nenuw ing laar yntuk vokhehkho laarsa chong nensii raenche nening mandong mahruw; changchiichu suwhvaata, changvakonchu apha achinii chumahnii.

⁸Jaati yngkheh ing jaati yngkheh taklina, vokhehkho lipah yngkheh ing lipah yngkheh taklina laar tukvaata; reentaang reen-taang paamna linglaang thengvaata, vokhehkho venchaam chiilaar suwhvaata; changvakonchu havi ae i ijachaam abasenniipeh vaata.

⁹Changvakonchu nenuw hahjaehruw; enuw ing nenuwchu upa ae kikting ipivaatae; amanche kaeshum sungna ibin vaatae; vokhekho nenuw ing eningna kakhaena saarkhii ipeehnii khaenache lipah aapuh ae amanche iruwng ae maekungna ngiirva nenta.

¹⁰Changvakonchu jaati aangkhengna isa chong thamin maensa ing aphachirnii ing yntong vaata.

¹¹Enuw ing nenuwchu ynsuwr ae raenche ynchii riirva kente tanuwna maensa ing jamahruw; apha ichiinache neningna ympeehchu riirruw; amachu nenuw ing ichongmah vachuw, laetha ynthiing inche ichongva.

¹²Mee aenche auw anae taklina ithehnii khaena pivaatae, amanche ampa aengkho ensiti ae taklina changche tuvaatae, vokhehkho siti aenche amnuw ampa taklina rumah aenaka ithehnii khaenache pivaatae;

¹³amanche mee vakhae ing nenuw i kakhaena ibatir vaatae. Changvakonchu achuw yngkheh ing amachu achiniipha ing khaangcheh nave ikarpeeh phavaata.”

¹⁴“Imaangnii yntirsuwh mee inche ngiirmahvachii nache ingiir nenuw ing nemuraenche hungmaangsa ichiichu aapa mee vakhae ing manghuwruw, changlaenche Judia na ong nenuw bung ting taenruw;

¹⁵phuchungna ong mee ing jungchummah rasiing, peeh ijungrinii khaena jungruwhkho jungruwhmah rasiing,

¹⁶amanche ruwraena ong mee ing asingfhuw peen huungrimah rasiing.

¹⁷Changvakonchu miknii ae vokhehkho naeri ae chuve apha ichiinache aajaehmeh ijachaam niivate!

¹⁸Chukhaenache havi pharbuwna asuwhniimah ing tham-saruw.

¹⁹Akhaechuve Thangnang ing aseem raennii ing ataraen ipha ing vokhehdong isuwhmahrideh vokhehkho hungsuwhmah vachii ijachaam inii chuvaata.

²⁰Aafhuw ing amachu mantom mahnave, achuw tikho ikarpeeh phamahnii; changvakonchu Aafhuw ing aateer vasah vokhehkho akarvasah ae khaenache aaniichu amantompa.

²¹Achuw yngkheh ing neningna tavaata, ‘Enruw, Khrista chu havane ongna!’ changmahka ‘Enruw, amanase ongna!’ Ama meechu thachamah dehruw.

²²Ichummah Khrista vokhehkho ichummah jaephar ae hungsuwh ae naka laetho vokhehkho ingiknii nong aajaeh man-dang ae naka, Thangnang ing aateer vasahrap ae chukho ichummah ting ruwkenta tavaatae.

²³Changvakonchu ynriimruw; ki ing neningna hungsuwh vachii vakhae maen ing kariir chirpa.”

²⁴“Changvakonchu ama ijachaam aanuwnache, inii ing manthimpoh vaata vokhehkho tha ing vaarmahnii,

²⁵amanche aesii ing thangbaen tanii jungbuk vaata, vokhehkho thangbaen ruwreng aangkheng ynnuhchir vaata.

²⁶Amanche enuw ing ruwrduhna Mee Sapa ing aruwreng alaar isa thoh ijuwngchu muvaatae.

²⁷Changlae Mee Sapa inche vaarmee ae jebathen vaata, amana ariikiing manrii tanii, laaruw paam adongnii na ing thangbaen adongnii ipha ing ong mee aateer vasah vakhae yngkong vaatae.”

²⁸“Thachang bur ing amandang i manghuwruw: adeen hangsuwm naka vokhehkho ana iduung ahangsuwm raenche, saartha ynneengsa ichii nemanghuwsa.

²⁹Amavaangche, nenuw ing hangchii ae i hungsuwh nemurae Mee Sapa juwngvachii ynneengsa ichii manghuwruw.

³⁰Ki ing neningna atatak ing kariirnah, hangchii ae i asuwhmahri raentaang havana suwnthar i maangmahnii.

³¹Thangbaen vokhehkho laaruw paam i maangvaata changvakonchu kachongsae chaap chuve utaraenkho maangmahnii.”

³²“Changvakonchu aanii vokhehkho aphachu ampa mahnaka, thangbaen vaarmee aengkho, Mee Sapa rap ingkho amanche achuw ingkho manghuwmah.

³³riimjaehruw, hahjaehruw amanche thamsaruw; akhaechuve nenuw ing aphachu utaraen vaate ichii manghuw mahchuw.

³⁴Havi mee yngkheh ing a-een bathenka khuwrting asiphana, meenae ae ningna nong mansirka amanche eengkhaar aarungpa ningna hahjaehra taka chonghak apeehthoh aanghakna.

³⁵Chukhaenache een aafhuw ing khuri nava, jaenchim nava, aar akhuwng phanava, changmahka jiingna tungvachiiva ichii nenuw ing nemanghuwmah vakhaka hahjaehruw-

³⁶manghuw mangharu ing nenjaarthir ama ithengkho arusa.

³⁷Ki ing neningna kariir i mee vakhae ningnakho kariirniiva, hahjaehruw.”