Read Moyon Naga MAAK 14 Bible Online

MAAK 14 - Moyon Naga bible

MAAK 14

¹Manlaennii vokhehkho chor ynvaemah kuurvachu hung-vivachii inii ninii avaehrae aanchung jaethiim aere thiimthang aeng Jesu chu ynsaangkhe ynruwhjaeh ing suwrnungka thehchehva kenchiiva ichii khaena emanseer;

²akhaechuve mee vakhae kaarna isii ikha asuwhniimah ing kuurva inii sungna suwrmah manuw enchii.

³Bethani na ynchor ing ina Simon eenna Jesu ing amaarpha nache rupanuw yngkheh ing amen iruwpak ynthiingjaeh richiithou abuwr yngkheh vechika, ama ing richiithou buwrchu imongka Jesu rusaena achirpa.

⁴Amana ong ae kaarna mee areh aenche embarung isii ing enriir, “Ynchii khaena ikaniimahna richiithou amamaangva?”

⁵Dinari chathumna ynjuwr naka sara ae ningna ympivachiichu ta aeka enuw ing rupanuwchu enriirsah.

⁶Changvakonchu Jesu ing ariir, “Tusatah rasiing, ynchii khaena rupanuw havi nemanjaava? Ama ing kataklina nong isapak yntupeehpa.

⁷Sara ae chuve apha om bakhaena nenuwthoh onghak nachuw, amanche nenuw ing engkhaena tuning nen-chii isa nongchu nentuchehsa; changvakonchu kive nenuwthoh apha vakhaena onghakmah manuw.

⁸Ama ing achehsah nongchu atupa; ki kathikmah rirae ama ing maensa ing richiithou eetaehpa.

⁹Neningna atatak ing kariirnah, laaruw paam aangkhengna isa chong aantong raenche rupanuw havi inge yntupeeh nong ikho ama yndennii khaena yntong vaata.”

¹⁰Amana suum ariinii kaarna ynvae Judas Iskariot ing Jesu irensahnii khaena aanchung jaethiim ae ningting vaksa.

¹¹Enuw ing ama achongchu ensiitahna enrotha iroh ing seer ipeeh ynrusae vokhehkho ama ing Jesu chu irensahnii apha icha amanjongpa.

¹²Chor ynvaemah tar isahnii ahaar-pa iniine jao theh ae naka maarva enchii inii ahenpharae sebok aeng Jesu ningna ensii, “Nang ing manlaennii yndennii khaena imaarniichu hesinungka unakhe ihesir naadikva?”

¹³Jesu ing sebok ynniimeh jeba-thenka ariir, “Khuwruung nase vakruw, amana chiibeer areen mee yngkheh ing eentuwhfhuw vaata; ama aanuwchu jiiruw,

¹⁴amanche ama ing aruwhniitah een aafhuw ningnache riirruw, ‘Oja ing ariirnah, ki ing kasebok ae thoh manlaennii yndennii khaena imaarniichu una-khenva achiinah taruw?’

¹⁵Amana chungtanii ka iruung yngkhehna ama ing manriipka thoraang atuvasah imansiivaata.”

¹⁶Sebok aenche khuwruung ting-che vak aeka Jesu ing eningna ariir vakhaechu engaantuwh fhuwpa; amana enuw ing manlaennii yndennii khaena imaarniichu thoraang entupa.

¹⁷Khuri ijungvithoh ynruw ing Jesu ing suum ariinii ae thoh vaksae.

¹⁸Enuw ing emaar raenche Jesu ing ariir, “Ki ing neningna atatak ing kariirnah, kithoh kensahhak nengkaar tanii mee yngkheh ing ki irensavaata.”

¹⁹Enuw embarungriir ija ing yngkheh yngkheh ing kipingmo ta aeka ensiipa.

²⁰Jesu ing eningna ariir, “Isahnii yngkhehna kithoh tar kensahhak suum ariinii nengkaar tanii mee yngkhehva.

²¹Akhaechuve Mee Sapa khaena ynziihka omchu suwhna, changvakonchu Mee Sapa rensavachii mee khaena chembe aajaehmeh ijaaniiva. Ama meechu jungommah nave akhaena sakseh vachiiva.”

²²Enuw ing emaar raenche Jesu ing tarchu verika, bor apithoh abakhiipa, amana eningna jepika ariir, “Saruw; havi ki kashava.”

²³Vokheh Jesu ing vomrip chiichu verika bor apeeh aanuwnache, eningna pika engkheng inche enginpa.

²⁴Changlae Jesu ing eningna ariir, “Havi mee vakhae khaena ynta kasii chongngiir chuva,

²⁵Ki ing neningna atatak ing kariirnah, Thangnang iruwngpaamna ki ing itharpeh inva kachii iniichu aphamah raentaangche ki vomrip chii athar vokheh inmahning.”

²⁶Aanuwnache enuw ing la tuaeka Oleep Bung ting sisae.

²⁷Jesu ing eningna ariir, “Nenuw vakhae ing ki ibathen vanenta, havi ynziih vasahva; ki ing jao aacheerchu manvar vakata, amana ajao aenche taenchir vaatae.

²⁸Changvakonchu ki ing athar vokheh hangring ningka nemaana Galili ting hesi vakata.

²⁹Pitar ing Jesu ningna ariir, “Enuw vakhae ing ibathen khang ae nakho ki chuve utaraenkho bathenmah ningchii.”

³⁰Jesu ing Pitar ningna ariir, “Ki ing naningna atatak ing kariirnah, atanii jaenrap aarkhuung ing vanii akhuwngmah rirae nang ing vathumchak irumahtanii.”

³¹Chang-vakonchu Pitar ing athar vokheh ariir, “Ki nangthoh ithiihak vakhang nakho irumah suptu tumah ningchii.” Pitar ing ariir vaangche enuw vakhae ingkho changche enchii.

³²Enuw ing Getsamani ichii min tingche vaksae, amana Jesu ing asebok ae ningna ariir, “Ki ing kathamsahrae nenuw havane heongruw.”

³³Amana Jesu ing Pitar, Jems vokhehkho Johon ruwka amanche inempak ija ing rungneh ynthehsa.

³⁴Amana Jesu ing eningna ariir, “Kalaetha i ithii ynthongvaang inempak jaana, havane ongnuwna hahjaehruw.”

³⁵Amana Jesu ing maesokting topoh vasika ruwruwna akheerkhuwh mansinka athamsah, havi irupeeh taniive kaningtanii apha i imanlaen-peehsar achii.

³⁶Amana Jesu ing ariir, “Aba, Apa, naningna chembe aangkhenglaang aruchirsa. Kaning-tanii havana ijachaam kam i iripeehsar; changvakonchu ki ing kamanden ynsuwhmahsana, nang ing namandenchu ynsuwhrasiing.”

³⁷Jesu ing ahuunglae enuw ing ijaar aechu amupa, amana Jesu ing Pitar ningna ariir, “Simon, nang ijaar vachii? nang apha yngkheh pangkho nahahcheh mahva?

³⁸Nenuw batheem tingche nenbukniimah ing hahjaehruw vokhehkho thamruw, laetha ingve amandennah changvakonchu hakchaang ingve suurna.”

³⁹Athar vokheh Jesu ing vakka achingnii thohkhe aanghakjaeh ing athamsah.

⁴⁰Amana athar vokheh Jesu ing ahunganrirae enuw ing ihejaar aechu amu, akhaechuve enuw emik inempak ikhuw; amanche enuw ing Jesu ningna ynsaangkhe basangva kenchiiva ichii manghuw mahsae.

⁴¹Jesu ing avomanthumnii ahunganrirae eningna ariir, “Nenuw jaarchuwka ija nenbasum jaehva? Aphachu ahenphapa! Mee Sapa i isii icher kikting ynrensahpa.

⁴²Hang-suwruw, inuw sitaruw; enruw, ki ynrensah mee thohche ynneeng samuw.”

⁴³Jesu ing achong raenche sebok suum ariinii kaartanii Judas Iskariot ing aanchung jaethiim ae, thiimthang ae vokhehkho upa ae thoh ynruw ing, chemthar vokhehkho rumor thoh ynruw ing mee inempak vathengsae.

⁴⁴Amana Jesu arensah Judas ing eningna buwtinnii yngkheh apeeh ae, “Ki ing aabeeng katum ama mee chuva; amachu suwrnuwna ruwruw.”

⁴⁵Amana Jesu kuurting ama ing ithupak ing vakka ariir, “Aafhuw!” taka aabeeng atum.

⁴⁶Chukhaenache enuw ing Jesu chu suwr aeka emphuwppa.

⁴⁷Changvakonchu engkuurna ong mee yngkheh ing chem isuwka Aanchung Jaethiim meenae yngkhehchu aana asaehjohpa.

⁴⁸Amana Jesu ing eningna ariir, “Lamruw isuwr vaangkhe chemthar re rumor chisuwka nenuw ing kichu isuwr ivatheng vachuw?

⁴⁹Anasiir rumniieenna kamanchuw raenchuw nenuwkho ongchuw changvakonchu nenuw ing isuwrmahchuw. Havi ynthiing thiiziihchu ahungchumnii khaenava.”

⁵⁰Enuw vakhae ing Jesu chu bathen aeka taenchirsae.

⁵¹Iler yngkheh ing peenpang singka Jesu aanuw ahenjii; enuw ing amachu suwrkenta enchii,

⁵²Changvakonchu ama ing peenchu bathenka asae ing taensa.

⁵³Jesu chu Aanchung Jaethiim ongniiting enruwpa; amana aanchung jaethiim ae, upa ae, vokhehkho thiimthang ae engkheng yngkongsae.

⁵⁴Amana Pitar ing Aanchung Jaethiim vajeernii een sukmae ipha ing Jesu aanuw yndahhak ing ajenjii; amanche aarung mee ae thoh ama ing mi uka ong.

⁵⁵Aanchung jaethiim aere upa ae engkheng ing Jesu ithehnii khaena ataklina ichummah saarkhii enjong changvakonchu tuwhmahsae.

⁵⁶Akhaechuve mee aanem ing Jesu taklina ichamah saarkhii empeeh, changvakonchu saarkhii empeehchu yngkheh pangkho yntinting yntincheh mahsa.

⁵⁷Amana mee areh aeng hangiir aeka Jesu taklina ichummah saarkhii havi enghenpeeh,

⁵⁸“Mee ing aseem rumniieen havi mamaang ningka, inii nithum sungna mee ing aseemmah yngkheh ki ing seemva kata,” achiichu kenuw ing kensii.

⁵⁹Changche ichii ing riirkhang ae nakho ensaarkhii chaapchu suptin yntincheh mahsa.

⁶⁰Amana Aanchung Jaethiim ing hangiirka Jesu chu asii, “Nang nabasangfhuw omahva? Mee aenge nataklina imanraar aeka saarkhii empeeh icha ynchiiva?”

⁶¹Changvakonchu Jesu ing ahuw turudeh ing ongka basang mahsa. Amana athar vokheh Aanchung Jaethiim inche Jesu ningna asiireeh, nang bor apha Khrista chuvachii?

⁶²Amana Jesu ing basangka ariir, “Ki amachuping; nenuw ing Mee Sapa inche Aapirseh ruwreng tachangna ong vokhehkho thangbaen tanii ruwrduhna ijuwng muvanenta.”

⁶³Amana Aanchung Jaethiim ing apeen isiihka ariir, “Havi chungna inuw ing saarkhii ynchii jongvaan chiiva?

⁶⁴Jesu inge ithipak ing ichong nenuw ingkho nensiipa. Nenuw ing ynchii nemandennah?” Amana enuw vakhae ing Jesu chu itheh aru miraar empeehpa.

⁶⁵Amana mee topoh aeng Jesu taklina bachir aeka vokhehkho amae mangkhum aeka engabeeng amanche achuw ing eebeengva riirla ta aeka ichong embasen.

⁶⁶Amana Pitar ing vajeernii een sukmaena aonglae Aanchung Jaethiim meenae rupanuw yngkheh ihuung;

⁶⁷amana Pitar ing mi auchu amutah nache rupanuw inche enka ariir, “Nangkho Nazaret Jesu thoh ynruwhakchuw.”

⁶⁸Changvakonchu Pitar ing rumah-ka ariir, “Nang ing ynchii nariirva ki manghuwkho manghuwmah ing vokhehkho manghuw chehmah ing.” Amana Pitar ing taangting jungsuwhsa. Changlaenche aarkhuung inche khuwngsa.

⁶⁹Amana meenae rupanuw ing amachu muka aruvaena ingiir ae ning-na hava mee i enuw engkaar taniiva taka ariir.

⁷⁰Changvakonchu ama ing athar vokheh rumahsa. Amana apha topoh aanuwna akuurna ingiir aeng Pitar ningna enriir, “Nang i amarem vachii, akhaechuve natak i Galili tanii vachii.”

⁷¹Changvakonchu Pitar ing ataksah siraap ympika vokhehkho chongreep itu basenka ariir, nenuw ing nenriir mee havi khaene ki ynchiikho manghuwmah ing.

⁷²Aphanache aarkhuung ing avoma-niinii khuwngsa. Amana aarkhuung ing avomaniinii akhuwngmah rirae nang ing ki vathummeh irumahtanii taka Jesu ing aningna ariirchu ynsiisaka abarungriir nungaemahpak ing chapsa.