Read Moyon Naga MAAK 16 Bible Online

MAAK 16 - Moyon Naga bible

MAAK 16

¹Deennii aanuwna, Meri Mega-dalen, Jems amnuw Meri, vokhehkho Salomi, enuw ing Jesu chu barim ningsiihnii yntaehpeehnii khaena richiithou engariipa.

²Niisin ahaarpa inii nache inii hangsuwh thoh thaen ipha ing enuw vaksae.

³Lam nache enuw ing achuw ing thaen kamnii rungchu tuwrnaka eemongpeeh vaate ta aeka enareer ing enriirsah, akhaechuve rungchu inempak ruungsa.

⁴Amana enuw ing enghengen tahnache rungchu yntuwr vasah ing emupa.

⁵Enuw ing thaensung tingche envaruwh tahnache peen ivaarjaeh niika iler yngkheh tachang yntongting ongchu emupa; amana enuw inempak ngiksae.

⁶Ama ing eningna ariir, “Ngikmah-ruw; khros na jam aeka entheh Nazaret Jesu nenuw ing nenjongchu hangringka ama havane ongmahsa; Ama emantorniichu enruw.

⁷Nenuw yngkaenuwna Jesu asebok ae vokheh-kho Pitar ningna hungriirruw amachuve, Jesu ing Galili ting nenuw nemaana hesisa; ama ing neningna ariir vaangkhe nenuw ing Galili nache muvanenta.”

⁸Enuw ing jungsuwh aeka thaen tanii hungtaensae; akhae-chuve enuw ynchiim aethoh enruw riimpohsa; amanche engaanchik inche achuw ningnakho riirmah dehsae.

⁹Jesu ing ahangringnii niisin ahaar-pa inii nache Jesu ing umlae sarii ichuwng aningtanii athur vasah Meri Megadalen ningna yndangsa.

¹⁰Meri Magadalen ing Jesu thoh ynruwhak vasah ae, barungriir nungaemah ing ichap ae ningna vakka atong.

¹¹Changvakonchu enuw ing Jesu hang-ringsa vokhehkho ama ing Jesu kamu achiichu enuw ing thachamah ae.

¹²Havi aanuwna meeniimeh ing khuwting enghungsirae atakthoh yntinmahdeh ing lamna Jesu ing aantuwhfhuw ae.

¹³Amana enuw ing enganuw ynriaeka mee areh ae ningna entong, changvakonchu enuw ing thachamah ae.

¹⁴Aanuwnache suum ariingkheh aeng imaarnii khaena engongrae Jesu ing eningna yndangsa; amana enuw ing enthachamah vokhehkho embarungriir ipir khaena aasae ae, akhaechuve Jesu ing ahangring inuwting enuw ing muaeka enthachamah khaenava.

¹⁵Amana Jesu ing eningna ariir, “Nenuw laaruw paam aangkhengna sinuwna laaruw mee vakhae ningna isa chong tongruw.

¹⁶Achuw yngkheh ing thacha naka baptais tunave ikarpeeh phavaata, changvakonchu achuw yngkheh ing thacha mahnave ikarpeeh phamahnii.

¹⁷Amanche athacha achuw yngkheh chuve hava buwtinnii ae inge ynruwfhuw vaata: amachuve karumingna enuw ing umlae aechu thurvaatae, vokhehkho ithar ithar chong ing chongvaatae;

¹⁸enuw ing baruwr bachuwcheh vaatae, enuw ing laanglam ithiinii chuwr inkhang ae nakho yntanga tamahnii ae; enuw ing ina ae taklina engkik siivaatae amana ina aechu damvaatae.”

¹⁹Changche ichii ing eningna chong ariir inuwna Aafhuw Jesu chu thangbaen ting ajeripa amanche Thangnang achangbaen tachang nache ongsa.

²⁰Amana enuw ing vasiaeka apha vakhaena thamin entongpa, amanche Aafhuw Jesu thoh ynruw ing nong entuhakpa, vokhehkho engaanrufhuw buwtinnii laetho inche enthamin vakhaechu amanchumpa.