Read Moyon Naga MAAK 3 Bible Online

MAAK 3 - Moyon Naga bible

MAAK 3

¹Jesu ing meekongnii ting athar vokheh varuwhsa, amanache akik ithiipoh ina mee yngkheh heong.

²Amatah nache amana heong aeng Jesu miraar ijongnii khaena Deennii iniina amandamse mandammah ichii engabuwr.

³Ama ing akik ithiipoh ina ningnache havane huungla taka ariir.

⁴Amana Jesu ing Deennii iniina isa iture isamah itu, ringkum ikarre ithehchu ukhokha isava taka eningna asiiae. Changvakonchu enuw ing basangmah ae.

⁵Amana Jesu ing embarungriir ipirchu amuthoh athirfhuwr ing akuurna ong aechu enka, akik ithiipoh ina ningnache nakikkha ithoh taka ariir. Akikchu ahengathoh tahnache damsa.

⁶Amana Pharisi aechu jungsuwh aeka Herot inuwzii aethoh anikungna Jesu chu ithehnii khaena emanseerpa.

⁷Changlae Jesu ing asebok aethoh Galili chifhuw ting sisae, amana Galili tanii mee vakhae ing Jesu inuw ajii ae; Judia tanii,

⁸Jerusalem tanii, Idomia tanii, Jordan chiilaar tanii, Taire khuwruung vokhehkho Sidon khuwruung ing aruwkuwr sungna ong mee vakhae aengkho Jesu ing nong atuchu ensiitahna aningting vathengsae.

⁹Mee vakhae aenche Jesu chu athung ati naeru ing engabur-pohniimah khaena, Jesu ing sebok ae ningna ruwkuwng yngkheh thoraang turuw taka ariir.

¹⁰Akhaechuve Jesu ing mee inempak amandam tahnache, Jesu chu iparnii khaena ina ae chaap ingkho enveneeng.

¹¹Amana umlae ing ichuwng mee aeng Jesu chu emu emurae amaensokna tiih aeka nang i Thangnang sapa chuvachii ta aeka uungchak ae.

¹²Amana Jesu ing mee ing amanghuwniimah khaena eningna ipirpak ing ariir.

¹³Jesu ing amanden mee aechu eenka bung ting hangkarsa, amana enuw ingkho enghenjiipa.

¹⁴Amana Jesu ing asebok ynsuwhnii ae khaena, thamin itong amansinii ing,

¹⁵umlae aechu ithur enchehnii khaena, ama ing mee suum ariinii iteerka pham athinpae.

¹⁶Enuw chuve, Jesu ing Pitar taka a-eenniichak Simon,

¹⁷Zebedi sapa Jems re anaepa Johon, (enuw ynniimeh i Jesu ing Bonajes taka a-eenniichak, aruthochuve, bicheeh sapa ae achiiniiva);

¹⁸Andru, Philip, Bartholomiu, Methiu, Alphius sapa Jems, Thadius, Kana tanii Simon,

¹⁹amanche Jesu arensah Judas Iskariot ipae.

²⁰Jesu ing asebok aethoh een yngkhehna varuwhsae; amanache mee inempak vaangkongreehsae, chukhae-nache enuw imaarkho chehmahsae.

²¹Amana Jesu ing atu ari nongchu mee aeng emutahna Jesu i baveehsa ta aeka engaanseerchu a-eengkuw aeng ensiitahna envajong.

²²Amana Jerusalem tanii itheng thiimthang aeng enriir, “Jesu i Beelzebul ing chuwngsa, amanche umlae ae iruwng rumingna umlaechu athurva.” (Beelzebul i umlae ae iruwng achiiniiva.)

²³Amana Jesu ing enuwchu enka ynghuwnii thamin ing ichong, “Ynsaang khenche umlae ing umlaechu thurcheh vaata?

²⁴Iruwng lipah yngkheh asungna ynrumah ae naka asae ynniimeh suwhkenta ta ae nave, ama iruwng lipahchu utaraenkho ngiircheh mahnii.

²⁵Eensung yngkhehna ynrumah ae naka asae ynniimeh suwhkenta ta ae nave, ama eensungchu utaraenkho ngiircheh mahnii.

²⁶Amanche umlae iruwng lipahchu asiksik suwhnave, amachu ngiircheh mahnii, changvakonchu chenvaata.”

²⁷Achuw tanga ingkho ipirpak mee een nache varuwh naka atakchu amaensana phuwpmah nave, apeehchu richehmah; phuwpvaang naka apeehchu richehpeh vaata.

²⁸“Ki ing neningna atatak ing kariir-nah, mee vakhae taklina isii icher chaap vokhehkho Thangnang taklina ithipak ing ichong chaap kuhpeeh vaata;

²⁹changvakonchu achuw yngkheh ing Ynthiing Laetha taklina ithipak ing ichong chuve utaraenkho kuhpeeh mahnii, akhaechuve ama ing ichen naemah isii arangpa.”

³⁰Hava chong i ariirnii chuve, “Jesu i ynthiingmah laetha ing ichuwngva enchii tahnava.”

³¹Changlae Jesu amnuw re anae ae vatheng aeka, taangna ngiir aeka Jesu chu va eennii khaena mee yngkheh envechiirpa.

³²Changlae mee vakhae aeng Jesu chu ruwkuwr aeka ong ae: amana Jesu ningna enuw ing enriir, “Nangnuw re nanae ae ing taangna ynjongnah ae.”

³³Ki kanuw re kanae aechu achuw aepae taka Jesu ing abasang.

³⁴Ama-na atakchu ruwkuwr aeka akuurna ong mee aechu enka ariir, “Enruw, ki kanuw vokhehkho kanae aechu!

³⁵Thangnang ing amandenna isi achuw yngkheh meechu ki kauw kanae, kasar kajuwr vokhehkho kanuw va.”