Read Moyon Naga MAAK 4 Bible Online

MAAK 4 - Moyon Naga bible

MAAK 4

¹Jesu ing athar vokheh Galili chifhuw kuurna mee ynchuw abasenpa. Amanache mee inempak akuurna avaangkong tahnache Jesu ing ruwkuwngna hangkarsa; amana mee vakhae inche chifhuw kuurna ongsae.

²Amana Jesu ing thamin atongthoh ynruw ing inempak amanchuw ae, vokhehkho amanchuw aethoh ynruw ing eningna ariir:

³“Rungaeruw! Mee yngkheh ing sachii ivor sisa.

⁴Ama ing sachii avorlae, sachii topoh lam kuurna ibuwchu vaati ing asahpa.

⁵Sachii areh ing pir inem omah rungkaar nache buksa, amana pirchu adongkhroh tahnache imaenhak ing hangmuwng khangnakho

⁶inii abasaklae mamvuwsa, vokhehkho arajung paecheh mahka chongpohsa.

⁷Sachii areh inche iring kaarna buksa, amana hangmuwng khangnakho iring ing aabuum tahnache ynla chehmahsa.

⁸Changvakonchu sachii areh ingve ruwruw isana bukka isajaeh ing hangmuwngsa, amana sarup somthum, somruk, vokhehkho sarup chaama ynlasa.”

⁹Amana Jesu ing amandong, “Isiinii aana ipaar mee chaap inche siisa rasiing.”

¹⁰Jesu kuurna ong aere suum ariinii ae ing Jesu ing thamin atongchu ynchii achiiniiva ta aeka Jesu asanaen ing aonglae ensii.

¹¹Jesu ing eningna ariir, “Ithuwhpak Thangnang lipah chong havi neningna kapeehpachuw, changvakonchu taangna ong ae khaena chembe aangkheng thaminjaeh vatah,

¹²‘Amana chembe enuw ing muae naka envaatae, changkhangnare embarungriir bachukmahnii, vokhehkho siiae naka rungaevaatae, changkhangnare manghuwmahnii ae; changmah nave Thangnang ningting hunganriae naka, amanche isiichu kuhpeeh vachiipae.’”

¹³Amana Jesu ing eningna ariir, “Havana ynghuwnii thamin i nenuw nemanghuwmahva? Chunuwcha ynsaangkhe ynghuwnii thamin vakhaechu manghuwcheh vanente?

¹⁴Sachii ivor mee yngkheh ing isa chongchu avornah.

¹⁵Mee topoh aeve lam kuurna isa chong ibuw vaangkhe, enuw ing ensiithoh umlae ing thengka eningtanii isa chongchu aripa.

¹⁶Mee areh chuve, rung kaarna sachii ynvor vaangkhe ichii ing isa chongchu ensiithoh rotharoh ing anikungna engaraangpa.

¹⁷Changvakonchu enrajung apaemah tahnache amongpang tina engkhaangpheh, changvakonchu isa chong khaena ijachaam empha vokhehkho enanglae jiicheh mahsae.

¹⁸Mee areh inche iring kaarna sachii ynvor vaangkhe ichii ing isa chongchu ensiipa;

¹⁹changvakonchu laaruw paam vakhar, lerchii yndik, amanche reentaang aajaeh vakhar ing sip aeka isa chongchu omahsa, vokhehkho ynla chehmahsae.

²⁰Changvakonchu mee arehve ruwruw isana sachii ynvor vaangkhe ichii ing isa chongchu enuw ing ensiitahna engaraangpa, amana sarup somthum, somruk, vokhehkho sarup chaama ynlasa.”

²¹Jesu ing eningna ariir, “Jaemi chu asiihniina siimah manuwka, buruk derna vokhehkho ijaarnii derna isiihfhuw ing nensiih vakhang?

²²Akhaechuve irengna yndangmah vachii ithuurfhuw yntanga omah vokhehkho yndangmah vachii yntanga omah.

²³Isiinii aana ipaar chaap mee inche siisa rasiing.”

²⁴Jesu ing eningna ariir, “Nenuw ing nensii chaap vakhae manjiiruw; nenuw ing nenguur inuwzii ingkhe nening nakho aanghakjaeh ing uur vaata, amanche inemseh ingkho ipivaata.

²⁵Aadeen mee taklina inemseh pivaata; amanche aadeenmah ningtanii topoh pangti adeensah chukho richirvaata.”

²⁶Athar vokheh Jesu ing ariir, “Thangnang lipahchu havithoh aanghakna, mee yngkheh ing ruwruwna sachii avorpa,

²⁷amana jaarkhang nakho, hangsuw khangnakho, sachii avorchu ynsaangkhe hangmuwngka ihungruungva ichii manghuwmah.

²⁸Ruwruw ing sachii i mamuwngka paarna vokhehkho amanlanah.

²⁹Aan-lachu minka ikuum phanache ama ing chemki chika aeh abasennah.”

³⁰Jesu ing ariir, “Thangnang lipahchu ynchiithoh mandeengtaruw, changmahka ynchii ynghuwnii thamin ing mandangtaruw?

³¹Amachuve havithoh aanghakna. Mee yngkheh ing sachii kaarna aasiingseh encham muwchu chika amana ruwruwna avorpa.

³²Apha topoh aanuwna hangmuwngka vokhehkho chimuw bajaang vakhae kaarna iruungseh hungansuwhsa, amanche abah nache vaati aengkho enrabuw eng-huwniinah. Thangnang lipahchu havithoh aanghakna.

³³Enuw ing emanghuwchehnii khaena Jesu ing reentaang aajaeh thamin ynghuwnii ing atong.

³⁴Jinge ichii ing ynghuwnii thamin mahnaka eningna chongmah. Changvakonchu Jesu ing asebok aethoh enum ing engonglae aangkheng eningna atongkiir.”

³⁵Ama khuri nache Jesu ing eningna ariir, “Inuw ing chiilaar kahmanuwka reentaang yngkhehting sitaruw.”

³⁶Changlae Jesu kuurna ruwkuwng arehkho ingiir, amana mee vakhaechu ma aeka enuw ing Jesu chu ruwkuwngna enruwpa.

³⁷Amana ipirpak khuksuwr siiraang inche pha aeka chifhuw ynnoh ing ruwkuwngchu avenuurtah nache chii ing bariim ynthongsa.

³⁸Changlae Jesu ing ruwkuwng ariikiingna ijaar; amana enuw ing Jesu chu basuw aeka aningna enriir, “Aafhuw, inuw chiiting ibuw ynthongmuw i namanghuwmah vamo enchii.”

³⁹Jesu ing ynterka siiraangchu rukuhka chifhuw ynnoh tingche daerengla achii. Amana khuksuwr siiraangchu chenka daereng ing omsa.

⁴⁰Amana Jesu ing asebok ae ningna ariir, “Nenuw ynchii khaena ynchik vachuw? Nenuw ataraenpha nenthacha omahva?”

⁴¹Enuw inempak ynchikpoh aeka yngkheh yngkheh ynsiisae, “Siiraang ingkho amanche chifhuw ingkho achongriir amanjii havi achuwva!”