Read Moyon Naga MAAK 5 Bible Online

MAAK 5 - Moyon Naga bible

MAAK 5

¹Galili chifhuw alaarna om Gera-seni ichii paam nache enuw tungsae.

²Amana Jesu ing ruwkuwng tanii ajungchum thoh, umlae ing ichuwng mee yngkheh inche thaen-kung tanii jungsuwhka Jesu chu aantuwhfhuwpa.

³Atak i thaenkungna ong meeva, achuw ingkho siir runoh ing iphuwp achehmahva;

⁴akhaechuve atak i siir runoh ing phuwpchak khang ae nakho amanche korkhiing ing charchak khang ae nakho, ama ing ipehka abathingchir chaktah nache, achuw ingkho atakchu irahnii maesa deenmahsa.

⁵Ama ing siim jaen naeruung thaenkungna vokhehkho reenna uungka asanaensah ing rung ing ynsuknum chakva.

⁶Ama ing Jesu chu laarkhehna ajemuthoh vataenka arumpa;

⁷amana ipirpak ing uungka ariir, “Yngkaang-sehna ong Thangnang sapa Jesu, nang ing kaningna ynchii tukata nachiiva? Thangnang rumingna kathamsahnahchii, ki imamaang samahra.”

⁸Havi Jesu ing aningna umlae nang aningtanii hungsuwhra taka ariirvasah tahnava.

⁹Amana Jesu ing asii, “Naruming achuwva?” Ama ing abasang, “Karuming chuve ‘Inem’ achiiva; akhaechuve kenuw nempaknung.”

¹⁰Ama ing Jesu ningna athamsah, “Kenuwchu hava paam tanii ithurmahra.”

¹¹Changlae ama reen nache voh aruwr yngkheh imaar ae;

¹²amana enuw ing Jesu ningna enthamsah, “Kenuwchu voh ae sungting iruwhnii khaena ibathensara.”

¹³Amana anikung narapche Jesu ing enuwchu ynthen arupa. Changlaenche umlae aeng aningtanii taang suwh aeka voh ae sungting ruwhsae; voh aruwr lising ynnii vakhaechu reen tanii jungtaen aeka Galili chifhuw ting ruwh aeka thikchirsae.

¹⁴Amana voh aacheer aenche hungtaen aeka khuwruung vokhehkho khuw khuw ting amachu emanthangpa, amana ynchii isuwhva ta aeka aanbuwr mee itheng.

¹⁵Enuw ing Jesu ningting envaklae, achingnii umlae inempak ing ichuwng vasahchu peendiir heniika vokhehkho iriing idam ing heong emutah nache enuw ynchikpohsae.

¹⁶Amana heong aenche umlae ing ichuwng mee re voh ae taklina ynchii isuwhva ichiichu ivatheng ae ningnache entongpa.

¹⁷Amatah nache ivatheng aenche Jesu ningna khuwveen ibathenpeeh tahra ta aeka enthamsah.

¹⁸Jesu ing ruwkuwng ting ahangkarlae, umlae ing ichuwng vasah mee inche Jesu chu ijiinii khaena athamsah.

¹⁹Changvakonchu Jesu ing daaka aningna ariir, “Een ting yngkaenana amanche naarang ae ningna Aafhuw ing nakhaena aajaehmeh iruung nong atuva, vo-khehkho nataklina ynsaangkhe ichii ing aningsiih amandangva ichiichu eningna hungtongla.”

²⁰Atii ama ing yngkaeka Jesu ing akhaena aajaehmeh iruung nong atupeehse ichiichu Dekapolis (Jordan chiilaar iniisuwhtah yntongting khuwruung suum om) nache ynthang abasenpa, amana asii mee vakhae aenche enruw iriim.

²¹Jesu ing athar vokheh ruwkuwng nache Galili chifhuw laar kahka, ama ing chifhuw kuurna aonglae mee inempak akuurting vaangkongsae.

²²Changlae Jairus ichii meekongnii aapuh mee yngkheh vathengka Jesu amuthoh

²³aningna athamsah, “Ki kasanuw thik ynthongna, atakchu adamnii ing vokhehkho iring apha-sahnii khaenache ivakpeeh nana nakik ataklina isiipeehra.”

²⁴Amana Jesu ing amathohche vaksae. Changlaenche Jesu chu mee inempak ing ibuumpoh aeka ahenjii ae.

²⁵Enuw ing envakraenche kumsuum ariiniina sii ynta ing ina rupanuw yngkheh heong,

²⁶ama rupanuwchu ithiim aajaeh yngenka vokhehkho adeen seer aajaehkho abathangchir, changvakonchu damchehru ing ina athisehseh.

²⁷Hava rupanuw inge Jesu nongtuchu asiitahna mee changjaeh inem kaarnache Jesu tuknungting vakka apeenchu aparpa.

²⁸Akhaechuve ama ing amandensah, “Jesu apeendiir ruwchu parningve, ki damva kata.”

²⁹Aphachak nache asii yntachu daesa, vokhehkho ina damsing ichii ataksah ing ynghuwsa.

³⁰Amana Jesu ing aruwreng sisa ichii amanghuwtahna mee kaarna vaanlehka asiipae, “Achuw ing kapeen aparva.”

³¹Asebok ae ing embasang, “Mee hangjaeh inem ing nakuurna eeburpoh ae raenche, ynsaangkhe achuw ing ymparva ynchiipeeh vachii.”

³²Changvakonchu Jesu ing achuw ing ymparva taka akuurna ong aechu aabuwr.

³³Changlae rupa-nuw ing ataklina ynchii suwhne ichii amanghuwthoh ynchikpak ing vokhehkho ynchiim ing Jesu maen-sokna vakhupsaka, ama ing Jesu ningna athamin aangkheng atongpa.

³⁴Amana Jesu ing rupanuw ningnache kasanuw namandensah inuwzii ing damsachii; nang nungaejaeh ing yngkaera, amanche ina tanii damkiirla taka ariir.

³⁵Jesu ing changche ichii ing achong raenche meekongnii aapuh een tanii mee topoh vatheng aeka enriir, “Nasanuw kha thiksa, ynchii khaena oja kha namanjava.”

³⁶Changvakonchu Jesu ing enchongchu rungaepeehru ing meekongnii aapuh ningnache ariir, “Ynchik mahra, yndenpang mandenjaeh tahra.”

³⁷Amana Jesu ing Pitar re Jems vokhehkho anaepa Johon mahnaka achuwkho ruwmahsa.

³⁸Enuw ing meekongnii aapuh een emphathoh, mee vakhae aeng ynchii tuva kenchiiva ichii manghuwru ing vokhehkho uung aeka ichap aechu amupa.

³⁹Jesu ing een sungting varuwhka mee vakhae ningnache ariir, “Nenuw ynchii khaena ichap vachuw? Naepang i ithiimahva, ijaarsah vatah.”

⁴⁰Amana enuw ing Jesu chu emaniisah ae. Changvakonchu Jesu ing enuw vakhaechu taang basuw chirka, naepang ampa re amnuw vokhehkho asebok ynthum aechu ruwka naepang aantorniiting varuwhsae.

⁴¹Amana Jesu ing naepangchu akikna jeba-chuwka ariir, “Talitha, Koum,” havi arutho chuve, “Achiihnuw, hangsuwra ta ingka kariirnah achiiniiva.”

⁴²Changlaenche rupanuwti inche hangsuwka baversa; atak chuve kum suum ariinii naepangva. Amana enuw vakhae enruw riimpohsa.

⁴³Amana Jesu ing meeningna riirmah dehruw taka eningna ipirpak ing ariirpa, vokhehkho rupanuwti i asahfhuw piruw taka ariir.