Read Moyon Naga MAAK 9 Bible Online

MAAK 9 - Moyon Naga bible

MAAK 9

¹Jesu ing eningna ariir, “Ki ing neningna atatak ing kariirnah, havane ingiir mee topoh ae inchembe Thangnang lipahchu ruwreng thoh ynruw ing ijungtheng emumahri raentaang ithii mumahnii ae.”

²Jesu ing inii niruk aanuwna Pitar, Jems vokhehkho Johon, enuw chupang yngkaangpak bung tingche asiksii ing aruwpae; amanache Jesu ing emaekungna amasak auurpa.

³Changlaenche Jesu peendiirchu ariirfhuwchah ing vaarsa, amachuve laaruw paamna peendiir arusuk mee rap ingkho changche manvaar chehmahnii.

⁴Amana Elija re Mosi ing eningnache yndang aeka enuw ing Jesu thohche chonghaksae.

⁵Changlaenche Pitar ing Jesu ningna ariir, “Aafhuw inuw ing hava minne ong ing sakvaata, vokhehkho inuw ing rumniitham ynthummeh, narutum yngkheh, Mosi rutum yngkheh amanche Elija rutum yngkheh seemtaruw.”

⁶Akhaechuve enuw inempak ynchiksae, amanche ama ing ynchii riirva kachiiva ichii manghuwcheh mahsa.

⁷Amana enuwchu ruwrduh ing abaruwpae, vokhehkho ruwrduh sungtanii iruur yngkheh ing ariir, “Havi kaning kamansiihpak kasapa chuva; ama ing ariirchu rungaeruw.”

⁸Aanuwdeh nache aruvaena engentah nache Jesu mahnaka achuw tikho mumahsae.

⁹Enuw ing bung tanii enjungchumrae, Mee Sapa ing ithii tanii ahangring mahtaang achuw ningnakho nemu chaapkha tongmahruw taka eningna ariir.

¹⁰Chutahnache ama ing ariir chongchu amanjiiae, changvakonchu ithii tanii ihangringchu ynchii achii-niiva ta aeka enareersahna ynsii ae.

¹¹Amana enuw ing Jesu ningna asii ae, “Ynchii khaena thiimthang aeng Elija inche maensa ing jungtheng vaata enchiiva?”

¹²Amana Jesu ing eningna ariir, “Elija ing amaensana juwngka peeh aangkhenglaang ajaenniivaang amang-om chirpa; amanche Mee Sapa ing ijachaam inempak khaangvaata, vokhehkho mee ing maniisa vaata ichii khaena ynsaangkhe ichii ing ynziihva?

¹³Changvakonchu ki ing neningna kariirnah, Elija chu thengsa, vokhehkho akhaena ynziih vaangche ichii ing enuw ing emanden chaap ataklina entupa.”

¹⁴Enuw ing sebok ae ningting enjuwng thoh, enuwchu mee vakhae ing ihir aeka vokhehkho thiimthang aethoh chong hungsii vaansii entuchu emupa.

¹⁵Amana mee vakhaengche Jesu chu emuthoh enruw riimpohsa vokhehkho Jesu kuurting vataen aeka embariimsahpa.

¹⁶Jesu ing eningna asii ae, “Nenuw ynchii nemanseerva?”

¹⁷Amana engkaar tanii mee yng-kheh ing ariir, “Oja, achong isuwhmah umlae ichuwng kasapa naningna kajeruwsahnah;

¹⁸Atak i umlae achuwngchak raenche bathiihka vokhehkho abaena por isuwh thoh aha iriirka ynlaap chehmahchak; amanche nasebok ae ningnakho ithurpeehruw ta ingka kariirsahva changvakonchu enuw ing chehmah ae.”

¹⁹Amana Jesu ing eningna ariir, “O thacha omah suwnthar siti ae, ki ing nenuwthoh apha aajaeh iseeh ing ongvakata khang? Ki ing nenuwthoh apha aajaeh khaangcheh vakate? Ama meechu kaningting henruwruw.”

²⁰Enuw ing pasarti chu Jesu kuurting enghenruwpa; amana umlae inche Jesu amuthoh pasarti chu inukriika, vokhehkho abaena por isuwh ing ruwruwna bathiihka amanruppa.

²¹Jesu ing pasarti ampa ningnache asii, “Nasapa taklina isuwh havi apha aajaeh seehsa?” Ampa inche abasang, “Anaepang raenniiva.”

²²“Pasarti i ama-maangnii ing mi sungting vokhehkho chii sungting aajaeh athahchak. Chutahnache Jesu nang ing ynchiiva natuchehchu, naning imanchuwh sanana ibomsara.”

²³Jesu ing aningna abasang, “Nang ing rutaniive, thacha mee ningna chembe nong aangkheng itu arusa.”

²⁴Aphanache naepang ampa ing uungka ariir, “Kathachanah; kathacha apirnii ing ibomsara.”

²⁵Amana mee vakhae ing ihungtaen aechu Jesu ing amutah nache, ama ing umlaechu rukuhka ariir, “Achong isuwhmah vokhehkho aana iseeh umlae nang aningtanii taang hung-suwh, vokhehkho athar vokheh aningting varuwhmah ta ingka na-ningna kariirnah.”

²⁶Chutahnache umlae inche uungka vokhehkho pasarti chu aanukrii aanuwna taang suwhsa, amana nae-pang chu ithii vaangkhe ichii ing yntorsa; changlaenche mee aanem inche naepang i thiksarammo ta aeka enriir.

²⁷Changvakonchu Jesu ing akikna jebachuwka ahemangiirpa, amana naepang chu hangiirsa.

²⁸Amana Jesu ing eensung tingche varuwhsa, ama inuwnache asebok aeng ynruwhjaeh ing ensii, “Kenuwcha ynchii taka umlaechu kenthurcheh mahva.”

²⁹Jesu ing eningna ariir, “Hangchii ae i ithamsah mahnaka thurcheh mahtanuw.”

³⁰Enuw ing ama mapham na ing siaeka Galili paam sung hungruwh aeka enghengaraenpa. Amachu Jesu ing achuw ingkho manghuw naka tamah;

³¹Akhaechuve Jesu ing asebok ae hemanchuwka eningna ariir, “Mee sapa i mee ae kikna pivaatae vokhehkho thehvaatae; amana inii nithum aanuwnache hangring vaata.”

³²Changvakonchu enuw ing ynchii ariirniiva ichii manghuwmah ae, vokhehkho enuw ing Jesu ningna siiva enchii ynchik ae.

³³Enuw ing hungsi aeka Kaparnaum tungsae; amana Jesu ing een sungna aonglae eningna asii ae, “Lam nakhe ynchii nemanseerva?”

³⁴Changvakonchu enuw ing ba-sangmah ae; akhaechuve enuw ing lam nache enghungsirae achuwchu iruunghakva ta aeka emanseer tahnava.

³⁵Amana Jesu ing ongka vokhehkho suum ariinii aechu eenka eningna ariir, “Achuw yngkheh ing maensa ningka tanave, ama meechu aangkhengna ningkuur va-chiiva, vokhehkho mee aangkheng rukuum tuvachiiva.”

³⁶Amana naepang yngkhehchu jedomka arikna mangongka, vokhehkho abaen nache jebachuwka eningna ariir,

³⁷“Achuw yngkheh ing karumingna naepang havi bariim nave, kichu ymbariimva; amanche achuw yngkheh ing kichu ibariimsa nave, ki ymbariimmahva changvakonchu ki ynjenchiir amachu abariimva.”

³⁸Johon ing Jesu ningna ariir, “Oja, narumingna umlae athur mee yngkheh kenuw ing mu ungka kengkhaam, akhaechuve ama eenuw ajii mee mahsa.”

³⁹Changvakonchu Jesu ing ariir, “Ama meechu khaammahruw; achuw yngkheh ing karumingna laetho atucheh mee inche kakhaena isamah ing ichong chehmahnii.

⁴⁰Akhaechuve inuw ynru meechu ymmeeva.

⁴¹Ki ing neningna atatak ing kariirnah, Khrista khaenava tanaka achuw yngkheh ing chii kam yngkheh neningna ipinave nongmenchu pharem vaata.”

⁴²“Havana naepang ae inge karumingna ynthacha aechu achuw yngkheh ing isiiting babuk nave, ama meechu ariingna rungsum yngkheh bakhae manuwka chifhuw ting iren ing sakseh vaata.

⁴³Amanche nakik ing nangchu isiiting ibabuknii vachii ing omnave nakikkha ten; nakik ynniimeh om ing ithiimah misung longkongting bukva nachii changve, nakik yngkheh omah ing iringniiting ivaruwh inche saksehna.

⁴⁴

⁴⁵Amanche nakhi ing isiiting ibabuk niivachii ing omnave, nakhikha ten; nakhi ynniimeh om ing longkongting bukva nachii changve, nakhi yngkheh omah ing iringniiting ivaruwh inche saksehna.

⁴⁶

⁴⁷Amanche namik ing nangchu isiiting ibabuknii vachii ing omnave, namik kha ipherla; namik ynniimeh om ing longkongting bukva nachii changve, namik yngkheh-pang ing Thangnang lipah ting ivaruwh inche saksehna.

⁴⁸Longkong ichii ive tangong rungi ithiimah ae, vokhehkho mi chuwhjaehka om paamva.

⁴⁹Mee aangkheng bachii ijim vaangkhe mi sungna kaangvaata.

⁵⁰Bachii inche achiiniichu omahnave, ynsaangkhe manchiicheh vanenta? Nenuw netaklina bachii mangomruw, vokhehkho yngkheh re yngkheh idae ing ongruw.”[1]