Read Moyon Naga LUK 1 Bible Online

LUK 1 - Moyon Naga bible

LUK 1

¹Aburna basenka emikrap ing emu vohehkho isa chongchu aatong mee aenche keningna ympeeh ae inuwzii ing,

²amanche inuw yngkaar nakho nong ing isuwh vasah havi khaene mee aanem ing embaziih khaenache,

³Ynjasuwhpak upa Theophilus, nang ing namanghuw vasah nakhe atatak ynthiing ing namanghuwnii khaena,

⁴ki ingkho abasenraennii ing abur aanuw henjiisa ingka isajaeh ing naningna havi mandang ningka kachiisahva.

⁵Judia ae iruwng Herot apaallae Abija sakae sungna, aruming Sakharia ichii mee yngkheh jaethiim heom, vokhehkho ama arumee inche Aaron sungkhur taniiva, vokhehkho aruming chuve Elizabet va.

⁶Changlae enuw saanglam ing Thangnang chonghak inuwzii ing anong entu vakhaena enraar aommah tahnache Thangnang maanache ichum ynthiing meechu ynsuwhsae.

⁷Changvakonchu enuw siti deenmah ae, akhaechuve Elizabet siti deenvachii rupanuw mahsa, amanche enuw engkumsing kho nemsa.

⁸Inii nikhehna jinge ichii ing suwhsa, amachuve ama ing aanchimfhuw ae kaarna pham inuwzii ing Thangnang maana jaethiim nongchu aturaenche,

⁹jaethiim pham purah inuwzii ing Aafhuw ynthiing ka sungna varuwhnaka ningsiihnii barim bathu vachii nongchu aningna buksa.

¹⁰Ama ing ningsiihnii barim abathuraenche mee vakhae ing taangna Thangnang ting thamsa aeka heong ae.

¹¹Changlaenche Thangnang vaarmee yngkheh ing juwngka ynthiing ka asung tachang yntong nache ngiirka atakchu chong abuwhpa.

¹²Changlae Sakharia ing amutahna abarungriir fhuwm bavaesa, vokhehkho ynchiksa.

¹³Amana vaarmee ing aningna ajeriir, “Ynchik mahra, Sakharia, nang ing nathamsahkha kasiipa, narumee Elizabet ing sapa yngkheh baring vaata, amanche arumingchu Johon tavanenta.

¹⁴Amanche nang ing inungae vokhehkho rotharohchu phavanata, vokhehkho mee aanem ing enrotha rohvaata;

¹⁵akhaechuve ama Aafhuw maana ruungvaata, vokhehkho vomrip chii kho, juw kho inmah dehnii, amanche amnuw ven sungna basen naka ynthiing laetha ing sipvaata,

¹⁶amanche Isrel siti vakhae aenche empa Thangnang tingche athar embarungriir hemanghuung vaata,

¹⁷vokhehkho ampa ae barungriirchu ensiti ae ningting, chongriir amanjiimah mee aechu ichum mee ae loshing ting enghuungnii khaena vokhehkho Aafhuw khaena husaar atu mee aechu athar husaar itunii khaena, ama ing Aafhuw maanache Elija laetha vokhehkho ruwreng thohche sivaata.”

¹⁸Changlae Sakharia ing vaarmee ningna ariir, “Havi ki ing ynsaangkhe manghuwcheh vakate? Akhaechuve ki tarsing, vokhehkho karumee chukho akumsing hungnemsa.”

¹⁹Amana vaarmee ing abasang, “Thangnang maana ingiir Gabriel chuping, ki nangthoh ichonghaknii khaena amanche isa chong havi naningna iriirnii khaenache ynjenchiirva.

²⁰Enla, havana chongjeer vakhae i asuwhmahri raentaang nang nahuw daejaeh vaata vokhehkho ichongkho chehmah tanii, akhaechuve nang ing hungsuwh vachii kachongjeer thachamah sachii.”

²¹Apha ichiinache mee vakhae aeng Sakharia chu hehah aeka vokhehkho ynthiing rumnii sungtanii ajungsuwh siimah tahnache enuw inempak ngiksae.

²²Ama ing ajungsuwh tahnache eningna chong riircheh mahsa, chukhaenache mee aenche atak i ynthiing rumnii sungna ynchii yngkheh amusa ichii emanghuwpa; changlaenche ama akik ing eningna emanghuwnii inche ichongcheh mahchu amandangpa.

²³Ama ing anongchu amanchinuwna a-eenting yngkaesa.

²⁴Inii topoh aanuwna basenka ama arumee Elizabet chu venchisa, vokhehkho tha rungameh eensung tanii hung-suwhmahsa.

²⁵“Atii Aafhuw ing kichu ymbajuumsahpa. Ama ing mee vakhae kaarna kaning ynjakniichu ynripeehpa achii!”

²⁶Tha kuruk ahenpha chakna Galili khuwruwng sungna Nazaret ichii khuwna vaarmee Gabriel chu Thangnang ing ajenbathenpa.

²⁷Devit iruwng eengkuw tanii Josep ichii pasar thohche rakhiinii khaena juwr yngkhuw vasah ynthiing lunghah aningna vaarmee ing jungthengsa; lunghah aruming chuve Meri va.

²⁸Vaarmee inche veneengka ariir, “Idaechu naningna omlasii! Aafhuw ing nangchu eenruwfhuwsa vokhehkho inempak bor ympeehsahpa!”

²⁹Hava chong i asiitahna ynchii achiiniiva taka ama inempak abarungriirna fhuwm bavaesa.

³⁰Changlae vaarmee ing aningna ariir, “Ynchik mahra Meri; nang ing Thangnang ningtanii aningshiih naphapa.

³¹Chukhaenache enla, nang venchi taniika sapa yngkheh baring vaanta, amanche aruming chuve Jesu tavanenta.

³²Ama inempak hungruung vaata, amanche ynkaangseh Thangnang sapa tavaatae; chukhaenache Aafhuw Thangnang inche ampa Devit iruwngpham ongniichu pivaata,

³³vokhehkho Aafhuw inche Jakop eengkuw taklinache ichen naeru ing paarvaata; changlaenche iruwng apaamchu ichen naemah ing paarvaata.”

³⁴Amana Meri ing vaarmee ning-nache ariir, “ki kafhuwsar omahri, havi ynsaangkhe suwhva chiiva?”

³⁵Changlae vaarmee ing aningna abasang, “Ynthiing laetha inche nataklina juwngvaata vokhehkho athiseh yngkaangpak ruwreng inche ibaruwvaata; chukhaenache naeduung-chu Thangnang sapa ynthiing chuvaata.

³⁶Amanche enla, nang nasungkhur Elizabet ingkho atar ting sapa yngkheh baring vachii khaena venchisa; mee aeng siti baring mahnii ta aeka enriirkha atiive ven achinii tha kuruk ahenphapa.

³⁷Thangnang ing chehmah vachii yntanga omah.”

³⁸Changlae Meri ing abasang, “Enla, Aafhuw meenae sanuwping; nang ing najeer chong inuwzii ing kaningna suwhrem rasiing.” Ama aanuwdeh nache vaarmeechu yngkaesa.

³⁹Amana Meri ing inii nikheh ninii aanuwna hangiirka lamthing paam Judia khuwruung tingche sisa,

⁴⁰amanche Sakharia eensung tingche ama ing varuwhka Elizabet chu salaam atu.

⁴¹Meri ing Elizabet salaam atuchu asiitah nache aven sungna naepang ynthinchu ynlaapsa; changlaenche Elizabet chu laetha ynthiing ing sipka,

⁴²Iruur yndang ing ariir, “Rupanuw vakhae kaarna nang chuve bor naphava vokhehkho naven sungna naepang ynthin i bor naphava!

⁴³Ki kaafhuw amnuw ing kaningna ynveer i ynchii khaena isuwhva?

⁴⁴Akhaechuve enla nang ing salaam yntuchii i kaana ing kasiisah tahna kaven sungna naepangchu inempak arotha iroh ing ynlaapsa.

⁴⁵Chukhaenache Aafhuw tanii ynthiing chong aningna itheng athacha rupanuw chuve bor aphava.”

⁴⁶Meri ing ariir, kabarungriir ing Thangnang chu kamanpahsahnah,

⁴⁷vokhehkho kalaetha ing ki eekarpeeh Aafhuw Thangnang ningnache karotha rohsakna,

⁴⁸akhaechuve, yntuurpak meenae rupanuw kaningna Aafhuw inche yngensahpa. Enruw, atanii basen naka hungsuwhvachii suwnthar aajaeh ajaehna bor apha rupanuw itavatae;

⁴⁹akhaechuve ipirpak Thangnang inche kaningna iruungpak nong amandangpa, amanche ynthiing ichiichu ama aruming chuva.

⁵⁰Amanche Aafhuw chu achii mee vakhae taklinache suwnthar aajaeh hungpaar nakho Aafhuw ningchuwhchu omjaeh vaata.

⁵¹Aafhuw kik ipirpakchu ymmandangpeehpa, emanghuwsah barungriirna ynding mee vakhae ae barungriirchu asiksik ing amangomgpa,

⁵²Aafhuw inche aacheh chirpung achii aechu engaruwngpham tanii amanjuurpae, amanche yntuur mee ae chuve aathohpa;

⁵³Aafhuw ing venchaam chiilaar mee aechu isapak thaemin ing amamvapae, amanche savang ae chuve aruwh thangsii ing abathenpae.

⁵⁴Aafhuw Thangnang ing Abraham vokhehkho atuti ae hungpaar vakhae taklina ichen naemah aningchuwhchu yndennii khaena,

⁵⁵inuw vakhae ynfhuwven ae ningna ajeer vasah inuwzii ing, Aafhuw ing ameenae Isrel aechu abomsahpae.

⁵⁶Meri ing tha ynthum vakhae Elizabet thoh onghak aeka a-eenting yngkaesa.

⁵⁷Atii Elizabet naepang omvachii apha hemphaka sapa yngkheh abaringpa.

⁵⁸Amana Aafhuw inche iruungpak aningchuwh amandangchu ama auwnae, aveenchaang, asungkhur vakhae aengkho ensiitah nache inempak enrotha rohsa.

⁵⁹Amana inii neeriih ahenpha raen-che naepangchu vinchiipnii khaena enuw thengsae; vokhehkho enuw ing emanden chuve ampa ruming manreen manuwka Sakharia tavataruw ichii ing emandenpa.

⁶⁰Changvakonchu amnuw ing eningna naepang i aruming Johon tavaanchiiva taka ariirpa.

⁶¹Amatah nache enuw ing embasang, “Nensungkhur sungna hava ruming i areen mee omahri.”

⁶²Chutahnache enuw ing ampa ningnache aruming achuw taningka nachiiva ta aeka amanghuwnii ing ensiipa.

⁶³Amana ampa ing baziihnii vachii niihka ama ing arumingchu Johon va taka abaziihpa. Chutahnache enuw inempak ngiksae.

⁶⁴Changlaen chakche ama ing athar ichong chehka Thangnang chu amanpahsahpa.

⁶⁵Changlaenche aveenchaang chaap aechu ynchikpohsae. Amana ataklina isuwh vakhaechu lamthing paamna ong Judia mee aangkheng ing engaanseerpa;

⁶⁶amanche nae-pang i nuwting ynchii tavachiiva ta aeka aasii vokhehkho aamu vakhae aenche embarungriirna enthinjaehpa. Akhaechuve naepang taklinache Aafhuw achangbaen inche aanruwfhuwpa.

⁶⁷Johon ampa Sakharia chu ynthiing laetha inche ataklina sipka Thangnang chongjeerchu amanthangpa,

⁶⁸“Isrel ae Aafhuw Thangnang chu manpah sataruw, Aafhuw inche amee aechu ajungveerpa vokhehkho ikarpeehnii nong atupa,

⁶⁹Vokhehkho Aafhuw ameenae Devit eengkuwna inuw vakhae khaena ipirpak eekarpeeh yngkheh

⁷⁰tunanii ynthiing jaephar ae nernache Aafhuw ing ajejeer vasahchu ynjepeehsahpa,

⁷¹inuwchu ynjeehnii ae vokhehkho ymbatir vakhae ae kik taniichu ama ing ikarpeeh vaata;

⁷²vokhehkho inuw vakhae afhuw fhuwven ae ningna achongreep om aningchuwhchu amandangnii inche, vokhehkho ynthiing achonghakchu yndennii khaenache,

⁷³inuw vakhae apa Abraham ningna chongreep atu inuwzii inche

⁷⁴inuwchu eejeehnii ae kik tanii ikarpeeh naka Aafhuw chu ynchik omru ing,

⁷⁵ynthiing inche vokhehkho ichum ynthiing inche ynringseehna Aafhuw maanache anong tunii khaenava.

⁷⁶Amanche naepang nang chuve aanchungseh jaephar ynsuwh vaanta; nang ing Aafhuw lam seemnii khaena maensa vaanta,

⁷⁷Aafhuw amee ae ningnache isii kuhnii manlaenpeeh empha khaenache riirpeehva natae,

⁷⁸havi inuw vakhae Thangnang aningchuwh barungriir isa inchenva, ama ajaar inche ynthimna, vokhehkho ithii ruthaksiina ong mee vakhae ningnache amanrengnii ing,

⁷⁹amanche idae lamtingche karkhiingnii khaena, thangbaen tanii ing ije aenpeeh vaata.”

⁸⁰Chukhaenache naepangchu hakchaang nakho, laetha nakho hungruung sehsehsa, hungpirkho hungpirsa, vokhehkho Isrel ae ningna aandangmahri raentaangche lampa nache ong.