Read Moyon Naga LUK 11 Bible Online

LUK 11 - Moyon Naga bible

LUK 11

¹Nikhehna Jesu ing denkhehna athamsahpa, ama ing amanchen aanuwnache asebok yngkheh ing aningna ariir, “Aafhuw, Johon ing asebok aechu ithamnii amanchuw ae vaangche kening nakho ithamnii imanchuwsara.”

²Amana Jesu ing eningna ariir, “Nenuw ing nentham-sahrae jinge taruw: Apa, naruming ynthiing ynsuwhrasii. Naaruwngpaam thengrasii.

³Anasiirna kensahfhuw thaemin ipisar;

⁴Amanche kentaklina araar mee aechu kengkuhpeeh vaang, kentaklina isii icher vakhaechu ikuhpeehsar. Vokhehkho batheemnii tingche ibabuwsamahra.”

⁵Amana Jesu ing eningna ariir, “Nenuw nengkaarna achuw yng-kheh ing aarang ningna jaenchim nache vaknaka, ‘Kaarang tar asae yn-thumpang imanfhuwhsara,

⁶kaarang yngkheh lamkhii tanii kaningna tungna, amachu aningna kapeehfhuw ynchii tangakho deenmahsing tataniika nariir raenche,

⁷sungna ong naarang inche imanjamahra, eengkhaar kakampa vokhehkho kasiti ae thoh jaarsung; ki ing hangsuw ningka pichehmah ningchii tavaate?’

⁸Ki ing neningna atatak ing kariirnah, ama ing aarang rapkho hangsuw naka piningka tamah; changkhangnare vanuh vanuh aniihsah khaenache hangsuw naka aniih vakhaechu pivaata.

⁹Ki ing neningna kariirnah, Niihruw, neningna ipivaata; jongruw, tuwhva nenta; ichumruw, ibarangpeeh vaata.

¹⁰Akhaechuve aniihsah mee vakhae inche aphanah, amanche ajong mee vakhae inche atuwhnah vokhehkho aachum mee ningnache abarang peehnah.

¹¹Chukhaenache nengkaarna asiti ing ampa ningna nga aniih tahna nga pivachii changdenna baruwr apeeh ynvae chuwkhang;

¹²vokhehkho aarlachii aniihtahna rungmanchiih piva takhang?

¹³Chukhaenache nenuw sakmahpak khangtanuwre, nensiti ae ningna chembe isa kikthuur ipinii nemanghuw vakhaka, thangbaenna ong nenpa inche aajaehmeh aniih mee ningnache ynthiing laethachu pivaate!”

¹⁴Atii Jesu ing isamah umlae laetha ing chuwngka achong isuwhmahchu athurpeehpa; amana umlae inche taang asuwhnuw nache achong isuwh mahkha ichong achehpa; chukhaenache mee vakhaechu inempak ngiksae.

¹⁵Changlaenche mee topoh aenche umlae vakhae engaruung Beelzebul ruwreng ing umlae aechu athurcheh vatah ta aeka enriir.

¹⁶Mee areh aenchembe Jesu chu chaang en aeka thangbaen tanii buwtinnii yngkheh mandangnii khaena enriirpa.

¹⁷Changvakonchu enuw ing emandenchu ama ing amanghuwtah nache eningna ariir, “Iruwngpaam chaap vakhae asungsah nache aruwr ynniimeh suwhnave imaangniichu suwhvaata; vokhehkho eengkuw yngkheh sungna ynlehmah omnave mee derna ongna.

¹⁸Amavaange umlae ingkho ensungsahna ynlehmah ae nave, ama iruwngpaamchu ynsaangkhe paarvaata? Akhaechuve Beelzebul ajaarna umlae ae athurvatah tachuwka nenuw ing nenriirnah.

¹⁹Ki ing Beelzebul ajaarnache umlae aechu kathur vanave, nenuw nensiti aencha achuw jaarna umlae aechu athurpae chang? Chukhaenache enuw ing nentaklina vajeer aafhuw ynsuwh vaatae.

²⁰Changvakonchu Thangnang ruwreng ajaarna umlae aechu kathur vanave neningna Thangnang iruwngpaamchu ithengva.”

²¹Chukhaenache ipirpak mee inche laar tuknii peehchae ing ynthongka a-eenchu aherung tahna adeen peehchae vakhaechu maangmahsa;

²²changvakonchu achungna ipirseh mee inche vathengka achehpa, vokhehkho ama ing aangahsahnii laar tuknii peehchae chaapchu aachehpa inche siihka ensempa.

²³Achuw yngkheh kithoh ynruwhakmah meechu ki eejeehniiva, amanche kithoh kengkhuum hakmah mee chuve aanseh mee chuva.

²⁴“Isamah laetha ing mee yngkheh tanii hungsuwhka ama ing chii omah paamting bavaeka aongnii ajongpa, changvakonchu ama ing aongniichu atuwhmah tahnache, ki ing ajae kaongnii een tingkhe hunganritah kata ichii amandenpa.

²⁵Ama ing ahunganritah nache eensungchu ynriippeh ing vokhehkho isapak inche heom amupa.

²⁶Chutahnache ama ing sika achungna inempak ichamah ae reentaang isamah laetha sarii aechu henruwka ongsae. Amanache amaensa nakha athideh ing sakmahsehsa.”

²⁷Jesu ing havi ariir raenche, mee changjaeh inem kaartanii rupanuw yngkheh ing ipirpak inche uungka Jesu ningna ariir, “Nangchu ynreen ven rupum vokhehkho naethen najeennii meechu bor aphava!”

²⁸Changva-konchu Jesu ing ariir, “Amachu athiseh ing Thangnang chongzeerchu siinaka amanjii meechu inempak bor aphava!”

²⁹Mee inempak inche Jesu chu engaburpoh tahnache ama ing ichong abasenpa. “Havana suwnthar mee ae i aajaehmeh isamahpae; enuw ing ruwriimnii laetho enjongnah, changvakonchu Jona taklina isuwh khamah naka reentaang buwtinnii laetho pimahning.

³⁰Akhaechuve Jona ing Nineva mee ae ningna buwtinnii ynsuwh vaangkhe, Mee Sapa inchenkho hava suwnthar khaene buwtinnii ynsuwh vaata.

³¹Iniisuwhtah paam tanii iruwngnuw ing vajeer inii nache ataraennii suwnthar mee ae thohne hangiirhak ae naka enuwchu manraar vaatae; akhaechuve laaruw paam adongnii lamrii tanii ing Solomon alosing ennii khaena itheng; changvakonchu enruw, havane Solomon chungna iruunghak yngkheh omna.

³²Nineva mee aeng vajeer inii nache ataraennii suwnthar mee ae thohne hangiirhak ae naka manraar vaatae; akhaechuve Jona ing isa thamin atong tahna enuw ing embarungriir enghuungpa. Chukhaenache enruw, Jona chungna iruungseh yngkheh havane ogna.”

³³“Achuw ingkho Jaemi barengka thuurmahchak changmahka buruk derna siimahchak; changvakonchu mee aenche irengchu emunii inche abarengnii nache ensiihnah.

³⁴Namik inge hakchaang jaemi chuva; chukhae-nache namik barengchu chumnave, nahakchaang aangkheng rengchir vaata, changvakonchu namik barengchu chummah nave, nahakchaang chukho inempak manthim vaata.

³⁵Chu-khaenache nahakchaang irengchu amanthim niimah inche ynriimla.

³⁶Amanche nahakchaang aangkheng manthimrudeh ing isajaeh inche reng nave, jaemi ireng inche nataklina aen vaangkhe rengvaata.”

³⁷Jesu ing achong raenche Pharisi yngkheh inche Jesu chu imaarpohnii khaena athamsahpa; chukhaenache Jesu ing vakka isahnii nache vaongsa.

³⁸Jesu ing amaarphana akik achaammahchu Pharisi inche amutah nache inempak ngiksa.

³⁹Amana Jesu ing ariir, “Pharisi ae ataraene nenuw inchembe bukam jaekhi taangna nenga-taehpehnah, changvakonchu sungting chembe ynruw ynrep vokhehkho isamah ing sipnachuw.

⁴⁰Ipang ae, taang taniichu Aafhuw ama ing ynseem peehrae sungtanii chukho ynseemmah vakhang?

⁴¹Nenbukam jaekhi sungna omkha sara naeriing ae ningnache piruw, amanche enruw, nengkhaenache aangkhenglaang manthiing vaata.

⁴²Chukhaenache Pharisi ae nengkhaena ijaniisapa! Nenuw ing ipifhuw chaapchu sarup suumna yngkheh pichuwka amanche ichum re Thangnang ningsiih chuve nenbathennah; hava vakhae i nenuw tuva nenchiiting bukna, vokhehkho reentaang ae renkha bathen mahva nenchiiva.

⁴³Pharisi ae nengkhaena ijaniisapa! Nenuw ing meekongnii sungna ongnii isaseh nache ong vokhehkho kithiirna mee aenche salaam yntu nengadiknah.”

⁴⁴“Nengkhaena ijaniisapa! Nenuw i ymmuchehmah thaen thohche aanghak sachuw, ama taklinache mee ae ing manghuwmah aeka hungsi vasi entunah.”

⁴⁵Vajeer itu mee yngkheh inche Jesu ningna abasang, “Oja, hava chong i nariirtahna kenuw vakhaekho ningjak ympinahchii achii.”

⁴⁶Jesu ing aningna abasang, “Ne-nuw vajeer itusii nengkhaenakho ijaniisapa! Irik peeh chucha mee manreen chuwka, nentak incha nengkikchar rap ingkho parnungka tamahchuw.

⁴⁷Nengkhaena ijaniisapa! Amachuve nenpa aeng entheh jaephar ae thaenchu nenuw ing nentunah.

⁴⁸Chukhaenache nenuw ing asaarkhii ngiirnachuw vokhehkho nenpa aeng entu nongchu nenuw ing nenrusa, akhaechuve entakrap ing jaephar aechu enthehpa amanche nenuw ing enthaenchu nenseemnah.

⁴⁹Havi khaene Thangnang losing inche ariirsa, ‘ki ing neningna kajaephar aere kachongthang ae jebathenva kata, changlaenche enuw ing topoh ae chuve thehvaatae vokhehkho manang vaatae.’

⁵⁰Thiimkung re ynthiing min ruwrakna Abel sii ynta na ing Zakharia sii ynta phanii ing,

⁵¹laaruw paam abasenpeh raennii ing jaephar ae enthehkha, ataraennii mee ae ningne vajeer itupham suwhna.

⁵²Vajeer ituae nengkhaena ijaniisapa! Nenuw ing ising iveernii een kamnii longtingchu chither chuwka nentak rapkho varuwhmah sachuw, vokhehkho varuwh saningka achii mee ae chukho manruwh chehmah sachuw!”

⁵³Jesu ing ama denchu bathenka asitah nache thiimthang aere Pharisi ae ing Jesu achongriir nache isuwrnii khaena chuwm aeka,

⁵⁴Jesu chu ithipak ing jeehnii aeka vokhehkho emenchehnii ing reentaang chong aajaeh isii embasenpa.