Read Moyon Naga LUK 12 Bible Online

LUK 12 - Moyon Naga bible

LUK 12

¹Apha ichiinache iteennii isamah ing mee inempak yngkong-poh aeka yngkheh taklina yntaar cheehcheeh ing aomraenche, Jesu ing amaensana asebok ae ningna ariir, “Pharisi ae isachaang itu chor khaenakhe nenuw ynriimsaruw.

²Yng-khumjaeh naka yndangmah vachii yntanga omah, amanche ynghuwmah vachii ynruwh yntangakho omahnii.

³Chukhaenache nenuw ing ynthim sungna ynruwh ing nenriir chaapkha ireng nache siivataruw; vokhehkho arakiing yngkhehna nenganana nenriir chongkha een chungting ynthang vaata.”

⁴“Kaarang ae neningna ki ing kariirnah, hakchaang thehcheh naka, aanuwting ynchiikho amanruchehmah ae enuwchu chiimah aeruw.

⁵Changva-konchu nenuw ing achuwchu chiiva nenchiiva ichiichu neningna ki ing riirpeeh kachuw: Yntheh aanuwting longkong ting ynrencheh ruwreng adeenchu nenuw ing chiiruw; ki ing ichumchu neningna kariirva, atakchu chiiruw!”

⁶“Vasak runga pesa ynniimehna nenjuwrmah vakhang? Thangnang mik barengna vasak aechu yngkheh pangkho inghir omahnii.

⁷Nenrusaena sambur khakho ateenchir vasahva. Nenuw ynchik mahruw; nenuwve vasak ae ithi ing nemen inemva!”

⁸“Ki ing neningna kariirnah, mee vakhae maekungna kichu ynru meechu Mee Sapa inche Thangnang vaarmee ae maekungna ruvaata;

⁹amanche mee ae maekungna ynrumah mee vakhae chuve Thangnang vaarmee ae maekung nakho rumah aening.”

¹⁰“Amana Mee Sapa taklinache achuw yngkheh mee ing arumah ing ichongchu yngkuhpeeh vaata; changvakonchu achuw yngkheh mee ing ynthiing laetha taklina arumah ing chongnave yngkuhpeeh mahnii.”

¹¹“Amana enuw ing nenuwchu meekongnii chaapna vokhehkho aapuh ae amanche aatuaricheh chaap ae maana ynghenruw ae raenche, nenuw ing ynchiikha basangva kente tanuwna jamahruw;

¹²changlaenche ynthiing laetha ing ynchii riirva nente ichiichu imanchuw vaata.”

¹³Mee inempak kaarnache mee yngkheh inche Jesu ningna ariir, “Oja, ki ing iphapham isuwh lerchiichu isemnii khaena kaipa ningna iriirpeehra.”

¹⁴Jesu ing aningna ariir, “Kaarang, achuw ing kichu nentaklina vajeernii vokhehkho isemnii khaena pham ithinkhang?”

¹⁵Jesu ing eningna ariir, “Ynriimruw, amanche ymphaam vakhae ae tanii nentaksah yncheer saruw; laaruw mee iringniichu lerchii inem adeen nachenpang omahva.”

¹⁶Aanuwnache Jesu ing eningna ynghuwnii thamin yngkheh atong: “Achuw yngkheh savangpak mee inche apaamsah nache inempak lerchii amanla pohpa;

¹⁷amana abarungriirna ama ing amanden, ‘Lerchii isahfhuw kadeenpoh havi asiihnii apham omahsa. Ki ing ynchii tukate?’

¹⁸Havi ki ing tukata taka ataksahna ynriir, ‘Kaatom havi isehchir ningka, havi chungna iruunghak yngkheh tukata; amanche asung nache kasaang kabaar vokhehkho kapeehchae vakhae thinpoh kata.

¹⁹Amanche ki ing kalaetha ningna riirkata, kalaetha, kum aajaeh isahfhuw khaena lerchii nasiihpa; ongjaeh nana sara inla vokhehkho nungaesara!’

²⁰Changvakonchu Thangnang ing aningna ariir, ‘Ipang nang! Atanii jaen nalaetha ringkum jeriva kata; changlae nalerchii chaapkha achuwta ynsuwh vaate?’ ”

²¹Chukhaenache achuw yngkheh ing ataksah khaenapang lerchii amanghuwng meechu Thangnang maana savangmah.

²²Jesu ing asebok ae ningna ajeer, “Chukhaenache ki ing neningna kariirnah, nenringnii khaena nenuw ing ynchii savakente vokhehkho hakchaang khaena ynchii peendiir niivakente tanuwna nenbarungriir manjamahruw.

²³Isahfhuw chungna ringkum ing vokhehkho peendiir chungna hakchaang ing athurfhuw-sehna.

²⁴Phaenva vaak ae i enruw: Enuw ing ivorkho vormah ae, ikuumkho kuummah ae, amanche enuw ing itomkho, pangkho deenmah ae, changvakonchu Thangnang ing enven amamva peehsae. Chukhae-nache vaati ae thoh chembe nenuw nemen aajaehmeh ruwne!

²⁵Nenuw achuw yngkheh ing havi khaene abarungriir jaka aringkum khaapkheh amanthicheh omkhang?

²⁶Chukhaenache aasiingseh rapkho nenuw ing tuchehmah tanuwve, ynchii khaena reentaang reentaang khaena nenbarungriir nemanjava?

²⁷Riibur aeng ynsaangkhe ihangruungpae ichii mandenruw, nongkho tumah ae, itaarkho taarmah ae; chukhaenache ki ing neningna kariirnah, Solomon rap ingkho lerchii aajaeh adeen ingkhe enuw vaange ynthongmah.

²⁸Atanii lampana om fuwrchu atuknuw mi sungting ynthuvachii rapkho Thangnang ing hangjaehmeh aning mansiih nave, O thacha ivaeh ae! Aafhuw ing nenuwchu athiseh ing eerommah niikhang?”

²⁹“Chukhaenache nenuw ing ynchii savakente, vokhehkho ynchii invakente tanuwna jongmahruw, vokhehkho nenbarungriir manjamah-ruw.

³⁰Akhaechuve laaruw paamna Thangnang yndenmah mee chaap ing hava vakhae i enjongnah; amanche peeh vakhae i neningna ikaniina ichii nenpa ing amanghuwsa.

³¹Chukhaenache amaensana Thang-nang iruwngpaamchu jongruw, amana hava vakhae i neningna ipivaata.”

³²“Ynchik mahruw, isiing jao ruwr ae, neningna Thangnang ing iruwng-paam ipeehchu abarungriir ipenva.

³³Nenuw ing nendeen vakhaekha juwrnuwna amenchu sara naeriing ae ningna piaeruw; jungbaruw mahdeh vachii seerthuungchu nengkhaena seemruw; akhaechuve lamruw aeng enganeeng chehmah vokhehkho rungi ing asah chehmah, thangbaenna om lerchii chuve imaang omahva.

³⁴Akhaechuve nenlerchii aomniitah nache nenbarungriir chukho omvaata.”

³⁵“Nendiirriim chiimther nuwna vokhehkho jaemi bareng nuwna hahruw,

³⁶Aafhuw ing rakhiinii kuurva imaar tanii hunganri naka eengkhaarchu arakhuung raenche ithupak ing imongva nenchii meechu nenuw ynsuwhruw.

³⁷Aafhuw ing ajuwnglae meenae aenche hemeng ae naka enghahcheh ajenpha mee aechu bor aphapae; ki ing neningna atatak ing kariirva, Aafhuw inche endiirriim manehther naka vokhehkho isahnii khaena mangong ae naka emaarnii khaena rukuum tupeeh vaatae.

³⁸Amana Jesu ing avomaniinii apha, avomanthumnii apha nache ajungthenglae husaar ahentu ajenpha mee aechu bor aphapae!

³⁹Nenuw ing havi manghuwruw, amachuve een aafhuw inche ynchii apha nache lamruwchu thengva chiiva ichiichu manghuw nave ama ing hehah naka a-een sungtingche ruwhmah vachiiva.

⁴⁰Chukhaenache nenuwkho husaar hetunuwna heongruw; nenuw ing nemandenmah siisii apha nache Mee Sapa inche jungtheng vaata.”

⁴¹Pitar ing ariir, “Aafhuw, havana ynghuwnii thamin i kengkhae napangva changmahka mee aangkheng khaenakho nariirva?”

⁴²Jesu ing ariir, “Chunuwcha apha ichachakna eningna isahfhuw thaemin enrutumchu ipinii khaenache Aafhuw ing eensung nache paaniivachii thachafhuw om iveer rukuum itu meechu achuw vachiiva chang?

⁴³Aafhuw inche ajungthenglae havi vaange ahetu ajenpha meenae chuve bor aphava.

⁴⁴Ki ing neningna atatak ing kariirva, aafhuw inche adeensah lerchii vakhaechu aningna mansir vaata.

⁴⁵Changvakonchu meenae inche ataksah ing tanaka, ki kaafhuw juwngvachiichu abarungriir nache yntuksa tanaka meenae pasar aechu vokhehkho meenae rupanuw aechu ibin basen naka, ama ing sanaka innaka, meenae inche asuwh ae pasar rupanuw aechu safhuw infhuw naka vokhehkho juw hebaruw nave,

⁴⁶ama ing amandenmah riri inii vokhehkho amanghuwmah apha nache Aafhuw inche juwngvaata, changlaenche ahakchaangchu mongnii basuw naka tenvaata; amana thachafhuwmah ae thohche iphafhuw phahak vaata.”

⁴⁷“Aafhuw ing amandenchu manghuw naka husaar atumah vokhehkho Aafhuw ing aadik inuwzii ing ahetumah meenae chuve rumor abuw inae ing binvaata.

⁴⁸Changvakonchu Aafhuw ing amandenchu manghuwmah naka ibin matik icha nong atu meenaechu rumorbuw topoh inae ing binvaata, vokhehkho inem apeeh mee ningnache inem phakata tavaata; amanche inemhak apeeh mee ningnache inemhak niihvaata.”

⁴⁹“Laaruw paamne mi bathunii khaena ki juwngsing, amanche michu ataraene chuwhnave ki ing kaadikchu ynchiiva?

⁵⁰Ki ing baptais iraangva kachii omna; amachu achimahri raen-taang aajaehmeh kaningna ijaniiva!

⁵¹Laaruw paamne idae ipeeh ijuwngva ichii ing nemandenva? Ki ing neningna kariirnah, changmahva asiksik suwhnii sehseh khaenava.

⁵²chukhaenache atarae basen naka eengkuw sungna mee runga ongnii nakhe ynniimeh re ynthum, ynthum re ynniimeh suwhvaata.

⁵³Ampa re asapa, amanche asapa re ampa, vokhehkho amnuw re asanuw, amanche asanuw re amnuw, vokhehkho ampuw re ameenuw, amanche ameenuw re ampuw thoh asiksik suwhnii khaenava.”

⁵⁴Amana Jesu ing mee changjaeh inem ae ningnache ariir, “Nenuw ing iniisuwhtah tanii ruwrduh hungsuwh nemutahna, nenuw ing nenriirnah, khuw suwrvaata nenchiichu ichum.

⁵⁵Amanche Irip tanii sii hanglaang nave nenuw ing nenriirnah, inii inem-pak basak vaata tachuwka nenriir chumna.

⁵⁶Isachaang atu mee ae! Nenuw ing laaruw vokhehkho minvaen alaar enchuwka suwhva chiichu nenriir chehsa, changvakonchu ynchii khaena ataraennii aphachu nemanghuwcheh mahva?”

⁵⁷“Ynchii khaena ichum tunii khaenache nataksah vajeer yntumah vachii?

⁵⁸Nangchu ynrumah mee thohche vaapa ngiirniiting navak raenche, amathoh aanrunii tura. Changmahnave ama ing vajeer itumee ningting iruwnaka, vajeer itumee inche natakchu aaruung ningting imansir vaata, amanche aaruung inche natakchu kaeshum tingche ithin vaata.

⁵⁹Ki ing naningna kariirnah, nang ing akuurchiimnii seerchu napeehmahri raentaang hungsuwh rumahnii.”