Read Moyon Naga LUK 14 Bible Online

LUK 14 - Moyon Naga bible

LUK 14

¹Deennii nikheh nache Jesu ing Pharisi ae upa yngkheh een sungna imaarnii khaena athengtah nache; mee aenche Jesu chu eman-chuwmpa.

²Amana enruw, akik akhi iturpoh ina mee yngkheh heongsa,

³amana Jesu ing vajeer itumee aere Pharisi ae ningna chong asii ae, “Deennii iniine ina mee yndam aruva arumahva?”

⁴Changvakonchu enuw emfhuw mandae aeka ongsae. Amana Jesu ing inachu jebachuwka amandampa vokhehkho amangkaepa.

⁵Aanuwnache Jesu ing eningna ariir, “Achuw mee yngkheh ing siir ati changmahka afhuw inche yngkuwng sungting abukraenche Deennii inii vakhangnare jekimah vachii nengkaarna achuw ynvaenachuw?”

⁶Enuw ing achongchu basangcheh mahsae.

⁷Mee vakhae aenche isaseh ongnii engateer Jesu ing amutah nache ynghuwnii thamin ing eningna ariir,

⁸“Achuw mee yngkheh ing rakhiinii imaarna yngeen raenche, nenuw ing ynjasuwhpak ongnii isaseh nache ongmahruw, achuw ing ymmanghuwsa, nenchungna iruunghak mee ithengnii khaena eennaka ithengkho arusa;

⁹vokhehkho ama ing nangkho amakho yngeen aafhuw inche naningna huungnaka ongniikha hava mee inge ongnii rasiing tanaka iriirkho arusa, changlaenche naning ynjakthoh ynruw ing tuknungdeh tingche ong phavaanta.

¹⁰Chukhaenache mee ing yngeenlae vatheng nana akuur yntongdeh ongniiting ongla; amana chembe nangchu yngeen mee inche huungnaka naning nache, ‘O kaarang huungla, chungna ongnii isaseh tingse ihungongpeehra ita vaata.’ Amanache nangthoh onghak mee vakhae maekung nache nang ing ympahsah phavaanta.

¹¹Akhaechuve ataksah ing iruungping achii meechu ynjuursa vaata amanche ynjuursah mee inche ruungseh vaata.”

¹²Aanuwnache Jesu chu a-een mee ningna chenkho ama ing ariir, “Nang ing ziingna vakhang nakho, khurina vakhang nakho, imaarnii khaena naarang ae, nauw nanae, na-eengkuw ynsuwh ae, changmahka naveenchaang ae, vokhehkho savang fhuwraang aechu eenmah aera, achuw ing ymmanghuwsa, enuw ingkho nangchu yngeenreeh aekho arusa.

¹³Chukhae-nache mee maarfhuw kata nachii raenche sara naeriing ae, yntuursah mee ae, khibong ae, mikchu ae, enuw vakhae i eensa aera;

¹⁴amanache nang ing borchu phapeh vaanta, akhaechuve enuw ing naningna ithungcheh mahnii ae. Ynthiing mee aenche ithii tanii enghangring raenche Thangnang ing ipisa vaata.”

¹⁵Jesu thoh imaarpoh ae engkaarna mee yngkheh ing Jesu achongriirchu asiitah nache aningna ariir, “Thangnang iruwngpaamna tar isah phava chiichu alaepah sakna!”

¹⁶Amana Jesu ing manghuwcheh niivachii ynghuwnii thamin inche ariir, “Achuw yngkheh mee ing iruungpak ing imaarnii khaena mee inempak a-eenpa;

¹⁷aphachu ahenpha tahnache, ama ing a-een mee chaap ae ningna huungruw chichirsa tanaka iriirnii khaena ameenae yngkhehchu achiirpa.

¹⁸Changvakonchu ama ing a-een mee chaap aenche aanghakjaeh ing emba-sangpa. Amaensa inche aningna ki ing ruwrae yngkheh kaariisa, amachu ki ing siningka vaabuwr kata; naningsiihna kathamsahchii i irupeehsara taka ariir.

¹⁹Yngkheh inche aningna siirchar apu asae runga kaariipa, enuwchu ki ing isapae isamahpae ichii enjap kata; naningsiihna kathamsahchii i irupeehsara taka ariir.

²⁰Reentaang yngkheh inchenkho ariir, ‘Ki lung-hah kabuwhpa, itheng chehmahning achii.’ ”

²¹Meenae inche hunganrika aafhuw ningnache ariirchirpa. Amana aafhuw inche abarung isii ing ameenae ningnache ariir, “Khuwruung lamfhuw chaapna vokhehkho veen veenna ynneh ing sinana sara naeriing ae, yntuursah ae, mikchu ae, vokhehkho khibong aechu havane henruw aera.”

²²Meenae inche ariir, “Oja, nang ing nariir inuwzii ing katusah chirpa, changvakonchu ataraenkho een yntheersong ing omjaeh tahna.”

²³Amana aafhuw inche meenae ningnache ariir, “Ataraenkho lamfhuw chaap nakhe vokhehkho lamrak chiirak chaapna sinana een aera, ka-eensung asipnii vakhae ing enuwchu henruw aera.

²⁴Ki ing naningna kariirnah, ki ing ka een mee vakhae aengkhe kabuw ka en isah phamahnii ae.”

²⁵Atii mee inempak aenche Jesu thohche isihak ae; amana Jesu ing eningting vaanlehka ariir,

²⁶“Achuw yngkheh ing kaningting huungkhang nakho ampa, amnuw, arumee, asiti ae, auw anae, asar ajuwr, vokhehkho atak ynvae ing kichu aning imansiihseh mahnave kasebok ynsuwhcheh mahnii.

²⁷Achuw yngkheh ing ataksah khros reenmah naka kaanuwchu jiinave, ama meechu kasebok ynsuwhcheh mahnii.

²⁸Akhaechuve nenuw nengkaarna achuw yngkheh ing yngkaangpak een tukata achiiraenche, amaensana havi achideh phanii ing aajaehmeh ruwhvate tanaka ihiihmah niikhang?

²⁹Amachumah nave, ama ing eenchu abur mangiir naka amanchichehmah raenche aamu mee vakhae aenche maniisa ae naka,

³⁰‘Mee havi inge itucha basenka manchicheh mahsa tavaatae.’

³¹Iruwng yngkheh inche reentaang iruwng yngkheh thohche laar yntuk kata achii raenche, amathoh laar yntuk vachii mee inche mee lising somnii thoh ivathengchu ama ing mee lising suum thohche yntuwh chehva kate chehmahning ichiichu amaensana ongnaka kharmah niikhang?

³²Ama ing chehmah vachii vanave reentaang iruwng inche laar-khehna aonglae, chong aathak mee aechu vechiir naka ynchaarnii chong vamanriir vaata.

³³Amachu vaangche, achuw yngkheh nenuw nengkaar tanii mee ing adeensah aangkheng abathen chehmah mee inche kasebok ynsuwhcheh mahnii.”

³⁴“Bachii i sakna, changvakonchu bachii inche achiiniichu omah nave, athar vokheh amanchiinii omah.

³⁵Amachu ruwruw khaenakho, haar khaenakho yntanga ikanii omah; chukhaenache mee ing arennah. Isiinii aana ipaar mee chaap inche siisa rasiing.”