Read Moyon Naga LUK 15 Bible Online

LUK 15 - Moyon Naga bible

LUK 15

¹Nikhehna ree ikhuum aere isii icher aenche Jesu chongchu rungaenii khaena aningnache iva ae.

²Amana Pharisi aere thiimthang aenche ichong basen aeka enriir, “Havana mee inge isii icher aethoh thaemin asahhakpa enchii.”

³Chukhaenache Jesu ing eningna ynghuwnii thamin havi atong:

⁴“Nenuw nengkaarna achuw mee yngkheh ing jao chaama adeen sungna yngkhehchu aamoh tahna paamfhuw nache somikuw arii eekuwchu manaka, ymmohchu atuwh mahtaang aajong simah vachii achuw omkhang?

⁵Ama ing ymmohchu atuwhtah nache aangna arotha irohpak ing ahengadomsah.

⁶Ama ing a-eenchu hungtungka, aarang arupae vokhehkho aveen-chaang aechu eenka eningna ariir, ‘Kajao ymmohchu katuwhsahpa. Inuw ynrotha manrohtaruw!’

⁷Ki ing neningna kariirnah, havi vaange barungriir huungnii omah ichum mee ae somikuw arii eekuw kaarna isii icher mee yngkheh ing abarungriir ahuung khaena thangbaen nache athiseh ing rotha rohhak vaata.

⁸“Vokhehkho seersaam suum adeen rupanuw yngkheh ing asae yngkheh aamoh tahna ama ing jaemi bareng naka, a-eensungchu ruwhpeh naka atuwhmahri raentaang jongmah niikhang?

⁹Ama ing seersaam ymmoh-chu atuwhtah nache aarang arupae, aveenchaang aechu eenka ariir, ‘Kaseersaam ymmohchu katuwhsahpa. Inuw ynrotha manrohtaruw!’

¹⁰Jinge ichii ing ki ing neningna kariirnah, isii icher mee yngkheh ing abarungriir ahuung khaenache Thangnang vaarmee ae enrotha rohna.”

¹¹Aanuwnache Jesu ing ariir, “Achuw mee yngkheh ing sapa ynnii-meh adeen;

¹²asapa abutum inche ampa ningna apa, nang ing lerchii nadeen sungne ki ing phava kachii chaapchu atii kaningna ipira taka ariirpa. Chutahnache ampa inche lerchiichu asempeehpae.

¹³Apha topoh aanuwtingche asapa butum inche alerchii chaapchu khuumka yndahpak paam yngkheh tingche sisa; amana adeensah lerchii vakhaechu abathang chirpa.

¹⁴Ama ing abathangchir aanuw tingche, ama paam nache inempak isah hungtaangsa, chukhaenache ama asahfhuw hungommahsa.

¹⁵Chukhaenache ama ing sika ama paam khuw mee yngkheh ningna ongsa; amana aongnii een aafhuw inche voh aechu cheernii khaena ruwrae ting achiirpa.

¹⁶Amanache vohthen inche aven manva saningka ichii amandensah; changvakonchu achuw ingkho aningna yntangakho pimahsae.

¹⁷Chukhaenache ama ing yndensaka anumsah ing ariirsah, ‘Ki kapa ing aneeh meenae changjaeh inem aengkhe ynriijor ing ensahnah, changvakonchu ki chuve havane venchaam chiilaar ing ongning!’

¹⁸Ki hangiir ningka kapa ningting huung ningka, amana aningna jinge thamsatah kata, apa, ki ing thangbaen jeehnii ingka namaana isii katupa;

¹⁹atiive ki nasapa ping ichii iriir matik chamahsing; naneeh meenae vaang itusara.

²⁰Chukhaenache ama ing hangiirka ampa ningtingche hungkaesa. “Changvakonchu ihungkaechu laarkhehna ampa ing avemutah nache aning inempak avemansiihpa, amanche ampa inche vataenka aakorpa vokhehkho aabeeng atumpa.

²¹Changlaenche asapa inche aningna ariir, ‘Apa, ki ing thangbaen jeehnii ingka vokhehkho namaana isii katupa; atii ki nasapa ping ichii iriir matik chasamah ing.’

²²Changvakonchu ampa ing ameenae ae ningna ariir, ‘Ithupak ing isaseh peendiir kha henchinuwna maniiruw; amanche kikchii akikna jemaniiruw vokhehkho khingop kha jemaniiruw;

²³amanche imarhak siirti kha henruwnuwna thehruw, inuw samanuwka nungaetaruw;

²⁴yng-khaena ynchii imbe kasapa havi ithii tanii athar hangringva; ymmoh vasah tanii katuwhva.’ Amana enuw rotha irohpak inche nungaesae.

²⁵“Apha ichiinache asapa upa inche ruwraena ong; ama ing ahungkaetahna eenchu ahenpha phana khuwng daar baringka iraam ae huwrusachu asiipa.

²⁶Amatah nache ama ing meenae yngkhehchu eenka amachu ynchii entuva taka asii?

²⁷Meenae inche aningna abasang, ‘Nang nanaepa kha hungtungsa, chukhaenache nangpa ing nanaepachu isii ikha omrudeh ing hungtung ing aphatah nache siirti imarhak yngkheh athehpeehva.’

²⁸Amatah nache abarung sikka sungting hungruwh ningka tamahsa. Amana ampa ing hungsuwhka asapa chu amaneempa,

²⁹changvakonchu ama ing ampa ningna abasang, Enla, kum aajaeh sungna rukuum katuvachii, changpang mahka ki ing nachongriir vakhae kamanjiimah omah; changkhang nare kaarang ae thoh rotha rohniihak khaena keerti yngkheh pangkho kaningna ipimah richii.

³⁰Changvakonchu hava nasapa inge ichuwhmah rupanuw ae thoh ynruwhakka alerchii chaap vakhae bathang chirka ahunganritah nache, nang ing akhaena siirti imarhakchu nathehpeehpa!

³¹Ampa ing aningna ariir, kasapa, nang chuve kithoh anasiir onghak vamuw; amanche kaningna omchaap vakhae aangkheng i natachirva.

³²Chukhaenache rotharoh ing nungae raprap vaanchiiva, nanae havi ithii tanii hangring vaang atak i ymmoh vasahva, changvakonchu atiive yntuwhpa.’ ”