Read Moyon Naga LUK 17 Bible Online

LUK 17 - Moyon Naga bible

LUK 17

¹Jesu ing asebok ae ningna ajeer, “Isii ting bukniichu suwhrem vaata; changvakonchu isii tingche buknii abasuw aningnache ijaniisapa!

²Ama ing hava naepang ae ningne yngkhehchu isii ting babuwnii vachii changve, ariingna rungsum ynthinaka chifhuw ting iren inche akhaena saksehna.

³Chukhaenache nenuw nentaksah ynriimruw; nenguw nenae mee yngkheh ing isii tunave ichahruw, amana abarungriirchu huungnave kuhpeehruw;

⁴amanche nikhehna ama ing vasarii chak neningna isii tunaka, neningna vasariimeh vaanrinaka kabarungriir kahuungpa tanaka riirnave, kuhpeehva nenchiiva.”

⁵Sebok aenche Jesu ningna enriir, “Kenuw kenthacha i imanpir peehsara!”

⁶Jesu ing eningna ariir, “Nenuw ing enchaam muw thoh ynchim ing nenthacha omnave, nenuw ing leimachaak bur tinge, ‘Nataksah ing narajung ymphinana chifhuw tingse ymphinsara nenchiitahna nenriirchu manjiivaata.’

⁷“Nenuw nengkaarna ruwrae amanriim achuw yngkheh mee ing changmahka jao acheer nemeenae inche ruwrae tanii ahungkae tahna ithupak ing huungnana amanche imaarnii nakhe ongla tanaka aningna riirvachii achuw omnachuw?

⁸Ama changdenna aningna ki ing savakachii thoraang jetu, aanuwnache nang ing sapeh inpeh vanata tamah niikhang?

⁹Ama ing meenae ningna chong ariirchu meenae inche amanjii khaena manpahmah niikhang?

¹⁰Chu-khaenache amavaangche nenuw ing vajeer chonghak ympeeh vasah vakhaechu tuchirnuwna, ‘Kenuwve ikaniimah meenaepung; kenuw ing tuvakenchii chupang kentusah vatah taruw.’ ”

¹¹Jesu ing Jerusalem ting avakraenche, Samaria re Galili ruwrakna ivasi.

¹²Amana Jesu ing khuwsung yngkheh nache avaruwhtah nache, ynchor ing ina ae pasar suum aechu yntuwhsae. Enuw ing laarkhehna ngiir aeka

¹³vokhehkho va-uungsae, “Aafhuw Jesu! Kenuwchu naning imanchuwhsara envechii!”

¹⁴Jesu ing enuwchu ajemutahna aeche eningna ariir, “Nenuw ing sinuwna nentaksah ing jaethiim ae ningna vandangruw.” Amana enuw ensinii baram ing manthiingsae.

¹⁵Chu-tahnache enuw engkaar tanii mee yngkheh ing damsing ichii amanghuw tahna hangiirka iruur yndang ing Thangnang chu amanpahsahpa;

¹⁶vokhehkho ama ing Jesu khiderna vakhupsaka amanpahsahpa. Atak ichuve Samaria meeva.

¹⁷Amana Jesu ing aningna chong ariir, “Nenuw mee suummeh kamanthiingmah vachuwkhang? Mee eekuw ae chucha utingpae?

¹⁸Marpah mee havimah naka Thangnang chu manpahnii khaena hunganri omahpae?”

¹⁹Amana Jesu ing aningna ariir, “Hangiir nana yngkaera; nang nathacha ing ymmandampa.”

²⁰Pharisi topoh aeng Thangnang iruwngpaamchu utaraenkhe juwng-vachiiva ta aeka Jesu ningna ensii. Ama ing eningna abasang, “Thangnang iruwngpaam chuve yndang ing ijuwngmahva.

²¹Achuw yngkheh ingkho enruw havane omna, changmahka amanase omna, tamahnii ae; akhaechuve Thangnang iruwngpaamchu neningna omna.”

²²Aanuwnache Jesu ing asebok ae ningna ariir, “Mee Sapa aaniichu nenuw ing munungka takhang ta-nuwre, muhehmahva nenchii aaniichu hungsuwh vaata.

²³Amanche mee aeng nening nache enruw, amanase omna, changmahka havane omna tavaatae. Changlaenche nenuw isikho simahruw, enganuwkho jiimah aeruw.

²⁴Akhaechuve tenlungpa ing denkhehna aanlehrup tahna denkheh tingkho ireng vaangkhe, Mee Sapa inche ama aanii nache changche tavaata.

²⁵Changvakonchu ama ing amaensana ijachaam aajaeh vokhehkho suwnthar havi inge arumahchu khaangvachii ting buksa.

²⁶Noah ing apaarlae isuwh vaangkhe, Mee Sapa aanii nachenkho suwhvaata.

²⁷Noah ing ruwkuwng sungting aruwhmahri raentaang vokhehkho chii iriim ing amamaangchir mahri ae raentaang rakhiinii kuurva iriim tu aeka ong ae.

²⁸Amathohche aanghakjaeh ing Lot ing apaar laenkho isuwh; amachuve enuw ing ensah, engin, engarii, enjuwr, saangbaar emphin, vokhehkho een tu aeka ong ae;

²⁹changvakonchu Lot ing Sodom tanii ahungsuwh inii nache thangbaen tanii mi inche enuw vakhaechu maangchirsae.

³⁰Mee Sapa inche aandang inii nache havithoh aanghakjaeh vaata.”

³¹“Ama inii nache achuw yngkheh ing een phuchungting ong mee inche, eensungna apeehchae omchu jungchumsana jungrimah rasiing, vokhehkho ruwraena ong mee inche hunganrimah rasiing.

³²Lot rumee kha ynsiiruw.

³³Achuw yngkheh ing alaetha ikarnii khaena amanjong mee chuve maangvaata, changvakonchu alaetha khaena imaang acheh mee chuve karpeeh vaata.

³⁴Ki ing neningna kariirnah, ama jaen nache ijaarnii yngkhehna meenii jaarvaatae; yngkhehchu ruwvaata, amanche yngkhehchu mavaata.

³⁵Rupanuw meenii ing haachang sukvaatae; yngkhehchu ruwvaata, amanche yngkhehchu mavaata.”

³⁶(Ruwraena meenii ongvaatae; yngkhehchu ruwvaata, amanche yngkhehchu mavaata.)

³⁷Amana enuw ing Jesu ningna enriir, “Aafhuw, unava?” Jesu ing eningna ariir, “Ithii sha omnii nache laangta yngkong vaatae.”