Read Moyon Naga LUK 2 Bible Online

LUK 2 - Moyon Naga bible

LUK 2

¹Hava apha sungne laaruw paam aphamsiirna mee masing iteennii khaena Agastas Kesar ing chonghak abathenpa.

²Changlae kuirinius ing Sairia aafhuw ynsuwhka apaanii raenche masing iteen ahaarpava.

³Chukhaenache mee vakhae ing akhuw akhuwting ruming ynziihnii khaena yngkaesae.

⁴Changlaenche Josep kho Galili na om Nazaret ichii khuwruung tanii Judia na om Devit khuwruung Bethlehem iphanii ing hungkaesa; akhaechuve atak i Devit tuti taniiva;

⁵chukhaenache juwr akhuw vasah aven rupumna nae areen Meri thoh-che ruming ynziihnii khaenache hungtungsae.

⁶Enuw ing amana engongraenche naepang jungomvachii aaniichu ahenphapa.

⁷Amanche sanuw inche ahaarpa asapa yngkhehchu abaringpa vokheh-kho naepangchu peen ing iromka khutheeng nache amanjaarpa, akhaechuve eensungna entungnii apham omahsa.

⁸Changlae ama paam nache jao icheer aechu enjao cheer aeka Jaenna iriih ae.

⁹Amana Aafhuw vaarmee yngkheh ing eningnache yndangsa, vokhehkho Aafhuw alaar isa inche entaklina aenka, enuw inempak ynchiksae.

¹⁰Changlaenche vaarmee ing eningna ariir, “Nenuw ynchik mahruw! akhaechuve enruw, mee aangkheng khaena inempak rotharohnii isa chong ki ing neningna kajenreensa;

¹¹atanii iniine Devit khuwruung nache nenuw eekarpeeh Aafhuw chu jungomsa, atak i Khrista Aafhuw chuva!

¹²Chukhaenache nenuw ing nemanghuwnii khaena aandangnii chuve, nenuw ing naepangchu peen ing ynrom naka khutheeng nache ijaarchu tuwhva nenta.”

¹³Aphanache thangbaen tanii vaarmee aruwr aenche yndang aeka Thangnang chu la ing emanpah:

¹⁴“Thangnang chu yngkaangseh ing manpahtaruw vokhehkho laaruw paamna aning amanthung mee ae ningnache idae omchu ynsuwhrasiing!”

¹⁵Vaarmee aeng thangbaen ting engangri aanuwnache, jao icheer aenche yngkheh yngkheh ynriirsae, “Inuw vakhae ing Bethlehem ipha ing simanuwka Aafhuw ing ariir chongchu va-entaruw.”

¹⁶Chukhaenache enuw ing ynneh-pak ing vasiaeka, enuw ing Meri re Josep chu envatuwhpa vokhehkho naeduungchu khutheeng nache emanjaarchu emupa.

¹⁷Enuw ing emutah nache eningna ariir chong-chu engaansiipa;

¹⁸vokhehkho jao icheer aeng enriir chongchu mee vakhaeng ensiitah nache enruwriimsa.

¹⁹Changvakonchu Meri ing abarungriirna mandenka havana isuwh khaene abarungriir sungna athinjaehpa.

²⁰Jao icheer aenche eningna ariirchu ensiipa vokhehkho emu khaenache enuw ing Thangnang chu la ing manpah aeka ynrisae.

²¹Amanche inii neeriih ahungvi inuwnache vinchiip nong tuaeka ajae ven rupumna venchimah rirae vaarmee ing naepang ruming i Jesu tava nenchiiva taka ariirchu emanreenpa.

²²Mosi vajeer chonghak inuwzii ing engkhaena ynthiingnii iniichu ahenphapa. Chukhaenache enuw ing naepang chu Aafhuw ningting ipeehnii khaena enruwpa.

²³Aafhuw vajeer chonghak inuwzii ing, “Ahaarpa abaring sapa vakhaechu Aafhuw ningting pivachiipae,

²⁴vokhehkho Aafhuw vajeer chonghak inuwzii ing vathuw ruwbuwkheh, changmahka khunu iduung ruwbuwkhehchu chaatha ing ipeehnii khaena vaksae.”

²⁵Changlaenche aruming Simion ichii mee yngkheh Jerusalem nache ong, ama mee inge Isrel mee ae barung ngamnii emphamahri raen-taang ichum ynthiing ing ahahsah vokhehkho Thangnang chu icheepjaeh ing amanden ama ataklinache laetha ynthiing ing hesip.

²⁶Chukhaenache laetha ynthiing ing aningna ajeer chuve, Thangnang sapa Khrista chu namumahri raentaang nang ithii mumahtanii.

²⁷Chutahnache laetha ynthiing ing ongniika rumniieen tingche varuwhsa amanche ama ing vajeer chonghak inuwzii ing naepang khaene nong itupeehnii khaena ampa re amnuw inche naepang Jesu chu aningting envepeehpa,

²⁸ama ing naepangchu vedomka Thangnang chu manpahka ariir:

²⁹“Aafhuw nang ing najeer chongreep inuwzii ing, atiive Aafhuw nang ing idaejaeh ing ymbathenpachii,

³⁰mee vakhae kaarnache nang ing thoraang yntupeehchii

³¹manlaenpeeh phaniichu kamikrap ing kamusahpa,

³²reentaang mee ae ningnache irengchu amandangnii khaena Isrel namee ae nache nalaar isachu najenreenpa.”

³³Havi khaene naeduung ampa re amnuw aenche ama chongchu ensiitahna inempak enruwriimsa;

³⁴Simion inche enuwchu bor piaeka Aafhuw amnuw Meri ningnache ariir, “Enla, naepang havi Isrel sungna maangnii vachii vokhehkho mee aanem karnii khaena Thangnang ing aateerva. Atak i mee ae ing enrumah buwtinnii Thangnang taniichu ynsuwh vaata;

³⁵amanche embarungriir sungtaniichu mandang vaata. Amana nabarungriirna ijachaam laangchem yngeepak ing ynsinvaang tavaata.”

³⁶Aser sungkhur tanii phanuel ichii sanuw aruming Anna ichii jaepharnuw om; (ama afhuwsar thohche kum sarii pang paarhak aeka

³⁷aanuwnache kum sommiriih arii manrii ipha ing muwkhuwnuw ing ong.) Ama ing siim jaen maaru atongthoh ynruw ing thamsaka rumniieenchu bathen samah.

³⁸Aphanache Jerusalem ting hangka Thangnang chu amanpah vokhehkho eekarpeeh Aafhuw khaenache ahah ae Jerusalem na ong mee ae ningnache inempak ichong.

³⁹Enuw ing Thangnang chonghak inuwzii ing nongruw vakhaechu manchichir aeka engongnii Galili khuwruung Nazaret tingche yng-kaesae.

⁴⁰Naepang Jesu chu hungruungka vokhehkho inempak hungpirsa, iveerkho hungveersa; amanche Thangnang tungsiih ajaarchu ataklinache omsa.

⁴¹Atii ampa amnuw aenche kum kumna manlaennii kuurva entuchaknii Jerusalem tingche isichak ae.

⁴²Jesu inche kum suum ariinii ahenpha-raenche enuw ing isichak ae vaangkhe kuurva aanvaenii khaenache vasisae;

⁴³kuurvachu achinuw tingche enuw ing enghunganri tahnache, naepang inche Jerusalem nache ongsa. Amachu ampa re amnuw inche manghuwmahsae.

⁴⁴Enuw ing emanden chuve naepang havi aarang ae kaarna ynvae varom ta aeka inii nikheh entheh lam sisae, changlaenche enuw ing ensung-khur engaanghuwfhuw ae kaarna ynvaenamo ta aeka enjongtah nache tuwhmahsae;

⁴⁵chukhaenache enuw ing Jerusalem ipha ing siaeka envajongpa.

⁴⁶Amanche Jesu chu inii nithum aanuwting rumniieen nache Jehudi ae aanchuw mee ae kaarna ongka enchong arungae, vokhehkho eningna chong hungsii vesiika ong ing entuwhpa.

⁴⁷Ama ing ising iveerpak ing abasang chongchu asii vakhae mee aenche ngiksae.

⁴⁸Ampa re amnuw aenche atakchu emutah nache inempak ngik aeka amana amnuw inche aningna ariir, “Kasiti, nang ing kenuwchu jinge manchiichii i yngkhaenava? Enla, nangpa thoh kenuw ing kenvajong vachii.”

⁴⁹Amana Jesu ing eningna ariir, “Nenuw ing kichu ynchii khaena ynjong vachuw? Ki kapa eennache ongva kachiiva ichii nenuw nemanghuw mahva?”

⁵⁰Ama ing eningna ariir chongchu enuw ing manghuwchehmah ae.

⁵¹Amana enuw thohche Nazaret tingche yngkae aeka amanche en-chongriir dernache ongsa; hava vakhae i amnuw inchembe abarungriir sungna icheep ing athinjaehpa.

⁵²Jesu inche losing nakho, hakchaang nakho, Thangnang vokhehkho mee ae ajaarnache hungruung sehsehsa.