Read Moyon Naga LUK 20 Bible Online

LUK 20 - Moyon Naga bible

LUK 20

¹Inii nikhehna Jesu ing rumniieen nache mee aechu manchuwka isa chong atonglae, aanchung jaethiim aere thiimthang aenche upa ae thoh Jesu ningna vatheng aeka

²aningna enriir, “Keningna riirla, nang ynchii aatuaricheh ing hava vakhae i natuva? Achuw ing nangchu havana aatuaricheh i ympeehva?”

³Jesu ing eningna abasang, “Ki ingkho neningna chong yngkheh siikachuw; kaningna riirruw,

⁴Johon ing baptais atukha thangbaen taniiva changmahka meening taniiva?”

⁵Enuw enareersahna inuw ing ynchii riirtaruw ynta aeka enriir, “Inuw ing thangbaen taniiva tamanuwve, ama ing tavaata, chunuwcha nenuw ing yngkhaena nenthacha mahva?

⁶Changvakonchu inuw ing meening taniiva tamanuwve, mee vakhae inge rung ing ideeng vaatae; akhaechuve enuw ing Johon chu Thangnang tanii jaephar meeva ta aeka enthacha.”

⁷Chukhaenache enuw ing utaniiva manghumah ung ta aeka embasang.

⁸Jesu ing eningna ariir, “Ynchii aatuaricheh inche hava vakhae i katuva ichiichu ki ingkho neningna riirmahning.”

⁹Jesu ing mee vakhaenache yng-huwnii thamin ing ichong abasenpa: “Pasar yngkheh ing vomrip bir yngkheh tuka ama ing mee ae ningnache saarka reentaang paam yngkheh ting apha iseehpak ing sisa.”

¹⁰Aphachu ahenpha tahnache, asaar mee ae ningtanii vomrip aanlachu iphanii khaena ameenae yngkhehchu eningting ajechiirpa; changvakonchu asaar mee aenche atakchu hebin aeka aruwhnaen ing emangkaepa.

¹¹Chu-khaenache ama ing athar reentaang meenae yngkhehchu ajechiir pareeh; ama chukho enuw ing hebin aeka vokhehkho ningjak piaeka aruwhnaen ing emangkaepa.

¹²Aanuwnache ama ing avomanthumnii meenaechu athar ajechiirpa, ama chukho enuw ing mansuh aeka arenpae.

¹³Chu-khaenache vomrip bir aatupa inche ariir, “Ki ing ynchii tuva kachiiva? Ki ing kasapa kaning kamansiihpak i chiirtah kata; amana chembe enuw ing kichu eeja aekho arusa.”

¹⁴Changvakonchu asaar mee aenche atakchu emutah nache yngkheh yngkheh chong manseer aeka enriir, “Haviva ruw kuumvachii meechu; inuw ing atak i thehtaruw, amana chembe ama ing ruw kuumva chiichu ynta ynsuwh vaata.

¹⁵Amatah nache enuw ing atakchu vomrip bir tanii taangting kiaeka enthehpa. Chukhaenache vomrip bir aafhuw inche entaklina ynchii tuvaata?”

¹⁶“Ama ing thengnaka asaar mee aechu mamaangchir vaatae, amana vomrip birchu reentaang ae ningting pivaata.” Amachu mee aenche ensiitah nache, enuw ing enriir, Changche suwhremmah rasii!

¹⁷Amana Jesu ing enuwchu enka ariir, “Changvaniive ynziihka om icha ynchiiva: ‘Een itu aeng enrimah rung amachurap inche athurfhuwrungchu ynsuwhsa?’

¹⁸Hava rung takline ynruum mee vakhaechu arehkheh kheh ing kiivaata, changvakonchu hava rung inge ataklina ibuw mee chuve pirkhuwh vaangkhe jimvaata.”

¹⁹Apha changlaen siimche thiim-thang aere aanchung jaethiim aenche Jesu chu akik narap bachuw nungka suwrkenta ta aeka emanjong, changvakonchu enuw ing mee aechu enchiipa; akhaechuve Jesu ing entaklina ynghuwnii thamin ariirchu enuw ing emanghuwpa.

²⁰Chukhae-nache enuw ing Jesu chu chuwm aeka achong nache suwrnungka aatuaricheh lipah aapuh ningting vokhehkho vajeer atu iruwng ningna ipeehnii khaenache, ichum asa ae chong aathak aechu embathenpa.

²¹Chong aathak mee aenche Jesu ningna ensii, “Oja, nang ing ichum ing chongsiika ymmanchuw sachii vokhehkho adongchang kho tumahchii, changvakonchu Thangnang lam ichumchu atatak ing ynriirpeeh sachii ichii kenuw ing kemanghuwsa.

²²Kesar ting ree ipeeh inge vajeer kiine kiimah?”

²³Changvakonchu enuw ing Jesu ningna losing ynlak aechu ama ing manghuwka eningna ariir,

²⁴“Kaningna dinari yngkheh imansiiruw. Havane achuw rusae re ruming omna?” Enuw ing Kesar ta aeka embasang.

²⁵Jesu ing eningna ariir, “Changva-niive, Kesar ta ynsuwhchu Kesar ting piruw, amanche Thangnang ta ynsuwhchu Thangnang ting piruw.”

²⁶Mee changjaeh maana Jesu achong nache isuwr chehmahsae; akhaechuve enchong abasang nache enruwriimka huwdaejaeh ing ongsae.

²⁷Havi aanuwna ithii ihangring omah enchii Saduki topoh aeng Jesu ningna theng aeka ensii,

²⁸“Oja, Mosi ing kengkhaena ymbaziih peehsa, amachuve achuw yngkheh mee ing lunghah buwhnaka siti baringru ing thiknave, athar ama anaepa ing rupanuwchu buwhnaka aipa khaena siti deenva chiiva achiisa.

²⁹Atii apha vokhehna unae sarii om ae; upa inche lunghah buwhka siti deenru ing thiksa,

³⁰avomaniinii inchenkho, avomanthumnii inchenkho rupanuwchu abuwhpa;

³¹enuw sarii aenche siti deenrudeh ing thikchirsae,

³²amanche akuurchiimna rupanuw chukho thiksa.

³³Atii changvaniive nuwting enghangring raenche achuw rumee ynsuwh vachiiva? Akhaechuve pasar mee sarii aenge embuwhpa.”

³⁴Jesu ing eningna abasang, “Rakhii inii ive laaruw paamne iring mee ae khaena vatah,

³⁵changvakonchu ithii tanii hangringva enchii matik icha aenche thangbaen ting engkar raenche, enuw ing amanache rakhii inii chaechang tumah ae.

³⁶Enuw athar thikchehmah ae; akhaechuve enuw vaarmee ae thoh aanghaksae vokhehkho Thangnang siti ynsuwhsae, yngkhaena ynchii imbe enuw ithii tanii hangringsae.

³⁷Mosi ingkho ithii ae hangringnae ichiichu ama ing lampa thing iphangna mi ichuwh thamin nakhe ama ing Aafhuw chu Abraham Thangnang vokhehkho Isak Thangnang amanche Jakop Thangnang taka amandangpa.

³⁸Chukhaenache atak i ithii ae Thangnang mahva, changvakonchu iring Thangnang va; akhaechuve aningnache aangkhenglaang ringna.”

³⁹Amana thiimthang topoh aeng ihangchong ae, “Oja, isapak ing nariirsa!”

⁴⁰Akhaechuve enuw ing athar vokheh aningna chong siicheh mahsae.

⁴¹Changvakonchu Jesu ing eningna ariir, “Khrista chu Devit sapa ta aeka enuw ing ynsaangkhe ariirpae?

⁴²Havi yngkhaenava ynchii imbe Devit atakrap ing ympahnii ynthiing la thiimziihna ariirsa, ‘Aafhuw ing ki kaafhuw ningna ariir:

⁴³Nang eejeehnii aechu nakhi chuwngnii kabasuwmahri ae raentaang katachangne ongla.’

⁴⁴Devit ing Aafhuw taka a-eensa, amachu ynsaangkhe asapa vachiiva?”

⁴⁵Mee vakhae ing aningna enrungae raenche Jesu ing asebok ae ningna ariir,

⁴⁶“Thiimthang ae ynsuwr peen niiaeka ynlen nungka enchii, amanche mee inem aangkongniina mee ing salaam itu, amanche meekongnii chaapna vokhehkho kuurvana ongnii isaseh nache ong engadik ae,

⁴⁷muwkhuwnuw ae een ensiih ae, amanche apha iseehpak ing enthamsah vaang entu enuw tanii nenuw ynriimsaruw. Enuw inge iruungseh miraar phavaatae.”