Read Moyon Naga LUK 23 Bible Online

LUK 23 - Moyon Naga bible

LUK 23

¹Mee vakhae aenche hangiir aeka, Jesu chu Pilaat ningting enruwpa.

²Enuw ing Jesu chu miraar piaeka enriir, “Hava pasar inge kemee chaap vakhae ningna Kesar ningting ree ipeeh rumahka ichummah ting aruwnah, amanche ataksah ingkho Khrista iruwng chuping taka ariirchu kenuw ing ataklina kentuwhpa.”

³Pilaat ing Jesu chu chong asii, “Nang Jehudi ae iruwng vachii?” Jesu ing abasang, “Nang ing nariirpa.”

⁴Amana Pilaat ing aanchung jaethiim aere mee changjaeh inem ae ningnache ariir, “Ki ing hava mee takline amiraar ynchiikho tuwhmah ing.”

⁵Changvakonchu enuw ing aacheh yngen aeka ithipak ing enriir, “Ama ing Galili na ing havi ipha inge, Judia mee vakhae ningna manchuwka iraang abasuwhniinah.”

⁶Ama chongchu Pilaat ing asiitah nache mee havi Galili taniiva taka arudehpa.

⁷Ama ing Jesu i Herot ing apuh paam derna ong meeva ichii amanghuw tahnache, Herot ning-ting ajebathenpa.

⁸Herot inche Jesu chu amutah nache inempak arotha rohsa, ama ing Jesu khaena chong asii khaenache apha iseehpak ing muningka achii, vokhehkho Jesu ing ruwriimnii laetho tunaka mukata ichii ing amanden.

⁹Chukhaenache ama ing Jesu ningna chong inempak asii; changvakonchu Jesu ing aningna ynchiikho basang mahsa.

¹⁰Changlaenche aanchung jaethiim aere thiimthang aenche Jesu taklina ichummah chong aajaeh riir aeka ingiir ae.

¹¹Amana Herot vokhehkho alaarchang aenche Jesu chu juum aeka emaniisahpa, vokhehkho iruwng peen manvi aeka athar Pilaat ningting enghenbripa.

¹²Ama inii nache Herot re Pilaat ynchaarsae; ajae enuw meenii i yngensiimah aeka yngharpae.

¹³Pilaat ing aanchung jaethiim aere upa vakhae ae vokhehkho mee aechu eenka

¹⁴eningna ariir, “Hava mee inge ichummah tingche mee aechu aruwnah tachuwka kaningting nenghenruwpa. Ki ing nemaekungna chong kasiitahna, nenuw ing nenriir chong inuwzii ingkhe mee havi takline amiraar yntanga tuwhmah ing;

¹⁵amanche Herot ingkho tuwhmahsa; chukhaenache Herot ing kaningting athar ahenbripa. Enruw, ithii phavachii nong ama ing yntangakho tumahsa.

¹⁶Chukhaenache ama i ki ing ichah ningka bathenva kata.”

¹⁷Akhaechuve havana kuurva sungne eningna Pilaat ing mee yngkheh ipimah arumahva.

¹⁸Changvakonchu enuw vakhae inche iruur yngkhehpang ing uung aeka enriir, “Hava mee i jenbasuw nana, kengkhaena Barabas kha bathenla.”

¹⁹(Barabas inge khuwruung sungna iraang basuwka vokhehkho mee atheh khaena kaeshum sungna ynsiihva.)

²⁰Pilaat ing Jesu chu bathen ningka achiitah nache athar eningna ariirpareeh.

²¹Changvakonchu enuw ing athar uunglap uung aeka enriir, “Khros taklina jamla, khros taklina jamla.”

²²Pilaat ing vathumchak ipha ing eningna ariir, “Ynchii khaenava, mee havi inge isamah ynchii tukhang? Ama ithehnii khaena ki ing amiraar yntangkho tuwhmah ing; chukhaenache ama i ichah ningka bathenva kata.”

²³Changvakonchu enuw ing Jesu chu ijamnii khaena uunglap uung aeka amana enuw inche enchehpa.

²⁴Chukhaenache enuw ing eniihsah inuwzii ing emandenchu itunii khaena Pilaat ing chong apeehpa.

²⁵Amana iraang basuwka vokhehkho mee atheh kaeshum sungna asiihchu bathenla ta aeka enriir inuwzii ing amachu bathenka amanche Jesu chuve enuw ing emanden inuwzii ing eningting apeehpa.

²⁶Atii laarchang aenche Jesu chu enghenruw raenche Sairene paam tanii ivatheng Simon chu kiteeh aeka, amanche khros chu atuknung ting amandom hakpae.

²⁷Mee inempak inche aanuw henjii aeka vokhehkho embarung ichum aeka ijachaampak ing ichapsah ae rupanuw ae ingkho Jesu aanuwchu ajiisah ae.

²⁸Amana Jesu ing vaanlehka eningna ariir, “Jerusalem sanuw ae, ki kakhaena ichappeeh mahruw, nenuw nentaksah khaena vokhehkho nensiti ae khaena chapruw.

²⁹Enruw, siti abaringmah miknii mahri ae, vokheh-kho nithen apeehmahri ae enuw aechu bor aphapae ta ae naka riirva enchii inii tha aphachu ahenphava!

³⁰Changlaenche lamthing bung ae tingche kenuw kentaklina ibukpeehra amanche lamthing bukhoh ae tingche kenuwchu ibaruwsara ta ae naka enuw ing ichong basen vaatae.

³¹Akhaechuve enuw ing er thing takline havana nong ae i entu vanave, ichong taklina chencha ynchii suwhvaate?

³²Isamah nongtu meenii ae chukho Jesu thoh itheh haknii khaenache enruwpa.

³³Enuw ing Rukang ichii minchu enghungtung tahnache, enuw ing isamah nongtu meeniimeh aechu Jesu thohche yngkheh ing atachang ting amanche yngkheh ing atari ting khros na jopi hen aeka enjampae.

³⁴Amana Jesu ing ariir, “Apa, enuw i kuhpeeh aera; enuw ing ynchii kentuva ichii emanghuwsah mahva.” Amana enuw ing Jesu peendiirchu sen aeka enlaepah engabuwrniipa.

³⁵Changlae mee aenche ngiir aeka engen, changvakonchu Jehudi aapuh upa vakhae aeng chembe enerku hungthep vethep aeka, vokhehkho maniisa aeka enriir, “Ama ing mee aechu akarpeehva; atak i Thangnang ing aateer Khrista chu vanave, ataksah ing yngkarsa rasiing.”

³⁶Laarchang mee aengkho Jesu abuumting vak aeka amen iraecharii ithuwrchii empeeh thoh ynruw ing maniisa aeka enriir,

³⁷“Nang Jehudi ae iruwng vataniive, nataksah yngkarsara.”

³⁸Jesu Khrista aruwchung nache havana chongtiim i ynziihka om: “Havi Jehudi ae iruwngva.”

³⁹Khros taklina meeniimeh enjam yngkheh ing Jesu ningnache ithipak ing chongka ariir, “Nang Khrista chumah vachiikhang? Natak sahkho yngkar nana amanche kenuw chukho ikarla.”

⁴⁰Changvakonchu yngkheh inchembe rukuhka ariir, “Nang Thang-nang nachiimahva? Nang amathoh aanghakjaeh ing phava nachiichu naphava.

⁴¹Inuw chuve ichumchak ing iphapham isuwh ymphava; akhaechuve inuw ing yntu ynrisah inuwzii ing ymphava; changvakonchu ama ive isamah tangmah yngkheh pangkho tumah.”

⁴²Amana Jesu ningna ama ing ariir, “Jesu, Iruwng ing napaar raenche kichu eensiisaro achii.”

⁴³Jesu ing aningna ariir, “Ki ing naningna kariirnah, atanii nang ki thoh Paradais nache onghak vaata.”

⁴⁴Changlaenche aphachu kuruk ita, amanche inii irengchu apha eekuw atakmahri raentaangche duwrpohka paam aangkheng manthimpohsa;

⁴⁵vokhehkho Rumniieen sungna laedenpeen chukho achimbangna ynsiihsa.

⁴⁶Amana Jesu ing ipirpak ing uungka ariir, “Apa, nakiklina kalaetha i kamansirsahnahchii!”

⁴⁷Changlaenche laarchang mee chaama aapuh inche amachu amutahna Thangnang manpahka ariir, “Atatak ing mee havi ynthiing ichum mee varae.”

⁴⁸Havi aanbuwr mee inempak itheng aenche isuwh vakhaechu emutahna, embarung ichum aeka yngkaesae.

⁴⁹Amanche aanghuwfhuw vakhae aenche vokhehkho Galili tanii Jesu aanuw ajii vakhae rupanuw aenche laarkhehna ngiir aeka isuwh vakhaechu emupa.

⁵⁰Atii Josep ichii aanchungpuh ae kaarna ynvae ichum itu mee yngkheh pasar om,

⁵¹atak i enuw ing entu enri nongchaap arumah Jehudi ae khuwruung Arimathia tanii itheng Thangnang iruwngpaam ahah mee yngkhehva.

⁵²Hava pasar inge Pilaat ningting vakka Jesu ahakchaang avaniihpa.

⁵³Amana Jesu hakchaangchu ama ing basumka amanche ynnaarjaeh peen ing iromka achuwkho endimniimahri rungkuw thaen nache Jesu chu asiihpa.

⁵⁴Ama iniichu Thoraang itu Iniiva vokhehkho Deennii iniichu abasennii ahenphava.

⁵⁵Jesu ing anruwfhuwchak ae Galili tanii rupanuw aeng aanuwchu jiiaeka Jesu athaen vokhehkho ahakchaangchu ynsaangkhe asiihse ichiichu engen;

⁵⁶amana enuw ing hunganri aeka abarim isapak vokhehkho yntaehfhuw richiithou embathongpa. Deennii inii nachembe vajeer chonghak inuwzii ing enuw ongsae.