Read Moyon Naga LUK 24 Bible Online

LUK 24 - Moyon Naga bible

LUK 24

¹Aafhuwnii ziing imaenphik nache rupanuw aenche embathongsah barim ningsiihnii yntaehfhuw chiaeka thaenkung ipha ing vaksae.

²Changvakonchu enuw ing thaen kamnii rungchu ymmong vasah ing envephapa,

³enuw ing asungting envaruwhtah nache ahakchaangchu tuwhmahsae.

⁴Chukhaenache enuw ing utingva ta aeka embarungriirna fhuwm abavae raenche enruw, ivaarjaeh peen enii pasar meeniimeh embuumna vangiirsae;

⁵amana enuw ing engaanchik lamher ing ruwruwting engkhuptah nache pasar meeniimeh aenche eningna enriir, “Ithii ae kaartanii ihangringchu nenuw ing ynchii khaena nenjongva?

⁶Jesu ing Galili na aonglae neningna ajeer chongkha yndenruw:

⁷Mee Sapa chu isii icher mee ae kik charnaka khros na thehvaatae, amanche inii avomanthumnii nache hangring vaata taka ariir vasahva.”

⁸Amana enuw ing changlaennii chongjeerchu engaansiipa,

⁹chutah-nache enuw ing thaenkung tanii hunganri aeka mee suum arii yngkheh ae ningna vokhehkho reentaang ae ningnakho enriirpa.

¹⁰Enuw ae chuve, Meri Magadalen re Johana, amanche Jakop amnuw Meri, enuw ynthummeh ipae; enuw thoh ynruwpoh ae rupanuw aengkho achongthang ae ningnache ariirpae;

¹¹changvakonchu enuw enchongchu ikaanii mahva ichii ing manden aeka, enuw ing thacha mahsae.

¹²Changvakonchu Pitar inchembe hangiirka thaenkung phanii ing vataensa, ama ing kiimka thaenchu aabuwrtah nache, limon peen chupang amupa; chutah nache ama aruwriimka eenting hunganrisa.

¹³Ama iniirem nache enuw engkaar tanii meeniimeh inche Jerusalem na ing meil sarii yndah Emmos khuw phanii inche isiae,

¹⁴amana enuw ing isuwh vasah thaminchu entonghak.

¹⁵Enuw ing yngkheh yngkheh chong ynsii aeka emanseer raenche, Jesu ing hempha aeka enuw thohche sihaksae.

¹⁶Changvakonchu enuw ing Jesu chu mukhang ae nare manghuwcheh mahsae.

¹⁷Amana Jesu ing eningna ariir, “Nenuw nensinii baram ing yngkheh yngkheh chong nemanseer i ynchiiva?” Amana enuw ening idimpak inche ngiirsae.

¹⁸Changlaenche Kliopas ichii mee yngkheh inche Jesu chu abasangpa, “Ataraensiim Jerusalem na isuwh vakhae i namanghuwmah lamkhii tanii ivasipeh mee vachii?”

¹⁹Jesu ing eningna asii ae, “ynchii isuwhva?” Enuw ing aningna enriir, “Thang-nang re mee vakhae maanache nongna vokhehkho chongna ruwreng ipirpak aningna om jaephar Nazaret Jesu khaenava,

²⁰amanche atakchu aanchung jaethiim aere lipah aapuh aeng ynsaangkhe Jesu chu ithiinii miraar piaeka khros taklina enthehva ichii khaena chenva.

²¹Changvakonchu kenuw inchembe Isrel jaatichu karvachii meeva ta ungka kemandensahva. Chumna hava nong vakhae takline asuwhnii i ataniinii inge inii nithum ahenphava.

²²Amanche kenuw kengkaar tanii rupanuw topoh aengkho thaenkung ting imaen ing vak aeka kenruw amanriimpae;

²³vokhehkho enuw ing Jesu ahakchaangchu entuwhmahtah nache, Jesu chuve hangringsa ichii chong enriir vaarmee aechu emik ruvaamna emu ing enriir ae.

²⁴Kenuw thoh ynruwpohchak ung achuw yngkheh aenche thaenkung tingche vak aeka amana rupanuw aeng enriir vaangche envamupa, changvakonchu Jesu chuve mumahsae.”

²⁵Amana Jesu ing ariir, “Ipang mee ae, Thangnang jaephar aeng enriir vakhaechu nenbarungriirna thacha itap mee ae!

²⁶Khrista inche ijachaam khaangnaka ama alaar isa tingche hungruwhrem vachiimah vakhang?”

²⁷Amana Mosi na ing jaephar chaap ae phana ing basenka Jesu ataksah khaena ynthiing thiimziih chaapna ynthin vakhaechu ynchii achiiniiva ichiichu eningna ariirpeehpae.

²⁸Chukhaenache enuw ing envasinii khuwchu envepha phanache, Jesu ing yndahseh ting sivachii pangeng ichii ing atupa,

²⁹amana enuw ing enriir, “Atii khuri jungvisa vokhehkho hungmanthimsa. Chukhaenache kenuw thoh cheenghak taruw ta aeka engkhaam.” Amatah nache ama ing enuw thohche cheenghaksa.

³⁰Ama ing enuw thohche isahhaknii khaena ongka, tarchu verika bor apeehpa; amana tarchu bakhiika eningnache ajepeehpae.

³¹Changlaenche emikchu ymmongka enuw ing atakchu emanghuwpa, changvakonchu ening-tanii ama yndangmahsa.

³²Enuw ing enareerna enriir, “Ama ing lamna chong ibuwhka ynthiing thiimziih ynriirpeeh raenkhe ymbarungriir sungna mi ichuwngvaang tamahkhang?”

³³Chutahnache enuw ing hangiir aeka Jerusalem ting ynrisae, amanche enuw ing sebok suum arii yngkheh ae thohre reentaang areh mee ae yntuwhfhuw aeka

³⁴vokhehkho enriir, “Aafhuw kha hangring tataksa! Ama ing Simon ningna yndangsa!”

³⁵Meenii aenche lamna ensirae isuwh vokhehkho ama ing tar abakhiirae emanghuw chehchu eningnache enriirpa.

³⁶Meeniimeh aenche havi eningna enriir raenche, Jesu ing engkaar nache vangiirka eningna ariir, “Idaechu neningna omrasiing.”

³⁷Changvakonchu enuw ing lae kemu varammuw ta aeka ynchiksae.

³⁸Amana eningna ama ing ariir, “Ynchii khaena nenuw ynchik vachuw? Ynchii khaena nenbarungriirna nen-chingniiva?

³⁹Enruw kakik kakhi ae i, ki remping. Ipar nuwna enruw; lae chuve hakchaang re ruw aningna omah, nenuw ing muchehva nenta ki chuve omna.

⁴⁰Havi riirka ama ing eningnache akik re akhichu amansiipae.

⁴¹Enuw enrotha iroh re ingik aethoh thachacheh mahsae; chukhaenache ama ing eningna asiipae, “Nenuw hane isahfhuw nendeense?”

⁴²Enuw ing iminvasah nga arekhehchu enjepeehpa,

⁴³Ama ing verika emaekung nache asahpa.

⁴⁴Aanuwnache ama ing eningna ariir, “Haviva ki ing nenuw thoh kaonglae neningna kariir chong vakhaekha; Mosi vajeer chonghak na vokhehkho Jaephar aeng amanche ympahnii la nache kakhaena ynziih vakhaechu ahungchumnii chuva.”

⁴⁵Changlaenche ama ing ynthiing thiimziihchu emanghuw chehnii inche envakhar aamongpa,

⁴⁶amana eningna ariir, “Haviva ynziihka omchu: Khrista inche ijachaam phanaka, animanthumnii nache ithii tanii hangring vaata.

⁴⁷Amana barungriir huungnii re isiicher kuhniichu aruming nache Jerusalem na basen naka Jaat aangkhengna yntong vaata.

⁴⁸Nenuw ing nemu vakhae havi apham aangkhengna riirva nenchiiva.

⁴⁹Enruw, kapa ing chongreep atuchu, ki ing neningna jenbathen vakata; changvakonchu nenuw ing chungtanii ruwrengchu nengaraang mahtaang khuwruung nache hahjaehruw.”

⁵⁰Aanuwnache ama ing enuwchu Bethani phanii ing aruwpae, amana akik ithohka ama ing enuwchu bor apeehpae.

⁵¹Ama ing enuwchu bor apeehraenche, enuwchu bathenka vokhehkho thangbaen ting atakchu ajekipa.

⁵²Amana enuw ing inempak enrotha iroh ing Jerusalem ting ynrisae,

⁵³amanache enuw ing ympehrudeh ing rumniieen nache Thangnang emanpah.