Read Moyon Naga LUK 9 Bible Online

LUK 9 - Moyon Naga bible

LUK 9

¹Jesu ing sebok suum ariinii aechu eenka amanche eningnache umlae ae thurnii vokhehkho laena aajaehchu amandamnii ruwreng re aatuarichehnii apeehpae,

²vokhehkho Thangnang iruwngpaam chukho itongnii khaena amanche ina aechu yndampeehnii khaena achiirpae.

³Amana Jesu ing eningna ariir chuve, “Lamkhii khaena rumor, thuungfhuw, isahfhuw tar, seer yntanga reenmahruw, amanche rungopkho ynnii yngkhii ing reenmahruw.

⁴Nenuw ing nenvatung niitah een nache ongnuwna amanache basen nuwna siruw.

⁵Achuw yngkheh ing nenuwchu ihebariimmah ae nave ama khuwruungchu nenuw ing bathenruw, amanche nemah phana nenrumahchu asaarkhii omnii khaena suwngkung nache nengkhina ikah pirkhuwhchu rukhuungruw.”

⁶Aanuw nache enuw ing siaeka aphamsiirna isa thaminchu tong aeka vokhehkho khuw khuwna ruwh aeka amanche ina mee aechu amandampae.

⁷Herot iruwng ing havana chong vakhae i asiitah nache inempak aning-kiisa, isivasahna Johon ithii pasar kha achuw yngkheh aeng hangring reehsa enchii.

⁸Mee topoh aenche Elija va ta aeka enriirpa, amanche achuw yngkheh aenche tunanii Thangnang jaephar ae kaartanii yngkheh hangringva enchii.

⁹Changvakonchu Herot ing ki ing Johon rusae katenpa; changvakonchu ki ing kasii mee havi achuw vaate taka ariir.

¹⁰Atii chongthang aechu hungkae aeka, enuw ing envatu nongchaap Jesu ningna entongpa. Aanuwnache Jesu ing enuwchu ruwka Betsaida ichii khuwruung tingche asifhuwpae.

¹¹Amachu mee vakhae ing ensiitah nache Jesu aanuwchu enjiipa; amana Jesu ing enuw vakhaechu abariim-sahpae, vokhehkho ama ing Thangnang iruwngpaam khaena thamin atongpa, amanche ina mee aeng damsa nungka enchii vakhaechu amandampa.

¹²Inii ajungtak phanache chong-thang suum ariinii aenche Jesu ningting huung aeka enriir, “Havana mee hangjaeh inem ae i akuurpaangna om khuw, vokhehkho yndah khuwting itungnii amanche isahnii innii khaena enuw ae i bathentah aera; akhaechuve inuw pambingna ongsamuw.”

¹³Changvakonchu Jesu ing eningna ariir, “Nenuw ing isahfhuw piaeruw.” Enuw ing embasang, kenuw ing sinungka mee hangjaeh inem khaene thaeminchu vaariimah nungve ke-ningna om chuve tar runga re nga ynniipang imah naka reentaang omah.

¹⁴Akhaechuve enuw mee lising runga chak empha. Amana Jesu ing achongthang ae ningnache ariir, “Mee ae i aruwr songa songa ing mangong aeruw.”

¹⁵Jesu ing ariir inuwzii inche enuw ing mee aechu emangongpa.

¹⁶Amana Jesu ing tar runga re nga asae ynniimehchu verika thangbaen ting hengenka bor apeehpa, vokhehkho bakhiika mee changjaeh inem ae ningnache semruw taka achongthang ae ningting ajepeehpa.

¹⁷Enuw vakhae inche sa aeka enven bavasa; amana chongthang aenche ynriichu engkhuum tahnache buruk suum ariinii bariisa.

¹⁸Nikheh nache Jesu ing anumpang ing athamsahrae achongthang aekho aanruwfhuw. Amana Jesu ing eningna chong asii ae, “Mee ae ing ki i achuwva ynchiinah ae?”

¹⁹Enuw ing embasang, “Baptis Johon; areh aenche Elija, amanche areh aenche vokheh ajaennii Thang-nang jaephar ithii ae kaartanii yngkheh hangringva enchiinah.”

²⁰Jesu ing eningna ariir, “Changva-niicha, nenuw ingcha ki i achuwva ichii ing mandennahchuw?” Amana Pitar ing abasang, “Thangnang Khrista chuvachii achii.”

²¹Jesu ing eningna achuw tanga ningnakho riirmahruw taka ipirpak chonghak jeerka havi ariir,

²²“Mee Sapa inche ijachaam aajaeh phavaata, amanche upa chaap aeng vokhehkho aanchung jaethiim aeng amanche thiimthang chaap aenche rumah ae naka thehvaatae, amanche inii animanthumnii nache hangring vaata.”

²³Amana Jesu ing mee vakhae ningna ajeer, “Achuw yngkheh ing kaanuw jiikata tanave ataksah ynrumahrasiing vokhehkho akhros sahchu anasiir nache idomsana kaanuwchu jiirasiing.

²⁴Aringkum karsa ningka achii achuw yngkheh inche imaangsah phavaata, amanche kakhaena aringkum ama-maangcheh mee chuve ikarpeeh phavaata.

²⁵Akhaechuve mee yngkheh inche laaruw paam aangkheng phanaka ataksahchu maangnave vokhehkho chiirdeh nave ynchii ikanii aphase?

²⁶Chukhaenache kakhaena vokhehkho kachong khaena aning amanjak mee chuve Mee Sapa inche alaar isa re ampa laar isa vokhehkho ynthiing vaarmee ae enlaar isa thoh-che ynruw ing ajungthenglaenche ningjak phavaata.

²⁷Ki ing neningna atatak ing kariirnah, havane ingiir mee topoh ae ichuve Thangnang iruwngpaam emumahri raentaang ithiichu phamahnii ae.”

²⁸Hava vakhae i ariir aanuw inii neeriih omka, Jesu ing Pitar re Johon, amanche Jakop, enuwchu ynruwfhuwka bung ting ithamsah sisae.

²⁹Ama ing athamsah raenche Jesu amaechu asikdeh ing tiisa, amanche Jesu apeendiir chukho ivaar lamher ing ynreensa.

³⁰Apha ichiinache Jesu ing meeniimeh thoh chongsae, enuw chuve Mosi re Elija ynsuwhsae.

³¹Enuw ing enlaar isa mandang aeka amanche nuwting Jerusalem na Thangnang ing asir inuwzii ing thikvachii khaenache chongsae.

³²Changlaenche Pitar ing aanruwfhuw ae thohche emik ikhuw lamher ing ynguwsae, changvakonchu emik ikhuwchu ahungriing tahnache enuw ing Jesu alaar isa re amathoh ingiirhak ae meeniimeh chukho emupa.

³³Amana enuw ing Jesu thohche engaansae aanuwnache Pitar ing Jesu ningna ariir, “Aafhuw, hava minne inuw ong ing sakna; inuw ing rumniithaam asae ynthummeh, nakhaena yngkheh, Mosi khaena yngkheh amanche Elija khaena yngkheh tutaruw achii.” Havi ama ing ynchii kariirva ichii manghuwmah.

³⁴Ama ing changche achong raenche ruwrduh inche entaklina abaruwpae; amana ruwrduh sungna ongchu enuw ynchiksae.

³⁵Changlae ruwrduh tanii iruur yngkheh ing ariir, “Havi ki ing kaateer kasapa chuva; ama ing ariirchu nenuw ing rungaeruw.”

³⁶Ama iruurchu achichak inuwna, Jesu anumpang ongsa. Amana enuw ing huwdaejaeh inche ong aeka vokhehkho emuchu achuw ningnakho riirmahsae.

³⁷Atuknuwche enuw ing bung tanii enjungchum tahnache mee inempak ae thohche yntuwhsae.

³⁸Amana mee yngkheh ing changjaeh mee inem kaarnache uungka ariir, “Oja, kasapa havi ienpeehra taka Jesu ningna athamsah, ki sapa yngkhehpang havi kadeensah vatah.

³⁹Enla, atak i ynthiingmah umlae laetha ing chuwngka uunglap uungchakna; vokhehkho abaena por ifhuwr ing ijachaam aphanah, amanche mee ing suwrkhang nare chehmah aeka abathen chaknah ae.

⁴⁰Chukhaenache ataklina umlae laetha ing ichuwngchu ithurpeehnii khaena nasebok ae ningna kathamsah tahnae enuw ingkho thurcheh mahsae.”

⁴¹Jesu ing abasang, “O thacha ivaeh vokehkho ynraar ing isi mee ae, ki ing nenuw thoh apha aasen iseeh ing ongningka khaangfhuwva kachii vachuw? Nasapa kha havatinge hen-ruwra.”

⁴²Asapa inche ahuungtah nache isamah umlae inche bathiihka aanukriipa. Changvakonchu Jesu ing isamah umlaechu thurka amandampa, vokhehkho naepangchu ampa ningting amansirpa.

⁴³Amana mee vakhae aenche Thangnang ruwreng ipirpakchu emutah nache inempak enruwriimsa. Jesu ing atu ari nong vakhae nache ngik aeka engomraenche asebok ae ningna ariir,

⁴⁴“Havana kachong vakhae i nenganana manruwhruw; Mee Sapa chu mee ae kikting piro enchiinah.”

⁴⁵Enuw ing ajeer chongchu ynchii achiiniiva ichii manghuwmahsae, vokhehkho enuw ing emanghuwniimah inche athuurpa; chukhaenache hava chongjeer khaene Jesu ningna siiva enchii ynchiksae.

⁴⁶Changlaenche enuw enareer sungna achuw ingkhe iruungseh vamuw ynta aeka chong suwhsa.

⁴⁷Changche ichii ing embarungriir sungna emandenchu Jesu ing amanghuw tahnache ama ing naepang yngkhehchu vekika abuumna mangongka,

⁴⁸amana eningna ariir, “Achuw yngkheh ing karumingna havana naepang i bariimsa nave kichu ymbariimsahva, amanche achuw yngkheh ing kichu ibariimsa nave ki ynjenchiir Thangnang chu abariimsahva; nenuw nengkaarna yntuursehping taka amandensah meechu iruunghakva.”

⁴⁹Changlae Johon ing abasang, “Aafhuw achuw yngkheh mee ing narumingna isamah umlae athur kenuw ing mu ungka kengkhaam, akhaechuve ama ing kenuw thohche sihakmahsa.”

⁵⁰Jesu ing abasang, “Khaam mahruw; nenuw ynjeehniimah meechu nengkhae nava.”

⁵¹Jesu thangbaen ting jerivachii apha ahunganeeng tahnache Jerusalem ting isinii khaena karkhiing abasenpa.

⁵²Chukhaenache Jesu ing amating maen ing asebok aechu achiirpae; chukhaenache enuw ing hesi aeka Jesu khaena hesirnii inche Samaria khuwting varuwhsae;

⁵³Changvakonchu Jesu ing Jerusalem phanii ing isinii khaena ahehchu emanghuw tahnache enuw ing Jesu chu hebariim mahsae.

⁵⁴Amachu Jakop re Johon ing emutah nache enuw ing enriir, “Aafhuw, thangbaen tanii mi jenbabuk manuwka enuw i emaang chirnii inche kenuw ing chonghak ipeeh naruse?”

⁵⁵Jesu ing eningting vaanlehka arakuhpae, “Nenuw ynchii laetha ing eenruwfhuwva ichii manghuw mahchuw,

⁵⁶Mee Sapa inche laaruw mee mamaang kata taka ijuwngmahva, karpeeh katae taka ijuwngva.” Amana enuw ing reentaang khuw yngkheh ting sisae.

⁵⁷Enuw ing lamna envasiraenche mee yngkheh ing Jesu ningna ariir, “Aafhuw nang nasitah vakhaena naanuw jiisa kata.”

⁵⁸Jesu ing aning-nache imi aekho engkhur omna amanche vaati aekho enrabuw omna, changvakonchu Mee Sapa chuve arusae mangkamnii unakho omah taka ariir.

⁵⁹Jesu ing mee reentaang yngkheh ningnakho kaanuw ijiira taka ariir. Changvakonchu ama ing abasang, “Aafhuw, maensa ing kapa ithii idim sirap kata irupeehra.”

⁶⁰Jesu ing abasang, “Ithii aechu entaksah ing yndimsa ae rasiing; nang sinana Thangnang iruwngpaam chongchu vatongla achii.”

⁶¹Mee reentaang yngkheh ingkho ariir, “Aafhuw, ki naanuw jiiva kata; changvakonchu maensa ing ka eengkuw aechu lamsuw thaenrap katae irupeehra achii.”

⁶²Jesu ing aningna ariir, “Nong itu basen naka aanuwting ivaanleh mee chaap chuve Thangnang iruwngpaam khaena ynchiikho ikaanii omah.”