Read Moyon Naga JOHON 11 Bible Online

JOHON 11 - Moyon Naga bible

JOHON 11

¹Meri re anaenuw Martha engongnii Bethani ichii khuw nache Lazarus ichii pasar yngkhehchu ina.

²(Hava Meri i isivasahna Jesu khina barim isa richiithou itaehka asam ing aanuwr sanuw khava; amanche ina i achapa Lazarus va.)

³Asar aenche Jesu ningting chong embatha: “Aafhuw, nang ing naning namansiih naarangkha nakna.”

⁴Jesu ing amachu asiitah nache ama ing ariir, “Hava ina i ithiinii ing ina mahva, Thangnang laar isa yndangnii khaena vatah, amanche Thangnang sapa inche havi ajaarne ympahchu phanii khaenava.”

⁵Jesu ing Martha re anaenuw vokhehkho Lazarus chu aning aman-siih ae.

⁶Changvakhang nare Lazarus naksa ichii chongchu asiitah nache, ama ing inii ninii ongsareeh.

⁷Amana asebok ae ningna ama ing ariir, “Inuw Judia ting ynritaruw.”

⁸Asebok aenche aningna embasang, “Oja, idina nang i rung ing deeng kenchii ynchiipae; amanche atarae athar vaanritaruw nachiiva?”

⁹Jesu ing abasang ae, “Nikheh ichii i apha suum ariiniiva, changmah vakhang. Chukhaenache achuw yngkheh ing siimna isi chuve isii ikha phamah, akhaechuve laaruw paam irengchu ama ing amusa.

¹⁰Changvakonchu jaenna sinave isii ikha aphanah, akhaechuve aningna irengchu omah.”

¹¹Jesu ing havi riirka vokheh ber abu, “Inuw yngarang Lazarus kha jaarsa, changvakonchu ki ing vasiningka vabasuw kata.”

¹²Sebok aenche embasang, “Aafhuw, ama ijaar vaniive riingtah vaata enchii.”

¹³Jesu ing ariirnii chuve Lazarus thiksa achiiniiva, changvakonchu enuw ing emanden chuve ijaar tatakva ichii ing emandensah.

¹⁴Chutahnache ama ing emanghuwnii inche eningna ariirpa, “Lazarus thiksa,

¹⁵nenuw ing nenthachanii khaena ki ing amathoh onghakmah ingchu nengkhaena karotha kamanrohnah. Inuw aningting vaktaruw.”

¹⁶Thomas (Ymphuwr kho enchii) ing aarang sebok aeting inuw eengkheng ing oja thoh vasihakpoh manuwka ithiikho thik haktah taruw achii!

¹⁷Atii Jesu ing avatungtah nache Lazarus chu thikka thaenna endim inii nimanrii ahenpha ynsuwhsa.

¹⁸Bethani re Jerusalem ruwrakchu meil ynthum yndah phadirmah,

¹⁹amatah nache Jehudi aenche Martha re Meri enchapa ithii khaenache barungriir amanungae peehnii ivatheng ae.

²⁰Jesu vathengna ichiichu Martha ing asiitah nache ama ing avaantuwh fhuwpa, changlae Meri chuve eensungna heong.

²¹Martha ing Jesu ningna ariir, “Aafhuw, nang hane ongtaniive kachaapa i thikmah vachiiva!

²²Changvakonchu ataraen-kho nang ing Thangnang ningting nahentham chaapchu ijepivaata ichii kamanghuwsa.”

²³Jesu ing aningna ariir, “Nachaapa ing athar hangring vaata.”

²⁴Martha ing aningna ariir, “Ki ing kamanghuwsa amachuve achiniina ihangringnii inii nache hangring vaata.”

²⁵Jesu ing aningna ariir, “Ki i ihangring vokhehkho iringnii chuping. Achuw yngkheh ing kichu ithacha nave thikkhang nakho hangring vaata;

²⁶amanche achuw yngkheh ing aringlae kichu ynthacha mee chuve utaraenkho thikmahnii. Havi nang ing nathachanah?”

²⁷Ama ing abasang, “Unge Aafhuw! Nang i laaruw paamna ijungtheng Thangnang sapa Khrista chuvachii ichii kathachasa.”

²⁸Martha ing havi ariir aanuwdehna ama ing ynrika ynruwhjaeh ing anaenuw Meri hungeenka ariir, “Oja vakka havane ongna vokhehkho nangchu ynjongnah.”

²⁹Amachu Meri ing asiitah nache jungsuwhka ynnehpak ing avaantuwh fhuwpa.

³⁰Jesu chuve khuwsung vatungmahri, changvakonchu Martha ing aantuwh-fhuwnii ruvaenache heongjaehsa.

³¹Meri thoh eenna heong mee aenche Meri barungriir amanungaepeehnii chong ajeersah ae, changvakonchu Meri ing hangiirka ijungsuwhchu emutah nache, thaen ting vakka ivachapva ichii ing manden aeka aanuwchu envejii.

³²Meri ing Jesu aongniichu vephaka avemu thohche Jesu khiderna vatiihka Aafhuw, hane nang ongtaniive kachaapa i thikmah vachiiva achii.

³³Meri ichap vokhehkho ama thoh ynruwhakpoh ae ingkho ichap aechu Jesu ing amupa, amana Jesu chukho abarungriir asuhpa vokhehkho laetha nache ijapak ing ynlaapsa.

³⁴Amana Jesu ing eningna asii ae, “Unakhe nendimsa?” Enuw ing embasang, “Aafhuw, vaknana enla.”

³⁵Jesu chapsa.

³⁶Amana enuw ing enjaeh tahruw aajaehmeh aning amansiihva ta aeka enriir.

³⁷Changvakonchu areh aenche enriir, “Ama ing mikchu kha aman-dammah vakhang, amanche Lazarus athikniimah itukho chehmah niikhang?”

³⁸Barungriir inempak asuh ing Jesu ing thaen ipha ing vakka thaen-kuw kamnii rungchu avephapa.

³⁹Amana Jesu ing rungkha vekiruw taka ariirpa. Ithii pasar asarnuw Martha ing Aafhuw, aandimnii nimanrii ahenpha vakhaka manam siingta taka ariir.

⁴⁰Jesu ing aningna ariir, “Nang ing thacha taniive Thangnang laar isachu muvaanta tamah ingkhang?”

⁴¹Enuw ing rungkamchu enrijohpa. Amana Jesu ing yngaenka Thangnang ting ahenriirsah, “Apa, kariirsah i nang ing ynsiipeeh tahnachii kamanpah sahnahchii.

⁴²Anasiirna kariirsah vakhaechu ynsiipeeh sachii ichii kamanghuwsa. Changvakonchu havane ong mee vakhae ae thenna havi kariirsahva, amana chembe ki i nang ing ynjenchiir vachii ichii thacha vaatae.”

⁴³Havi ariir aanuwnache senruwr iduung ing uungka Lazarus, jungsuwhra taka a-eenpa.

⁴⁴Amana akhi akik peen ing amanche amae aangkheng ynrom inche jungsuwhsa. Lazarus ijungsuwhchu amutah nache Jesu ing eningna bajohruw, ama sirasiing taka ariir.

⁴⁵Jesu ing atu arichu Meri ningna itheng vakhae aenche emutah nache, Jesu chu enthacha ae.

⁴⁶Changva-konchu achuw yngkheh chuve ynriaeka Pharisi ae ningting ahungtong ae.

⁴⁷Amana Pharisi aere aanchung jaethiim ae vokhehkho aanchungpuh yntuwh aeka emanseer, “Inuw ynchii tutaruw? Ama ing laetho aajaeh atu i enruw!

⁴⁸Inuw ing atu ari chaap i enjaeh manuwve, mee vakhae ing aningna thacha sehsehro enchiinah, amanche Rom aapuh aeng yntaklina imanraar ae naka ynta Rumniieen re ynjaati mamaangchir vaatae!”

⁴⁹Ama kum nache engkaarna Aanchung Jaethiim aruming Kaiphas ichii inche ariir, “Nenuw ynchiikho manghuwmahchuw!

⁵⁰Jaati maang-vachii changdenna mee yngkheh ithii inche sakseh mahkhang?”

⁵¹Ama ing havi abarungriir tanii hungsuwh ing ariir changchii mahva, changvakonchu ama kum nache aanchung jaethiim yngkheh ynsuwh ing Jesu ing Jehudi ae khaena thikva chiichu ajeerva,

⁵²vokhehkho enuw khaena chenpang mahka, Thangnang mee ae ynsaenong aeka omchu yngkhehpang ing hungomnii khaenava.

⁵³Ama inii nache basenka Jehudi aatuaricheh aenche Jesu thehnii ensirpa.

⁵⁴Chutahnache Jesu ing Judia paam nache yndang ing simahsa, changvakonchu ama ing paamfhuw jiika Ephrem ichii khuw tingche sika, vokhehkho amanache asebok ae thohche ongsa.

⁵⁵Manlaennii Kuurva aaniichu hunganeengsa, amatah nache mee vakhae aenche Jerusalem na theng aeka kuurva aphamah rirae ynthiingnii entu.

⁵⁶Enuw ing Rumniieen nache ngiir aeka Jesu ithengmah itheng hengabuwr aeka yngkheh yngkheh chong ynseer aeka enriir, “Ynchii nemandennah? Ama kuurvane thengmah vachiiva?”

⁵⁷Atii aanchung jaethiim aere Pharisi aenche chong emanthangpa, achuw yngkheh ing aongniichu manghuw nave isuwrnii khaena ynningna chong ipirasiing enchii.