Read Moyon Naga JOHON 12 Bible Online

JOHON 12 - Moyon Naga bible

JOHON 12

¹Manlaennii kuurva hempha vachii inii niruk avaeh raenche ithii tanii amanring Lazarus ongnii khuw Bethani tingche Jesu ing vasisa.

²Jesu avathengtah nache imaarnii khaena Martha ing ahesir; Lazarus ingkho isahnii nache Jesu thoh ongpoh kaarnache ynvae.

³Changlae Meri ing barim isa richiithou inche Jesu khi itaehka asam inche aanuwr. Richiithou barim inche eensungchu bariimsa.

⁴Amana Jesu rensavachii sebok aruming Judas Iskariot inche ariir,

⁵“Yngkhaena abarim hangjaeh isa richiithou havichu seer dinari chathumna ynjuwr naka sara naeriing ae ningna ympimah tahka?”

⁶Havana ariir i sara naeriing aechu akuurpeeh changchii khommahva, atak i abaruk tahnava. Ama ing seer thuungfhuwchu chinaka arutumsah khaena rivachii khaena vatah.

⁷Jesu ing aningna ariir, “Sanuw inge tuning achii turasiing, ki yndimva kachii khaena havi ama ing asiihva.

⁸Sara naeriing ae thohche nenuw anasiirna ongva nenta, changvakonchu ki thoh chembe anasiirna ongmah manuw.”

⁹Bethani khuwna Jesu thengna ichii ensiitah nache, Jesu khaenapang mahka ithii tanii hangring Lazarus chu ymbuwrnii khaenakho ta aeka mee inempak iva ae.

¹⁰Chutahnache aanchung jaethiim aenche Lazarus chukho ithehnii khaena ensirpa,

¹¹akhaechuve ataklina Jesu ing atu ari khaenache mee vakhae ing eningtanii taen aeka Jesu chu enthacha khaenava.

¹²Manlaennii kuurva nache itheng mee aajaeh aenche Jerusalem na Jesu vathengna ichii ensii.

¹³Chutahnache enuw ing inubur ana chiaeka enva-puwh ae vokhehkho rotharoh ing uung ae, “Hosanna! Aafhuw rumingna ithengchu bor aphava, Isrel iruwngchu bor aphava!”

¹⁴Ynthiing thiimziih ing ariirvaang Jesu ing lola vetuwhka ataklina hangongka vasisa,

¹⁵“Zaion khuwruung nang ynchik mahra! lola nache vaongka naaruwng vathengna.”

¹⁶Changlaenche asebok aenche ynchii enchiiniiva ichii manghuwmah ae, changvakonchu Jesu alaar isachu aandanglaenche akhaena ynthiing thiimziih ing ariirchu enuw ing engaansiipa.

¹⁷Ithii vasah thaen tanii Jesu ing amanring Lazarus athamin vakhaechu amu asii vakhae aenche ahungriir ae.

¹⁸Ama khaena chenva mee aenche engaantuwhfhuwchu, akhaechuve enuw ing laetho atuchu ensii.

¹⁹Amatah nache Pharisi aeng enum ing yngkheh yngkheh ynriir ae, “Nemuse, inuw mancha chehmah samuw! Enruw laaruw paam mee vakhae ing aanuw enjiipa!”

²⁰Kuurva nache Jerusalem na itheng ae kaarnache Grik topoh aekho ynvae ae.

²¹Enuw ing (Galili paamna om Betsaida ichii khuwna ong) Philip ningting vak aeka enriir, “Oja, kenuw ing Jesu chu munungka kenchiinah.”

²²Philip ing Andriu yntuwhfhuwka enganii ing Jesu ningting vak aeka enriir.

²³Jesu ing eningna abasang, “Mee Sapa inche alaar isa phavachii aphachu atii ahenphapa.

²⁴Neningna atatak ing kariirnah: Gehu aanla inche ruwruwna buknaka thikmah nave changche omjaeh vaata; changvakonchu thiknave aanla inempak ynlavaata.

²⁵Achuw yngkheh ing aringkumchu aning mansiih nave ama maangvaata; achuw yngkheh ing laaruw paamne aringkumchu rumah nave, ichen naemah ringkumchu aningna omjaeh vaata.

²⁶Achuw yngkheh ing kichu rukuum ituning tanave kaanuwchu jiirasiing, amana chembe kameenae inche kaongnii nache ong phavaata. Ki rukuum yntu mee vakhaechu kapa ing bariimsa vaata.”

²⁷“Atii kabarungriir jaana. Ki ynchii riirkata? Ki ing jinge takate, ‘Apa, hava apha i kataklina thengmah rasiing.’ Changvakonchu ijachaam havi khaene apha havi phange ki ijuwngping.

²⁸Apa, naruming manruungla.” Aanuwnache thangbaen tanii iruur jungtheng, “Ki ing kamanruungpa, amanche vokheh manruung vakata!”

²⁹Changlae iruur huwrusachu asii vakhae aenche bicheeh huwrusava enchii ae, changvakonchu areh aen-chembe vaarmee ing chong abuwhva enchii ae.

³⁰Changvakonchu Jesu ing eningna ariir, “Ama senruwr kha kathen namahva, nenuw khaenava.

³¹Laaruw paam taklina vajeer yntuvachii aphachu ahenphapa.

³²Laaruw tanii chungting eethoh aanuwnache mee vakhaechu kabuum tingche jekivakata.”

³³(Havana ariir i ijachaam yntuwhfhuw naka thikvachii amandangniiva.)

³⁴Mee aenche embasang, “Ken vajeer chonghak nachembe Khrista chu ichen naemah ing paarvaata taka ariirsa. Amachu ynsaangkhe nang ing Mee Sapa chu chungting eethoh vaatae nachiiva? Mee Sapa chu achuwva?”

³⁵Jesu ing abasang ae, “Ireng inche apha mongtehna nengkaar nache ongvaata. Irengchu aomraenche itufhuw turuw, amana chembe ynthimchu nentaklina thengmahnii; yngkhaena ynchii imbe ynthimna isi mee inche uting isiping ichii manghuwmah.

³⁶Neningna irengchu aomraenche, irengchu thacharuw, amana chembe nenuw ireng siti ynsuwhva nenta.” Jesu ing havi ariir aanuwna, ening-tanii jungsuwhka ynthuursa.

³⁷Enuw emaekungna laetho aajaeh tukhang nakho, enuw ing aningna thachamah ae,

³⁸havi Isaia jaephar ing ariirchu hungchumro achiinah: “Aafhuw, achuw ing chong kemanthangchu athachase, amanche achuw ningnache Aafhuw changbaen ruwrengchu namandangva?”

³⁹Chutahnache enuw ing thacha chehmah ae, yngkhaena ynchii imbe Isaia ingkho ariir,

⁴⁰“Thangnang ing emik amanchupa vokhehkho embarungriir akampa, amatah nache emik inche mumahnii ae, amanche embarungriir nakho manghuw chehmahnii ae, vokhehkho idamnii khaena kabuum henjong mahnii ae, taka Thangnang ing ajeersa.”

⁴¹Isaia ing Jesu alaar isachu muka ama khaenache havi ariir vasahva.

⁴²Changkhang nare Jehudi aatuari-cheh aenche Jesu chu enthacha; changvakonchu Pharisi aechu enchii tahnache vokhehkho meekongnii tanii engkak niimah khaenache yndang ing ichong chehmah ae.

⁴³Thangnang ing aru engadik chungna mee ing aruchu engadikseh ae.

⁴⁴Jesu ing uungka ariir, “Achuw yngkheh ing ithacha nave ki pangchu ynthacha mahva, ki ynjenchiir Thangnang chukho athachava.

⁴⁵Ki ymmu mee inche ki ynjenchiir chukho amuva.

⁴⁶Laaruw paamna ireng yngkheh ing ijuwngping, ki ynthacha mee inche ynthim nache ongmahnii.

⁴⁷Achuw yngkheh ing kasenruwr i siinaka manjiimah nave, ataklina vajeer tumah ing; vajeer itunii khaena ki ijuwngmahping, changvakonchu laaruw paam ikarnii khaena ijuwngping.

⁴⁸Kichu thacha ningka ynchiimah mee ae vokhehkho kachong thacha ningka achiimah mee ae taklinache vajeer tuvachii yngkheh omna. Hava kachong inge achinii inii nache atakchu vajeer tuvaata!

⁴⁹Havi ichumva, akhaechuve kataksah aatuaricheh ing kariirmahva changvakonchu ki ynjenchiir kapa inche ynchii riirva kachiiva vokheh-kho ynchiikha chongva kachiiva ichiichu kaningna ympeehva.

⁵⁰Ki ing kamanghuwsa, amachuve ama achonghak i ichen naemah ringkumva. Hava kariir vakhae i riirla taka kapa ing kaningna ariirva.”