Read Moyon Naga JOHON 13 Bible Online

JOHON 13 - Moyon Naga bible

JOHON 13

¹Atii Manlaennii kuurva aanii-chu aphamahri raenche, Jesu ing laaruw paam bathen naka ampa buumting yngkaeva chiichu apha ahenphapa ichii amanghuw. Laaruw paamna ipaar amee aechu inempak aning amansiihsa, vokhehkho achinii ipha ing aning amansiihsa.

²Jesu ing asebok aethoh amaarpoh raenche umlae inche Simon Iskarot sapa, Judas chu Jesu irensahnii barungriir amanruwhpa.

³Jesu ing akiklina ampa ing aangkhenglaang khaena ruwreng apeehchu amang-huwsa, vokhehkho Thangnang tanii ijuwngping amanche Thangnang ningting ynrireehva kata ichii amanghuw.

⁴Jesu ing hangiirka anii peendiirchu siihka vokhehkho peenchu adiirriimna achiimpa.

⁵Aanuwnache Jesu ing daona chiichu jesungka sebok ae khichu chaamka vokhehkho peen inche aanuwrpa.

⁶Simon Pitar ning ahenpha tahnache ama ing ariir, “Aafhuw, nang ing kakhi chaanva nachiiva?”

⁷Jesu ing aningna abasang, “Atarae katu i ynchii katuva ichii manghuw mahchii changvakonchu aanuwting manghuwva nata.”

⁸Pitar ing aningna abasang, “Nang ing kakhi chaammahva nachiiva!” “Nakhi chaammah ningve natak i kithoh ynchiikho ynsuwh mahmuw taka Jesu ing abasang.”

⁹Simon Pitar ing aningna achii, “Aafhuw, kakhi pangjaeh mahka, karusae kho amanche kakik kho ichaampeehra.”

¹⁰Jesu ing aningna ariir, “Achuw yngkheh ynchaam vasah mee chuve manthiingsa amanche ynchaammah khang nakho ruvaata, akhi khaena chenpang vatah. Atiive nenuw man-thiing sachuw, changvakonchu mee yngkhehpang omtahna.”

¹¹Atak rensavachii meechu Jesu ing maen ing amanghuw vasahva, amatah nache havi ariirva, “Nenuw vakhae manthiingkiir sachuw, changvakonchu mee yngkhehpang omtahna.”

¹²Jesu ing engkhi achaampeeh ae aanuwnache apeendiir niika aongniiting hungongka ariir, “Atarae katukha ynchiiva ichii nemang-huwse?”

¹³“Nenuw ing kichu Oja vokhehkho Aafhuw ynchiichuw i chumnachuw, ki amachu rapping.

¹⁴vokhehkho Aafhuw itachuwka nengkhi kachaamsa, havi vaange nenuwkho yngkheh yngkheh nengkhi ynchaam peehruw.

¹⁵Ki ing manjiiva nenchii kamandangpa, nenuw ingkho neningna katuvaange turuw.

¹⁶Atatak ing kariirnah: Suwh inche utaraenkho aafhuw chungna iruungmahva, isa chong areen mee ingkhe utaraenkho achiir mee chungna iruunghak mahva.

¹⁷Atiive ichumchu nemanghuwpa, havi hemanjii tanuwve aajaehmeh bor phava nente!”

¹⁸“Nengkhengna havi kariirmahva, changvakonchu ki ing kaateer vasah mee aechu kamanghuwsa. Ynthiing thiimziihna ariir havi hungchum vaata amachuve, ‘Kithoh thaemin kensahhak mee inche aanuw ynrisa.’

¹⁹Havi asuwhmah rirae ki ing kariirva, amana ahungsuwh raenche, ki i achuwping ichii manghuw vanenta.

²⁰Atatak ing neningna kariirnah: Ki ing kariirchu achuw yngkheh ing herinave, ki chukho ynriva; ki ynri mee inche ki ynjenchiirchu ariva.”

²¹Havi ariir aanuwdehna Jesu ing abarungriir inempak ija ing ariirjohpa, “Ki ing neningna atatak ing kariirnah: Nengkaarna mee yngkheh inche ki irensa vaata.”

²²Ama chongchu ensiitah nache, sebok aechu yngkheh yngkheh yngen aeka ynsiiae.

²³Jesu ing sebok ae kaarna aning amansiih yngkheh inche abuumna ong.

²⁴Simon Pitar ing aningna achuw taklina ichongva siira achii.

²⁵Amana sebok inche Jesu vaneengka asii, “Aafhuw, achuw khava?”

²⁶Jesu ing abasang, “Tar havi ahina fhuwm ningka aningna pivakachii mee chuva.” Amana tarchu jefhuwmka Simon Iskariot sapa Judas ningnache apeehpa.

²⁷Judas ing tarchu averi thoh ataklina umlaechu ruwhsa. Amana Jesu ing aningna ariir, “Tuva nachiichu tuchurchurla!”

²⁸Jesu ing ariirchu sebok aenche yntanga manghuwmah ae.

²⁹Judas ing seer thuungfhuw apaanii vakhaka, Jesu ing kuurva khaena vokhehkho sara naeriing ae ipeehfhuw khaena peehchae aanrii achiir varapmuw ichii ing emanden.

³⁰Judas ing tarchu iraangka taangting vat jungsuwhsa. Changlae aphachu jaen visa.

³¹Judas ing taang asuwh aanuwna Jesu ing ariir, “Mee Sapa alaar isachu amanruungpa.

³²Thangnang laar isachu aningnache ruungnave, Thangnang ingkho alaar isachu Mee Sapa taklinache mandangnii vaata,

³³Kasiti ae, aasenru ing nenuw thoh onghakmah ynthongning. Nenuw ing ijongva nenta changvakonchu Jehudi aatuaricheh ae ningna kariirvaang, ‘Kasinii tingche isi chehmah tanuw.’

³⁴Chukhaenache itharpeh chonghak yngkheh kapeehnahchuw: Nenuw yngkheh yngkheh ningsiih ympiruw. Ki ing kaning kamansiihchuw vaange, nenuwkho yngkheh yngkheh ningsiih ympiruw.

³⁵Nenuw ing yngkheh yngkheh ningsiih ympi tanuwve, mee vakhae ing nenuw i kasebok vachuw ichii imanghuw vaatae.”

³⁶“Simon Pitar ing Jesu ningna asii?” “Uting sivanachiiva Aafhuw.” Jesu ing abasang, “Kasinii tingche atarae nenuw ing ijiichehmah tanuw, changvakonchu nuwting chembe ijii-chehva nenta.”

³⁷Amana Pitar ing asii, “Aafhuw, naanuwchu ynchii khaena jiichehmahva kachiiva? Nakhaena ithii phanii ing ngiirning!”

³⁸Jesu ing abasang, “Kakhaena ithii phanii ing ingiir tatak vachii? Ki ing naningna atatak ing kariirnah: Aar-khuung ing akhuwngmah rirae nang ing ki vathumchak irumahtanii.”