Read Moyon Naga JOHON 15 Bible Online

JOHON 15 - Moyon Naga bible

JOHON 15

¹“Ki vomrip bur rem chuping, amana kapa inche aapaanii chuva.

²Kaningna aanla omah abahchu ama ing thaahchir naka amanche aanla om abahchu inem aanlanii khaena manriip vaata.

³Nenuw chuve havana kamanchuwchuw inge manthiing sachuw.

⁴Kaningna ongjaehruw, amanche ki ingkho neningna ongjaeh vakata. Abah inche utaraenkho anum ing ynla chehmah. Vomrip bur nache ongjaeh vaang naka ynlapeh vachiiva. Ama vaangche kaningna nengongjaeh mahtaang, nenuw utaraenkho ynla chehmah tanuw.

⁵“Ki vomrip bur chuping, amanche nenuw inche abah vachuw. Achuw yng-kheh ing kaningnache ongjaeh nave, ki ingkho aningnache ongjaeh vakata; akhaechuve kimah ningka nenuw yntanga tuchehmahchuw.

⁶Achuw yngkheh kaningna ongjaeh mah chuve abah ynlen naka chongrep vaata; changchii abah aechu ynghuwng naka mi sungting ynthuvaata.

⁷Nenuw ing kaningna ongjaeh tanuwka vokhehkho kachongchu neningna ongjaeh nave, nenuw ing nemandenchu heniihruw amanche phava nenta.

⁸Nenuw ing inempak ynla tanuwve, kapa alaar isachu yndangnii vanenta amanche kasebok ynsuwhchu chehva nenta.

⁹Kapa ing ki aning ymmansiih vaange, ki ingkho nenuwchu inempak kaning kamansiihnahchuw.

¹⁰Kariir chaap vakhae i manjii tanuwve, ki ing kapa chongriir kamanjii vokhehkho aningsiih nache ongjaeh vaang, nenuwkho kaningsiih nache ongjaeh vachuw.

¹¹“Hava kariir inge karotha irohchu neningna omnii khaenava vokhehkho nenuw nenrotha rohnii chukho achiniikak ing omnii khaenava.

¹²Neningna kariir chuve haviva: Ki ing nenuwchu kaning kamansiih vaangchuw inge, nenuwkho yngkheh re yngkheh ningsiih omruw.

¹³Ningsiihna athurfhuw chuve mee yngkheh ing aarang khaena aring-kum apeehdehcheh chuva.

¹⁴Ki ing kariir i manjii tanuwve nenuw kaarang vachuw.

¹⁵Ki ing nenuwchu atii meenae tamah ningchuw, yngkhaena ynchii imbe meenae inche aafhuw ing atu ari yntanga mang-huwmah. Changvakonchu ki ing nenuwchu kaarang ae kachiivachuw, akhaechuve kapa ningtanii kasii vakhaechu neningna kariirchirpa.

¹⁶Nenuw ing kichu eeteermah vachuw, changvakonchu ki ing nenuwchu kaateer vachuw; amanche nenuw ing sitanuwka aanla nemanlanii inche vokhehkho nengaanlachu apha omba khaena omjaehnii khaenache pham kathin vachuw; amanche nenuw ing karumingna apa ningna neniih neniihchu ama ing ipivaata.

¹⁷Havi ki ing neningna kariirnah, nenuw yngkheh re yngkheh ningsiih ympiruw.

¹⁸“Laaruw mee aenche nenuwchu ibatir ae nave, kichu ymbatirpae ichii i maensa ing manghuwruw.

¹⁹Nenuw i laaruw paam ta ynsuwh vatanuwve, laaruw paam mee aenche entasah vangeng ichii ing ening imansiih vaatae. Changvakonchu ki ing nenuw i laaruw paam tanii kaateer vachuw, amanche atii nenuw laaruw paam ta ynsuwhmah sachuw. Amatah nache laaruw paam mee aenche ymbatir-pae.

²⁰Ki ing kariir vasahkha ynsiiruw: ‘Suwh inche aafhuw chungna iruunghak mahva.’ Enuw ing kichu ijachaam ipiae nave, enuw ing nenuw chukho ijachaam ipivaatae; enuw ing kachongchu manjii ae nave, nenchong chukho manjii vaatae.

²¹Changvakonchu enuw ing hava vakhae i tuvaatae yngkhaena ynchii imbe nenuw i kata sachuw; enuw ing ki ynjenchiirchu manghuw mahsae.

²²Havi ki ing juwng ningka riirmah ningve enuw raarmahrom vachiipae; atiive enraar khaenache ikuhpeehnii engkhaena omahsa.

²³Kichu ymbatir mee inche kapa chukho abatirva.

²⁴Achuw ingkho atumah rideh i eningna katumah vaniive, enuw raar-mahrom vachiipae; enuw ing katu vakhaechu emupa amanche ki chukho, kapa chukho embatirpa.

²⁵Havi envajeer chonghakna ynziihka omchu ahungchumnii khaenache, “Enuw ing yntirfhuw mahna ymbatirpae.”

²⁶“Kapa ningtanii nenuwchu eebom ynthiing laetha, Thangnang khaena ichumchu mandangvachii jungtheng vaata. Ki ing kapa ningtanii neningting jenbathen vakata, amanche kakhaenache ama ing chongvaata.

²⁷Aburna basenka nenuw i ki thoh onghak vamuw khaka, nenuw ingkho kakhaena chongva nenta.”