Read Moyon Naga JOHON 16 Bible Online

JOHON 16 - Moyon Naga bible

JOHON 16

¹“Hava kariir i nenuw nentha-cha nenbathenniimah khaenava.

²Nenuw meekongnii tanii nenruming kakvaatae, amanche achuw yngkheh ing itheh naka, havi inge Thangnang nong atuniiva tavachii aphachu hempha vaata.

³Mee aenche havi tuvaatae, akhaechuve kapa re kichu imanghuwmah ae.

⁴Hava hangchii ae i mee aenche hentu vachii apha ahenpha raenche, havana kariir chaap i ynsiijaehruw ta ingka kariirnah. “Aburna chembe ki nenuw thoh onghakmuw khaka havi riirmah ing.

⁵Changvakonchu atii chembe ki ynjenchiir aningtingche yng-kaeva kachiiva, amachu nenuw achuw ingkho kaningna uting siva nachiiva itamahchuw.

⁶Atii nenuw nenbarungriir inempak jaana.

⁷Chang-vakonchu neningna kariirnah: ki yngkae ingi nengkhaena isapkva, akhaechuve ki yngkaemah ningve Eebomchu thengmahnii. Atiive ki yngkaeva kachii vakhaka atakchu nengkhaena jenchiir vakata.

⁸Ama ing ajunwglaenche laaruw paam mee aeng isii tingche embuknii, amanche ichumchu ynchii khava ichiire Thangnang vajeer khaenache mandang vaata.

⁹Isii icher inche enraarpa, akhaechuve kichu ithacha mahsae.

¹⁰Ichumchu ynchii khava ichiinache enuw enraarpa, yngkhaena ynchii imbe ki kapa ningting yngkaeping amanche nenuw ing athar imumah tanuw.

¹¹Vajeer ichiinache enraarpa, akhaechuve havana laaruw paam aapuh khaene vajeerchu chisa.

¹²“Neningna iriirfhuw inempak omna amachu nengkhaena nemvaata.

¹³Thangnang chu yndangnii khaena ynthiing laetha ing ajuwnglaenche nenuw vakhaechu ichum tingche iruwvaata. Ama ataksah aatuaricheh inche chongmahnii, changvakonchu ama ing asii chaap vakhae vokhehkho nuwting hungsuwh vachii khaenache riirvaata.

¹⁴Ama inche kaningna alaar isachu ipivaata, akhaechuve ki ing kariirchu rinaka nening nache riirvaata.

¹⁵Kapa ing adeen vakhaechu kataava, chukhaenache ki ing kapeeh laetha inche rinaka nening nache riirvaata.

¹⁶“Apha topoh aanuwna nenuw ing ki i imumah tanuw amanche apha topoh aanuwna kichu imuva nentareeh.”

¹⁷Engkaarna sebok areh aenche enareerna ynsii ae, “Havive ynchii achiiniiva? Apha topoh aanuwna nenuw ing imumah tanuw amanche apha topoh aanuwna kichu imuva nentareeh achii i; vokhehkho ama ing ki kapa ningting yngkaeva kachiiva achii nareeh.

¹⁸Apha topoh achii i ynchii ariirniiva? Ama ing ynchii ariirniiva ichii inuw manghuw mahmuw!”

¹⁹Jesu ing aningting chong siiva enchiichu amanghuwtah nache eningna ariir, “Apha topoh aanuwna nenuw ing ki imumah tanuw vokhehkho apha topoh aanuwna kichu imuva nentareeh ta ingka kariirsa. Havi khaene yngkhaena nenuw yngkheh re yngkheh ynsiivachuw?

²⁰Ki ing neningna atatak ing kariirnah: Nenuw ichap ichuw phava nenta vokhehkho nenbarungriir javaata, changvakonchu ijachuwchu rotharoh ting yntehvaata.

²¹Rupanuw ing siti abaring phana inempak jaana changvakonchu abaring aanuwna chembe ijachu abahirpa, akhaechuve ama ing naepangchu laaruw paamna ajungom tahnache arotha rohsa.

²²Havi vaange neningna ijanii thengna, changvakonchu aasenru ing nentaklina rotha rohniichu thengnaka nenbarungriir sungna isip ing omvaata, ama rotharoh chuve achuw ingkho nening tanii richeh mahnii.

²³“Aaniichu ahungviraenche kaningna yntanga isiimah tanuw. Neningna atatak ing kariirnah: Karuming nache nenuw ing kapa ningna neniih chaap vakhae ipivaata.

²⁴Ataniipha ing karumingna heniih-mah richuw; niihruw phava nenta, amana chembe nenrotha rohniichu achiniikak ing omvaata.

²⁵“Hava vakhae i neningna ynghuwnii ing chongsing. Hangchii chong i athar vokheh riirmahva kachii aphachu thengnaka iraesaksak ing kapa khaena itongnii hempha vaata.

²⁶Ama aphachu ahempha raenche nenuw ing karumingna niihva nenta; nenchangdenna ki ing niihva kata tamah ing,

²⁷akhaechuve kapa inche nenuwchu aning ymmansiihsa. Ama ing aning ymmansiih i nenuw ing kichu nening mansiihchuw khaenache vokhehkho katak i Thangnang ningta-niiva ichii ynthacha tahna vachuw.

²⁸Kapa ningtanii laaruw paamne ijuwngping; atii chembe laaruw paam bathen ingka aningting huungning.”

²⁹Aanuwnache asebok aenche aningna ensii, “Atiive kemanghuw chehnii ing nariirpa.

³⁰Nangve aang-kheng namanghuw chirva ichii atii kemanghuwpa; ama khaena athar isiivachii omahsa. Havi inge natak i Thangnang tanii ijuwng vachii ichii kenthachapa.”

³¹Jesu ing abasang ae, “Nenuw atii ynthacha pachuw?

³²Apha ichiichu atii ahenphapa amachuve, nenuw vakhae penchirva nenta amanche kanum ing ima tanuwka nengeen lam hehchir vanenta. Changvakonchu kive kanum mahning, kapa ing eenruwfhuwsa.

³³Nenuw ing kaning nache idaechu nenphanii inche, ki ing havi kariirva. Laaruw paamne ijachaam phava nenta; changvakonchu nenthir mansakruw, ki ing laaruw paam kachehpa!”