Read Moyon Naga JOHON 2 Bible Online

JOHON 2 - Moyon Naga bible

JOHON 2

¹Inii ninii aanuwting Galili paam Kana khuwna rakhiinii iriim yngkheh om. Amanache Jesu amnuw chukho itheng.

²Rakhiinii iriim nache Jesu vokhehkho asebok aekho engeen ae.

³Rakhiinii iriim nache vomrip chiichu atangdoh tahnache Jesu amnuw ing Jesu ningna ariir, “Vomrip chii ensenfhuw tangdohsa.”

⁴Amana Jesu ing abasang, “O rupanuw, ki nangthoh ynchii itupham omkhang? kakhaena aphachu henphamahri.”

⁵Jesu amnuw inche meenae ae tingche ariir, “Neningna ariir vakhae-chu turuw.”

⁶Jehudi ae iriim purah nache ynthiingnii khaena ynchaam ichii yngkheh om; ama khaena litar som-thum ichar beer kuruk ensiih.

⁷Jesu ing sebok ae tingche ariir, “Beer vakhae i chii mansip chirruw.” Enuw ing beer aangkhengchu chii emansip chirpa,

⁸aanuwnache eningna ariir, “Chiikha suwhnuwna iriim aapuh ningting hungpiruw.” Enuw ing chiichu suwh aeka enghungpeehpa.

⁹Chiichu vomrip chii uurka chiipaksa. Aapuh inche utanii vomrip chii ithengva ichii manghuwmah (changvakonchu chii aasuwh ae inchembe emanghuw); chukhaenache ama ing songpa ningna-che ariir,

¹⁰“Mee vakhae ing iriim abasen raenche aren ichiipakchu semchak aeka itheng vakhae ing engin aanuwna achuumchu ensen chakpae, changvakonchu nangve ataraenpha ing aren nasiihjaehva!”

¹¹Jesu ing anongtuna maensa ing laetho atuchu Galili paam Kana rakhiinii iriim nenva; amanache alaar isa amandang tahnache sebok aeng inempak embariim.

¹²Havi aanuwnache amnuw vokheh-kho anae ae amanche sebok ae thohche Jesu ing Kaparnaum paamting siaeka inii topoh icheeng ae.

¹³Manlaennii kuurva ichii apha ahenpha tahnache Jesu ing Jerusalem ting iva.

¹⁴Rumniieen nache ama ing siirdaar, jao amanche khunu ijuwr mee ongpoh aechu amu; amana seersaam irep mee aeng heong ae chukho amu.

¹⁵Amana siruw mong irehka jao ae vokhehkho deenkhaar aechu athurchirpa; amanche seersaam repnii ensiih chaap chukho barup barehka aajehchirpa;

¹⁶vokhehkho khunu aajuwr ae ningnakho ipirpak ing ariir, “Hava vakhae i chichirruw; kapa sejaam i kithiir manguur mahruw!”

¹⁷Amana sebok aeng ynziihka omchu engaansiipa, “Na-een khaena kabarungriir iruwhdeh ing kamanden inche kichu ynsahnah.”

¹⁸Jehudi aatuaricheh aeng Jesu chu basang aeka chong ensii, “Ynchii ruwriimnii laetho keningna man-dangcheh vanachii deenchiika hava ae i itunii ruwreng nadeenva?”

¹⁹Jesu ing abasang ae, “Havana rumniieen i mamaang chirruw, ki ing inii nithumna mangiirva katareeh.”

²⁰Enuw ing ensii, “Jerusalem rumniieen havi aantutahna kum sommanrii ariikruk chak iruwhva, amachu nang ing inii nithumna athar vokheh mangiirreeh chehva nachiiva?”

²¹Changvakonchu Jesu ing rum-niieen khaena ichong ichuve ama ahakchaang ynchiiniiva.

²²Jesu ing thikka ahangring raenche asebok ae ing havi eningna ariirchu engaansiipa, vokhehkho ynthiing thiimziih re Jesu ing ariir chongchu enthachapa.

²³Manlaennii kuurva sungna Jesu ing Jerusalem na ongka atu ari laetho chaap mee vakhae ing imu emphatah nache inempak enthacha ae.

²⁴Changvakonchu Jesu ing enuw vakhaechu thachamah ae, akhaechuve enuw vakhae i ynchii meepae ichii isajaeh ing amanghuw vasahva.

²⁵Enuw engkhaena achuw ingkho aningna saarkhii ipinii omah, akhaechuve embarungriir sungna ynthinchu ama ing amanghuw vasahva.