Read Moyon Naga JOHON 21 Bible Online

JOHON 21 - Moyon Naga bible

JOHON 21

¹Havi aanuwna Jesu ing athar vokheh asebok ae ningna Tiberias chiiding nache yndangsa, amanche haviva isuwhchu.

²Simon Pitar, Thomas (Ymphuwr kho enchii), Nathanel (Galili paam Kana tanii), Zebedee sapa ae, amana reentaang Jesu sebok ynniimeh ae thohche yntuwhpoh ae.

³Simon Pitar ing eningna ariir, “Ki ngaklah isiping.” Enuw ing aningna kenuwkho jiikenchii enchii. Chutahnache enuw ruwkuwng nache sipohsae, changva-konchu ama jaen nache enuw ing yntangakho suwrmahsae.

⁴Khuw hung-vaarka iniichu ahangsuwh raenche Jesu ing chiikuur nache hengiirsa, changvakonchu sebok aenche Jesu va ichii manghuw mahsae.

⁵Jesu ing eningna asii ae, “Naepang ae, yntanga nensuwrmahva?” “Yntangakho suwrmah ung,” ta aeka embasang.

⁶Ama ing eningna ariir, “Nengachak kha ruwkuwng omnii tachang tingkhe vedeengruw, amanache topoh suwrva nenta.” Enuw ing engachakchu envedeeng tahnache nga inempak khum aeka hengkicheh mahsae.

⁷Jesu ing aning amansiih sebok yngkheh inche Pitar ningna ariir, “Ama i Aafhuw va!” Pitar ing Aafhuw va ichiichu asiitah nache, ama ing apeendiir veniika chiitingche vakhuwngsa.

⁸Sebok areh ae chuve ruwkuwngna ong aeka taang tingche hungsuwh aeka ichak sungna nga engkhumchu enghengki. Amachu taangthoh aasen yndahpakmah, lam songthum vakhae yndahvaata.

⁹Enuw ing taang enghenpha tahnache mi hechuwhka nga ynruvasah vokhehkho tar topoh heomchu emu.

¹⁰Amana Jesu ing eningna atarae nensuwrpeh nga kha topoh henchiruw taka ariir.

¹¹Simon Pitar ing vakka chaama songa arii ynthum nga ing ynriim ichakchu taangting ahengki; nga chang-jaehchu ynthinkhang nare ichakchu ynsiihmahdeh.

¹²Jesu ing eningna ariir, “Huung nuwna saruw.” Sebok aenche aningna nang achuw vachii tamahdeh ae, yngkhaena ynchii imbe atak i Aafhuw va ichii emanghuwpa.

¹³Amana Jesu ing tar chukho amanche nga chukho apeeh ae.

¹⁴Ama ing ithii tanii ahangring aanuwna sebok ae ningna yndang i havi inge avomanthum niiva.

¹⁵Ensah aanuwnache Jesu ing Simon Pitar ningna asii, “Johon sapa, Simon, havana areh ae i chungna athiseh ing kichu naning ymmansiih nahchii?” Ama ing abasang, “Unge Aafhuw, kaning kamansiih sachii ichiichu nang ing namanghuwsa.” Jesu ing aningna ariir, “Kajao ae i rukuum tupeeh aera.”

¹⁶Avomanii Jesu ing aningna asii, “Johon sapa, Simon, kichu naning ymmansiih nahchii?” Ama ing abasang, “Unge Aafhuw, kaning kamansiih sachii ichii nang ing namanghuwsa.” Jesu ing aningna ariir, “Kajao ae i rukuum tupeeh aera.”

¹⁷Avomanthumnii Jesu ing asii, “Johon sapa, Simon, kichu naning ymmansiih nahchii?” Jesu ing vathumchak naning ymmansiih nahchii taka asiitah nache Pitar abarungriir jaasa; chutahnache ama ing abasang, “Aafhuw, nangve aangkheng namanghuw chirsa; ki ing kaning kamansiihchii i nang ing namanghuwsa!” Jesu ing aningna ariir, “Kajao ae i rukuum tupeeh aera.

¹⁸Ki ing naningna atatak ing kariirnah: Nasiimnah nachembe siningka nachiitah vakhae tingche isichii; changvakonchu najungtar raenche nakik mangkaen taniika, achuw yngkheh aenche nang ing siningka nachiimah tingche iruwvaatae.”

¹⁹(Havi inge ariirnii chuva, Pitar ing thiknii vachii vokhehkho Thangnang laar isa mandangnii vachii vakhaechu aningna amandangniiva.) Amana Jesu ing aningna ariir, “Kaanuw ijiira!”

²⁰Pitar ing paamkhuw athiirtah nache Jesu ing aning amansiihpak sebok yngkheh amachuve-ajae tar ensahpohrae Jesu vaneengka, “Aafhuw, achuwva nang irensava chiichu,” taka chong asii sebokchu amu.

²¹Pitar ing ama meechu amutah nache Jesu ningna asii, “Aafhuw, hava mee icha?”

²²Jesu ing abasang, “Ki kajuwng-mahri raentaang heringjaeh rasiing ichii manden ningve, naningna ynchii takhang? Kaanuw ijiira!”

²³Amatah nache Jesu aanuwzii aenche havana sebok i thikmah dehnii ta aeka enareer sungna ichong ae. Changvakonchu Jesu ing ama thikmah dehnii tamah; ama ing achii chuve, ki kajuwngmahri raentaang heringjaeh rasiing ichii manden ningcha; naningna ynchii takhang achii vatah.

²⁴Hava sebok iva hava vakhae takline saarkhii pika vokhehkho hava vakhae i abaziihsa; amanche inuw ing ariir vakhae i chumna ichii ymmanghuwsa.

²⁵Ataraenkho Jesu ing atu ari reentaang aajaehkho omna. Ama vakhaechu baziih kiirta tamanuwve, ama thiimbuwr chuve laaruw paam chirmahnii ichii ing kamandennah.