Read Moyon Naga JOHON 4 Bible Online

JOHON 4 - Moyon Naga bible

JOHON 4

¹Johon chungna Jesu ing mee inem khuumka asebok khaena baptais amantupa ichii i Pharisi aeng ensiipa.

²(Jesu ing mee aechu baptais mantumah, asebok ae ing emantu vatah.)

³Ama enriirchu asiicha Jesu ing Judia bathenka Galili paam ting ynrisa.

⁴Ama ing ahunganri raenche Samaria ahemantheng.

⁵Samaria nache ajae Jakop ing asapa Josep ningna apeeh lam yng-kheh om thohche yndahpakmah khuw yngkheh aruming Saikar ichii om.

⁶Amanache Jakop rumchii heom, amana lamlah ing hungsi khaenache Jesu jahohka rumchii kuur nache aja abasiir phehpa. Apha chuve inii siimchim sungna vaata.

⁷Samaria rupanuw yngkheh ing chii avathaarchu amucha Jesu ing aningna infhuw chii ipira taka aniihpa.

⁸(Changlae asebok ae chuve khuwruung ting isahfhuw ynrii isiae.)

⁹Rupanuw inche abasang, “Nangve Jehudi vachii, ki chuve Samaria ping. Amachu ynsaangkhe nang ing infhuw chii ynniih vachii?” (Samaria aere Jehudi ae thaemin sahakmah chak ae.)

¹⁰Jesu ing abasang, “Thangnang ing ympeehchu ynchiiva vokhehkho infhuw chii ynniih ama meechu achuwva ichii nang ing manghuw taniive, nang ing niihromva nachiiva, amanche naningna iringnii chiichu ama ing ipirom vachiiva.”

¹¹Rupanuw inche abasang, “Oja, nangve asuwhnii chimahchii, rumchii chuve thuwhpakna. Una changchii iringnii chiichu rivanate?

¹²Kemfhuw Jakop ing hava rumchii i ympeehva. Hane atuti aeng vokhehkho ensiir endaar aengche hava chii i in aeka hungomba. Amachu Jakop chungna nang ing iruunghak vachiikhang?”

¹³Jesu ing abasang, “Hava chii i ain mee chuve athar achii raarva tareeh,

¹⁴changvakonchu ki ing kapeeh chii ain mee chuve athar vokheh achii raarmahnii. Ki ing kapeeh chii inche aningna chiitaang ynsuwh naka, iringnii chiichu fuwrvaata vokhehkho amachu inche iringnii ringkum pivaata.”

¹⁵Rupanuw inche athamsah, “Oja, ki athar vokheh kachii araarniimah ing vokhehkho athar havane chiithaar kavasiniimah ing changchii chiichu kaningna ipirasa.”

¹⁶Yngkaera vokhehkho nafhuwsar hungeen nana vaanrireehra taka Jesu ing aningna ariir.

¹⁷Rupanuw inche abasang, “Atanii ipha ing kafhuwsar omahri.” Jesu ing ariir, “Chumna kafhuwsar omahri nachiichu.

¹⁸Natak chuve sapa runga ningna rakhii niisachii, ataraenkho naongfhuw ikho nafhuwsar rem mahva. Ichum chuve nariirsa.”

¹⁹Rupanuw inche ariir, “Oja, natak i jaepharchu vachii ichii kamamghuw pachii.

²⁰Kemfhuw Samaria upa aeng hava bungne Thangnang enrum ae, changvakonchu Jehudi nenuw chuve Jerusalem na Thangnang manden vaanchiiva nenchiinah.”

²¹Jesu ing aningna ariir, “Kariir manjiira, rupanuw, hava bungne changmahka Jerusalem na mee aeng apa Thangnang chu rummahva enchii aphachu hungvivaata.

²²Samaria nenuw chuve achuw kenrumva ichii manghuw mahchuw changvakonchu Jehudi kenuw chuve kemanghuwsa, yngkhaena ynchii imbe manlaenpeeh ichii i Jehudi tanii ithengva.

²³Atiive apha ichiichu hungviva, mee vakhae ing Thangnang laetha ruwrengchu empha raenche apachu rumvaatae vokhehkho ama ing amanden nache rumvaatae.

²⁴Thangnang i laetha chuva, amana laetha ruwreng inche mee aenche ichum ing rumvaatae.”

²⁵Rupanuw inche ariir, “Khrista jungtheng vaata ichiichu kamang-huwpa; ama ing ajuwnglaenche aangkhenglaang iriirpeeh vaata.”

²⁶Jesu ing ariir, “Ama meechu kiping, nangthoh atae chongnachuw.”

²⁷Changlaen siimche asebok ae ing enghunganri tahnache Jesu ing rupanuw yngkheh thoh hechong aechu muaeka ingik ae. Changvakonchu achuw ingkho rupanuw tingche ynchiiva tamah ae, amanche Jesu ningna chenkho yngkhaena rupanuw thohne hechong vachii tamahdeh ae.

²⁸Rupanuw inche abeer maka eenting mee vakhae ningna ahungriir,

²⁹“Ki ing kamu kasii mahri aajaeh ariircheh mee yngkheh ongna. Atakchu Khrista chuvamo va-enruw”

³⁰Mee aenche engkhuw bathen aeka Jesu ningtingche vaksae.

³¹Aphanache sebok ae ing Jesu ningna enthamsah, “Oja, isahfhuw thaeminchu omsa topoh sara.”

³²Changvakonchu Jesu ing abasang, “Nenuw ing nemanghuwmah kasah-fhuw omsa.”

³³Amana sebok ae ing enum ing ichong ae, “Achuw yngkheh ing isahfhuw avepeeh pentah enchii.”

³⁴Jesu ing abasang ae, “Kasahfhuw thaemin chuve ki ynjenchiir ing amandenchu ynjii vokhehkho kaningna itufhuw nong ympeehchu amanchinii ing itu chuva.

³⁵Nenuw ing nenriirchak yngkheh omna, ‘Tha manrii aanuwna ruwbaar kuumpha hempha vaata?’ Changvakonchu ki ing kariirnah amachuve, ruwrae ae i isajaeh ing ibuwrruw, chimuw aangkheng hungminsa, vokhehkho ikuumnii aphachu ahenphapa!

³⁶Imin chimuw aakuum meechu ruthamen pivaata, amanche chimuw aangkheng ichen naemah ing omnii khaenache mangkong vaata; changlaenche aavor vokhehkho aakuum aenche rotharoh phahak vaatae.

³⁷Enriirchak i ichumva, ‘Mee yngkheh inche basaeka, mee yngkheh inche akuum chaknah.’

³⁸Ruwbaar ikuumnii khaena ruwrae ting kachiirchuw changvakonchu nenuw anong tumahchuw; reentaang mee aeng tuaeka nenuw ing ikaanii nenphanah.”

³⁹“Kamu mahri, kasii mahri aajaeh ariircheh taka rupanuw ing ahungriir nache Samaria na ong mee aanem ing Jesu chu enthacha ae.”

⁴⁰Amana Samaria mee ae thengpoh aeka Jesu chu icheengnii khaena enthamsah tahnache Jesu ing amanache niniimeh icheeng.

⁴¹Ama achongjeer nache mee inempak ing enthacha ae,

⁴²vokhehkho rupanuw ningnache enriir, “Atiive kenuwkho kenthachapa, havi nang ing nahungriir khaena mahva, chang-vakonchu kentakrap ing achong ara kensiitah nava. Atiive atak i laaruw paam mee Ikarpeeh Khrista chuva ichii kemanghuwpa.”

⁴³Inii ninii acheeng aanuwting Jesu ing ama maphamchu bathenka Galili paam tingche sisa.

⁴⁴takrap ingkho saarkhii apeeh, “Jaephar chu apaam mee rap aengkho rumah ae.”

⁴⁵Galili ahungtung tahnache, amana heong mee aeng ahebariimsah ae, akhaechuve ajae Jerusalem na manlaennii kuurva enturae Jesu ing atu ari aajaeh emuvasah khaenava.

⁴⁶Aanuwnache Jesu ing chiichu vomrip chii amanguurnii Galili khuwna om Kana tingche athar hunganrisa. Kaparnaum ichii nache lipah aaruung yngkheh asapa ina heom.

⁴⁷Jesu ing Judia tanii Galili ting hungtungsa ichii ama ing asiitah nache, vaantuwh fhuwka asapa ithii ynthong ing inachu yndamnii khaenache Kaparnaum ting ivakpeehra achii.

⁴⁸Jesu ing aningna abasang, “Nenuw ing laetho ingiknii ae i mumah tanuwve nenuw achuw ingkho thachamah tanuw.”

⁴⁹Lipah aaruung inche abasang, “Oja, kasapa athikmah rirae avejiisara achii.”

⁵⁰Jesu ing aningna ariir, “Yngkaera, nasapa damvaata!” Ama ingkho ruka yngkaesa.

⁵¹Een ting ahungkae raenche lam nache ameenae aenche vatheng aeka rotharoh chong avereen ae amachuve, “Nasapa kha hungdamsa enchii.”

⁵²Asapa idamchu apha aajaeh vakhae nava taka asii aecha enuw ing embasang, “Ajaenii siim apha yngkhehna riitheng ichen enchii.”

⁵³Ampa ing aansii amachuve, ajaenii Jesu ing nasapa damsa achii apha thohkhe ynchim chaksa. Amana atak vokhehkho eengkuw engkheng Jesu chu enthacha.

⁵⁴Jesu ing Judia tanii Galili na ahungtung aanuwna laetho amandang havi inge vanii chaksa.