Read Moyon Naga JOHON 6 Bible Online

JOHON 6 - Moyon Naga bible

JOHON 6

¹Havi aanuwna Jesu ing Galili chiiding laar kahsa (Tiberia chiiding kho enchiinah ae).

²Amana mee inempak aenche aanuw enjii, akhae-chuve ama ing ina ae taklinache laetho tuka amandamchu emupa.

³Jesu ing reenting hangkarka asebok ae thohche ongsa.

⁴Atii Jehudi ae Manlaennii Kuurva aphachu hunganeengsa.

⁵Jesu ing paamkhuw athiirtah nache mee inempak ing aningting itheng aechu amupa, chukhaenache Philip ningna asii, “Havana mee ae chaap i mamaarnii khaena unakhe tar iriiva taruw?”

⁶Havi Jesu ing Philip chu abarungriir aabuwrnii vatah, atatak chuve ama ing ynchii tuvakate ichiichu amanghuw vasahva.

⁷Philip ing abasang, “Dinari chanii ing tar eeriitah nakho topohter thung-cheh mahnii ae.”

⁸Asebok yngkheh Andriu ichii Simon Pitar naepa ing aningna ariir,

⁹“Nae-pang yngkheh ing tar runga re nga ynniimeh achisa; changvakonchu mee hangjaeh inem nenche amachupang inche ynchii tuniiva taruwkhang?”

¹⁰“Mee aekha mangong aeruw taka Jesu ing eningna ariirpa. Ama minchu fuwr inempak om. Chutahnache mee aangkheng ongsae, amana pasar aechu lising runga vakhae ae.”

¹¹Jesu ing tarchu verika bor apeeh aanuwna, asebok ae ningting jepika, amana asebok aenche mee vakhaechu empeehpa. Nga chukho aanghakjaeh ing bor pika enven ynva ing ensah ae.

¹²Mee vakhaechu enven abava aanuwna Jesu ing sebok ae ningna ariir, “Abarii chaap aekha mampaam rudeh ing khuumruw.”

¹³Chutahnache tar rungarik ensahnii tanii abarii chaapchu engkhuum tahnache buruk suum ariiniichak isip emangkong.

¹⁴Jesu ing ama laetho atuchu emutah nache, mee aenche laaruw paamna jungtheng vaata enchii jaepharchu havi vachii vatah ta aeka enriir.

¹⁵Mee aenche atakchu ruw ae naka iruwng amanvinii tuteehva enchiichu Jesu ing amanghuwtah nache taenka reenting hangkarsa.

¹⁶Khuri ajungvitah nache Jesu sebok aenche chiidingchu enjepuwhpa,

¹⁷ruwkuwng nache hangong aeka Kaparnaum laartingche ynriae. Jaen hungvi ipha ing Jesu ing embuum ting juwngmahsa.

¹⁸Amana khuwsii ivaanleh inche chiichu aanohpa.

¹⁹Sebok aenche meil runga kuruk vakhae enjehuur aanuwna Jesu ing chii taklina ivasichu emutah nache ynchiksae.

²⁰Amana Jesu ing ynchik mahruw kiping taka eningna averiir.

²¹Enuw ing Jesu chu mangong nungka enchiipak ing ruwkuwng nache emangong tahnache, enuw ing vatungniiva enchii aphamchu anikung-narap vatungsae.

²²Akhuwvaar nache chiiding laarna mee inempak ongpoh aenche ruwkuwng yngkhehpang omvatah ichii engaansii. Enuw ing Jesu chu sebok ae thoh ynruwhak mahsa anumpang ing emahpa ichii emanghuw.

²³Tiberias tanii ruwkuwng areh chuve Aafhuw ing tarchu bor apeeh aanuwna ensah-nii yntong tingche ivasi aechu emu.

²⁴Amana enuw ing ruwkuwng nache Jesu vokhehkho asebok ae chukho ynvaemahsae ichii emutah nache, enuw ing ruwkuwng nache hangong aeka Jesu ijong Kaparnaum tingche vasisae.

²⁵Enuw ing Jesu chu chiiding denkhehna engaantuwhfhuw tahnache aningna enriir, “Oja, utaraenkhe havane ivatung vachii?”

²⁶Jesu ing eningna abasang, “Ki ing neningna atatak ing kariirnah: Nenuw ing ki ynjongchuw i laetho katukha nemutah namahva, tar kha nenven ynva ing nensahtah nakhenva.

²⁷Maangvachii isahfhuw khaenache nong tumahruw; ama changdenna ichen naemah ing chitha paarvachii ringkum phanii khaenache nong turuw. Haviva Mee Sapa inche thaemin ipiva chiichu, akhaechuve ampa Thangnang inche ataklina ahakpa.”

²⁸Chutahnache enuw ing aningna ensii, “Thangnang ing kenuwchu tuae naka achii amandenchu kenuw ing ynchii tuchehva kenchiiva?”

²⁹Jesu ing abasang ae, “Thangnang ing tutanuwka achii amanden chuve ama ing ajenchiir ningnache ithacha chuva.”

³⁰Enuw ing embasang, “Ynchii laetho tutaniika kemutahna nangchu thachava kenchii vachii? Ynchii tuvaanta?

³¹‘Ama ing thangbaen tanii eningna isahfhuw manna jepika ensah ae taka ynziih vaangche, kemfhuw fhuwven aenche paamfhuw nache manna ensah ae.’ ”

³²Jesu ing eningna ariir, “Ki ing neningna atatak ing kariirnah, Mosi ing thangbaen tanii tar ympimahva; changvakonchu kapa ing thangbaen tanii tarchu ympeehva.

³³Thangnang ing ympeeh tar chuve thangbaen tanii juwngka laaruw paamna iringnii apeeh chuva.”

³⁴Enuw ing aningna enriir, “Oja, keningna ama tarchu anasiir ipisara.”

³⁵“Ki iringnii tar chuping taka Jesu ing eningna ariir. Kaningting ihuung meechu utaraenkho aven chaammahnii; vokhehkho ki ynthacha mee inche utaraenkho achii raarmah reehnii.”

³⁶Ataraenkho neningna kariirnah, nenuw ing ki ymmupa-chuw amachu ithachamah tanuw.

³⁷Kapa ing kaningna ymmansir vakhae ae chuve kaningting huung vaatae. Kaningting ihungruwh chaap achuwkho hedamahning,

³⁸akhae-chuve laaruw paamne ijuwng ingchu ki kamanden itunii khaena mahva, ki ynjenchiirchu amanden tunii khaenava.

³⁹Ki ynjenchiir ing aman-den chuve haviva, ama ing kaningna ympeeh aechu yngkheh pangkho maangrudeh inche achinii inii nache iringkiir emphanii chuva.

⁴⁰Kapa ing amandenrem chuve Mee Sapa chu munaka aningna athacha vakhaechu ichen naemah iringnii ipha chuva. Amana ki ing achinii inii nache manringva katae.

⁴¹“Ki thangbaen tanii ijungtheng tar chuping taka ama ing ariirtah nache, enuw ing ataklina inempak chongsae.”

⁴²Chutahnache enuw ing enriir, “Hava mee i Josep sapa Jesu khamah vakhang? Inuw ing ampa re amnuw ymmanghuwsae. Amachu ynsaangkhe ama ing thangbaen tanii ijungtheng ping achiiva?”

⁴³Jesu ing eningna abasang, “Nenuw nensungsahna ichong supsup chuwkha manchenruw.

⁴⁴Ki ynjenchiir kapa ing sirmah naka achuw ingkho kabuumne huungcheh mahnii, ihuung mee chuve achinii inii nache manring vakata.

⁴⁵Jaephar aeng embaziih omna, ‘Thangnang inche mee vakhae-chu manchuw vaata.’ Achuw yngkheh ing kapa chongchu siika vokhehkho amanjii chuve kaningting ihuungva.

⁴⁶Thangnang tanii ama inche mahna-ka achuw yngkheh inche kapa chu amupa kachiimahva; Atak chuve ampa chu amupa.

⁴⁷Neningna atatak ing kariirnah: Achuw yngkheh mee ing aningna athacha chuve ichen naemah ringkum aphapa.

⁴⁸Ki iringnii tar chuping.

⁴⁹Nenfhuw fhuwven aeng paamfhuwna manna ensah vakonchu ithii ae.

⁵⁰Changvakonchu thangbaen tanii ijungtheng changchii tarchu asah achuw yngkheh mee chuve thikmahnii.

⁵¹Ki i thangbaen tanii ijungtheng iring tar chuping. Achuw yngkheh ing havana tar i sanave, ama ichen naemah ing ringvaata. Amanche laaruw paam mee ringnii khaena pivakachii tar chuve ki kasha iva.”

⁵²Chutahnache Jehudi ae enareer sahna chong suwhka enriir, “Ynsaang khenche atak ashachu isahnii khaenache ipiva chiiva?”

⁵³Jesu ing abasang ae, “Atatak ing neningna kariirnah: Mee Sapa ashachu samah tanuwka vokhehkho asiichu inmah tanuwve, neningna ringkumchu omahnii.

⁵⁴Kasha asah ae amanche kasii ain mee ae chuve ichen naemah iringnii emphasa, amanche achinii inii nache enuwchu manringva katae.

⁵⁵Kasha i thaemin rem chuva, vokhehkho kasii i infhuw rem chuva.

⁵⁶Kasha asah amanche kasii ain meechu kaningna ongva, vokhehkho ki ing aning nache ongning.

⁵⁷Iring kapa inche ynjenchiir vakhaka, akhaenache kikho iringping. Achuw yngkheh ki ynsah mee inche kakhaena ringvaata.

⁵⁸Havana tar iva thangbaen tanii ijungthengchu; ajae nenfhuw fhuwven aeng ensah aanuwting ithii ae tar khathohkhe aanghak mahva. Hava tar i asah mee chuve ichen naemah ing ringvaata.”

⁵⁹Kaparnaum meekongniina Jesu ing amanchuw aere havi ariirva.

⁶⁰Aanuw ajii mee aanem aenche havi ensiitah nache enriir, “Havi chuve akhopseh ing pirsa. Achuw inche rungaechehva takhang?”

⁶¹Aningna riirmah khang ae nakho Jesu ing ichong aechu manghuwka eningna ariir, “Havi inge nennungae niimah omvachang?

⁶²Mee Sapa inche aburna aongnii tingche hangkarchu nemu vanacha ynchii khava chang?

⁶³Ringkum ympeehchu Thangnang laetha vatah; laaruw mee ruwreng chuve ikanii yntangakho omah. Nening-na chong kariir vakhae i laetha chuva vokhehkho iringnii ympeeh chuva.

⁶⁴Changvakonchu achuw yngkheh chuve nenthachamah ynvaenachuw.” (Achuw yngkheh chuve thachamah naka rensavachii mee omna ichiichu Jesu ing aburna basenka amanghuw vasahva.)

⁶⁵Jesu ing ber buka ariir, “Chukhaenache neningna kariirva amachuve, kapa ing rumah tanga naka achuw ingkho kaningting huungcheh mahnii.”

⁶⁶Havi khaene Jesu aanuw ajii mee aanem aenche enganuw ynriaeka sihakmahsae.

⁶⁷Amatah nache Jesu ing asebok suum ariinii ae ningtingche asii ae, “Nenuwkho bathen nungka ynchiinahchuw?”

⁶⁸Simon Pitar ing abasang, “Aafhuw, kenuw ing achuw ningtingche siva kenchiiva? Ichen naemah ringkum ympeeh chongsaechu nang ing nadeensa.

⁶⁹Atiive kenuw ing nang i Thangnang tanii ijungtheng ynthiing yngkheh vachii ichii kenthachapa vokhehkho kemanghuwpa.”

⁷⁰Jesu ing abasang, “Ki ing mee suum ariinii nenuw i kaateer vachuw. Changvakonchu nengkaarna mee yngkheh chuve umlae chuwngna!”

⁷¹Havana ariir i Simon Iskariot sapa Judas achiiniiva. Akhaechuve Judas ing sebok suum ariinii kaarna ynvae-khang nakho ama ing rensaro achiitah nava.