Read Moyon Naga JOHON 8 Bible Online

JOHON 8 - Moyon Naga bible

JOHON 8

¹Mee vakhae ama ama a-eenting yngkaesae, changvakonchu Jesu chuve Oleep Bung ting sisa.

²Ziing imaenpak nache ama ing Rumniieen tingche junganri reehka, mee vakhae inche aningting thengpohsae. Amana mee aechu ama ing amanchuw.

³Thiimthang aere Pharisi ae inche ichuwhmah rupanuw yngkhehchu veruw aeka vokhehkho mee vakhae kaarnache mangiir aeka

⁴enuw ing Jesu ningna enriir, “Oja, havana rupanuw inge ichuwhmah atu khaena-che kensuwrva.

⁵Mosi vajeer chonghak nachembe hangchii rupanuw i rung ing deengtanuwka thehva nenchiiva achiinah. Atarae nang ing akhaene ynchii nariirnah?”

⁶Havana enriir chong i enuw ing Jesu chu mennungka manraar kenta enchii khaenava. Changvakonchu Jesu ing jukhupka akikchar ing ruwruwna abaziih.

⁷Enuw ing nuum aeka ensiitah nache ama ing hangiirka eningna ariir, “Nengkaarna achuw yngkheh isii atumahrideh mee inche ataklina maensa ing rung inche deengrasiing.”

⁸Amana athar jukhupka ruwruw nache abaziih.

⁹Enuw ing ama chongchu ensiitah nache, upa na ing yngkheh yngkheh ynjuwh chirsae, amana Jesu chu amaensokna ingiir rupanuw thoh chenpang emahpa.

¹⁰Jesu ing hengenka rupanuw ningnache ariir, “Rupanuw, enuw utingpae? Nangchu achuw ingkho ymmanraar mahva?”

¹¹Rupanuw inche abasang, “Oja, achuwkho omah.” Changvaniive sakna taka Jesu ing ariir, “Ki ingkho nangchu manraarmah chii ing, chang-vakonchu nang yngkaenana athar isii tumahra.”

¹²Jesu ing Pharisi ae ningnache athar chongka ariir, “Ki i laaruw paam ireng chuping. Kichu ynjii mee achuw yngkheh inche ynthim nache simahnii, changvakonchu ringkum irengchu phavaata.”

¹³Pharisi aenche aningna enriir, “Nang chuve nataksah saarkhii napeeh-sah vatah; nang ing nariir i irifhuw omah.”

¹⁴Jesu ing eningna abasang, “Chang-mahva, kataksah saarkhii vakhang nakho kariir i ichumva, akhaechuve ki ing utanii ithengping amanche uting sining ichiichu kamanghuwsa. Nenuw ing utanii ithengping changmahka uting sining ichiichu manghuw mahchuw.

¹⁵Nenuwve laaruw mee barungriir ing vajeer nentunah; ki chuve achuw taklinakho vajeer tumah ing.

¹⁶Changvakonchu ki ing tuvakachii maniive kavajeer chuve chumvaata, yngkhaena ynchii imbe vajeer itu nache kanumpang mahping; kichu ynjenchiir kapa inche eenruwfhuwsa.

¹⁷Nenuw nenchonghak nakhe havi ynziihna amachuve, mee ynniimeh ing saarkhii omnave ichumva.

¹⁸Ki kataksah ing saarkhii katusa, amanche kichu ynjenchiir kapa inche kataklina asaarkhii ngiirna.”

¹⁹Enuw ing ensii, “Nangpa chu ukhova?” “Nenuw ing katak kho kapa kho manghuw mahchuw taka Jesu ing abasang ae. Nenuw ing ki imanghuw tanuwve, kapa chukho nenuw ing manghuwva nenchiiva.”

²⁰Jesu ing hava vakhae i Rumniieen sungna om seer upu omnii kuurnache amanchuwpae; changvakonchu achuw ingkho atakchu suwrcheh mahsae, akhaechuve akhaena aphachu hempha-mahrisa.

²¹Athar vokheh Jesu ing eningna ariir, “Ki sivakata; nenuw ing ki ijongva nenta, amanche isii nentu inche thikva nenta. Nenuw ing kasinii tingche sichehmah tanuw.”

²²Chutahnache Jehudi aatuaricheh aenche enriir, “Ama ing ariirnah amachuve, ama asinii tingche inuw sichehmah manuw. Havi ataksah ing yntheh savachii ariirniiva ynchiiva?”

²³Jesu ing abasang ae, “Nenuw chuve laaruw mee vachuw, changvakon-chu ki chuve chungtanii ijuwngping. Nenuw chuve laaruw tanii vachuw, changvakonchu ki chuve laaruw tanii mahping.

²⁴Amatah nachemba neningna kariirnah, nenuw isii nentu nache thikva nenta. Nenuw ing ki i Aafhuw chuva tatanuwka ithachamah tanuwve, isii nentu nache thikva nenta.”

²⁵Enuw ing aningna ensii, “Nang achuw vachii?” Jesu ing abasang ae, “Aburna basen ingka neningna kariir vasahva.

²⁶Ki neningna kariirfhuw inempak omna, vokhehkho vajeer tufhuw inempak omna. Ki ynjenchiir chuve ichum ing isipva, amanche aningtanii kasii pangchu laaruw mee ningna kariirva.”

²⁷Jesu ing ampa khaena ichongchu enuw ing manghuw chehmah ae.

²⁸Chutahnache ama ing eningna ariir, “Nenuw ing Mee Sapa chu nengathoh raenche ki i achuwva ichiichu manghuwva nenta, amanche kataksah ing ynchiikho tumah ing, changvakonchu ki ynjenchiir kapa inche yntahpeeh inuwzii ing katuva ichiichu nenuw ing manghuwva nenta.

²⁹Kichu ynjenchiir ama inche eenruwfhuwsa, ama ing kichu ibathen mahdeh, akhaechuve ki ing abarungriir penniichu anasiir katunah.”

³⁰Jesu ing ariirchu aasii vakhae aenche aningna athacha ae.

³¹Jesu ing aningna athacha vakhae ae ningnache ariir, “Ki ing kamanchuw-chuw i manjii tanuwve, atatak ing kasebok vachuw;

³²amanche nenuw ing ichumchu manghuwva nenta, vokhehkho ichum inche ruwkuwrjoh imanpha vaata.”

³³Enuw ing aningna embasang, “Kenuw Abraham tuti pung, amanche utaraenkho kenuw ing achuw yngkheh suwhkho ynsuwhmah ung. Amachu nang ing ruwkuwrjoh phavanenta nachii i ynchii nariirniiva?”

³⁴Jesu ing eningna ariir, “Ki ing neningna atatak ing kariirnah: Isii atu mee chaapchu isii suwhva.

³⁵Suwh inche eengkuw sungna ingam ing paarchehmah, changvakonchu sapa chuve ingam ing ynriijaehna.

³⁶Sapa inche ruwkuwrjoh imanpha nave, atatak ing ruwkuwrjoh nenphava.

³⁷Nenuw i Abraham tuti vachuw ichiichu kamanghuwsa. Changvakhang nare nenuw ing kichu ithehnii nentunah, akhaechuve kamanchuw chaapchuw i rinungka tamahchuw.

³⁸Kapa ing ymmansii chaap khaenache ichongping, nenuw chuve nenpa ing ariirchu nentuva.”

³⁹Enuw ing embasang, “Kenuw kempa chuve Abraham va.” “Nenuw Abraham siti vatanuwve, ama ing atu arichu tuva nenchiiva, taka Jesu ing abasang ae.

⁴⁰Havana kariir vakhae i Thangnang tanii kasiichu kariir vatah, changvakonchu nenuw ing kichu ithehnii nensirnah. Abraham ve jinge tamah!

⁴¹Nenpa aeng entuchu nenuw ing nentunah.” “Kenuw kempa chuve Thangnang chupang vatah amanche kenuw ama asiti chupung ta aeka embasang.”

⁴²Jesu ing eningna abasang, “Thang-nang chu nenpa rem vanave, nenuw ing kichu nening imansiih romva nenchiiva, akhaechuve Thangnang ningtanii juwng ingka atarae hane ongning. Kataksah ing ijuwng mahping, kapa ing ynjenchiirva.

⁴³Ki ing kariir i yngkhaena nemanghuw chehmahva? Havi akhaechuve kajaera i nenrungaechehmah tahnava.

⁴⁴Nenuw i nenpa umlae siti vachuw, amatah nache nenpa ing amandenchu aanuw jiinungka nenchiiva. Aburna basenka ama i mikthehva amanche ichum nache ongchehmah, akhaechuve ataklina ichum omah. Ama ing ynraar ariir raenche aningna om anunuchu atuva, akhaechuve atak i ynraar ariir meeva amanche ynraar chaap vakhae ampa chuva.

⁴⁵Changvakonchu ki ing ichumchu kariirva, amatah nache nenuw ing kichu ynthachamah vachuw.

⁴⁶Achuw ing ki i isii icherva tatanuwka riirchehva nenta? Ki ing ichumchu kariir raenche, ynchii khaena nenuw ing ynthachamah vachuw?

⁴⁷Thangnang tanii mee inche Thangnang chongchu arungae-nah. Nenuw chuve Thangnang taniimah vachuw khaka nenrungae-chehmahva.”

⁴⁸Enuw ing aningna embasang, “Kenuw ing nang i Samaritaan tanii vachii amanche umlae ing nataklina chuwngna kenchiitahna chummah nungkhang?”

⁴⁹“Ki kataklina umlae chuwngmah taka Jesu ing abasang ae. Ki chuve kapa kaajanah, amachu nenuw ingve eejamahchuw.

⁵⁰Kataksah ing ynjasuwh phanii khaena kajong mahva; changvakonchu amachu aajong yngkheh omna amana atakrem inche vajeer tuvaata.

⁵¹Ki ing neningna atatak ing kariirnah: Achuw yngkheh ing kachongriir i manjiither nave, ama ing utaraenkho ithii mumahnii.”

⁵²Enuw ing aningna enriir, “Atii isajaeh ing kemanghuw pachii ama-chuve, nataklina umlae chuwngna. Abraham kho ithii, amavaangche jaephar aekho ithii ae, amachu nang ing kachongriir amanjii mee vakhae inche thikmahnii nachiinah.

⁵³Ithii vasah kempa Abraham chungna iruunghak vachii? Vokhehkho ithii jaephar aechu khomva! Nang achuw-ping nachiinah?”

⁵⁴Jesu ing abasang ae, “Kataksah ing ympah ningve, amachu yntangakho ynsuwhmahnii. Ki ymmanpah chuve kapa vatah, amachu nenuw ing kempa chuva nenchiinah.

⁵⁵Atakchu nenuw ing manghuwmah richuw, ki chuve kamanghuwsa. Ki ing atakchu manghuwmah ing taningve, nenuw vaange mee ynchaechu kikho ynsuwhsing. Changvakonchu ki ing kamanghuwsa amanche achongriir chukho kamanjiisa.

⁵⁶Nenuw nenpa Abraham inche kaaniichu muvachii tahna arotha amanroh, vokhehkho muka inempak arotha iroh.”

⁵⁷Enuw ing aningna enriir, “Nang kum songakho phamah richii amanche nang ing Abraham chu namuva?”

⁵⁸Ki ing neningna atatak ing kariir-nah, “Abraham ing aommah rirae, ki om vasahping.”

⁵⁹Amana enuw ing rung ichuwm aeka deengkenta enchii, changva-konchu Jesu ing ynthuurka rumniieenchu abathen.