Read Moyon Naga JOHON 9 Bible Online

JOHON 9 - Moyon Naga bible

JOHON 9

¹Jesu ing avasiraenche, amik ichu ing ynring vasah mee yngkheh amu.

²Amana asebok ae ing aningna ensii, “Oja, amik ichu vasah ing ynringchu achuw ing isii atutah nava? Ataksah ingva changmahka aanring aepae?”

³Jesu ing abasang ae, “Havana mee inge isii atutah namahva vokhehkho aanring ae ing isii entutah namahva, changvakonchu Thangnang ruwreng nongchu ataklina aandangnii khaenava.

⁴Kichu ynjenchiir anongchu inuw ing siim nache tuvaanchiiva; jaen ahungvi raenche achuw ingkho nong tuchehmah.

⁵Ki ing laaruw paamna kaongraenne, laaruw paam khaena ireng chuping.”

⁶Havi ariir aanuwna Jesu ing ruw-ruwna bachirka vokhehkho inuungchu abachir inche manuumka amik ichu mik nache itaehka

⁷vokhehkho ariir, “Nang ing vaknana Silom rumchii nakhe namae vachaamra.” (Havana ruming Silom rumchii i achiir achiiniiva.) Chutahnache ama ing vakka amaechu achaampa vokhehkho imucheh phaka hunganrisa.

⁸Ama aveenchaang ae vokhehkho mamaenna aniihmee ing aomlae amuvasah mee aenche enriir, “Hava mee i ongchakka aniihmee khamah vakhang?”

⁹Mee topoh aenche ama khava enchii; areh aenche ama mahva, amathoh yntinpaetah enchii. Chutahnache ataksah ing ki ama mee khaping taka ariir.

¹⁰Enuw ing ensii, “Chunuwcha ynsaangkhe imu naphava?”

¹¹Ama ing abasang ae, “Jesu ichii mee inche inuung manuumka kamik nache itaehka kaningna nang Silom ting vaknana namae vachaamra achii. Chutahnache ki ing vak ingka kavachaam tahnache imu kaphava.”

¹²Enuw ing una ongna ta aeka ensiicha, ama ing ki manghuwmah ing taka abasang ae.

¹³Aanuwnache enuw ing mamaenna amik ichu meechu Pharisi ae ningting enveruwpa.

¹⁴Jesu ing inuung ma-nuumka amik amandamchu Deennii inii nava.

¹⁵Pharisi aenche athar aningnache ynsaangkhe imucheh naphava ta aeka ensiireehpa. Ama ing eningna ariir, “Ama ing kamikna inuung itaehka, kachaam tahnache atii kamuchehva.”

¹⁶Pharisi topoh aenche enriir, “Hava mee i Thangnang tanii mahva, akhae-chuve ama ing Deennii inii vajeer chonghakchu manjiimah.” Changvakonchu areh aenche enriir, “Ynsaang khenche isii icher mee ing jinge ichii laethochu tuchehva takhang?” Amana enruwrsah nache asiksik suwhsae.

¹⁷Chutahnache Pharisi aenche aningnache athar ensii, “Namik ichuchu amandam vakhaka, ama akhaena nang ing ynchii nariirnah?” Ama ing ariir, “Ama i jaephar va.”

¹⁸Jehudi aatuaricheh aenchembe amik chuka atii amuchehpa ichiichu aanring ae een ae naka, vokhehkho eningna ensiimahri raentaangche thacha nungka tamahsae,

¹⁹Enuw ing eningnache asii ae, “Havi mikchu ing nenbaring nensiti remva? Ynsaangkhe atii ama ing amuchehva?”

²⁰Aanring aenche embasang, “Kenuw kensitiva vokhehkho mikchu ing ynringva ichiichu kemanghuwsa;

²¹changvakonchu atii ynsaangkhe amuchehva ichii chuve manghuwmah ung vokhehkho achuw ing amik i aamongpeehva ichii chukho manghuwmah ung. Atak siiruw; ama upasa, ataksah ing ibasang vaata.”

²²Ama aanring aeng havi enriir i Jehudi aatuaricheh aechu enchii khaenava, akhaechuve achuw yngkheh mee ing Jesu chu Khrista va tanaka thacha nave meekongnii tanii kakvataruw ichii engaanrunii om vasah tahnava.

²³Chukhaenache aanring aenche ama upasa, atak siiruw enchiiva.

²⁴Chutahnache enuw ing mikchuchu avomanii een aeka aningna ensii, “Thangnang maana ichum riirva kata tanana chongreep tura! Nang ymmandam mee i isii icher meeva ichii kenuw ing kemanghuwsa.”

²⁵Ama ing abasang ae, “Atak i isii icher meeva, icher mee mahva ichii ki manghuwmah ing; ki ing kamang-huwsah yngkheh chuve, ajae mikchu mee vakhang ningle, atii chembe kamupa.”

²⁶Enuw ing ensii, “Ama ing naningna ynchii atu? Ynsaangkhe ama ing namik amandamva?”

²⁷Ama ing abasang ae, “Ki ing neningna kariir vasahva, amachu nenuw ing rungaemahchuw. Ynchii khaena nenuw ing athar siinungka nenchii vareeh? Nenuwkho asebok ynsuwh nungka nenchiiva?”

²⁸Enuw ing ataklina siraap piaeka enriir, “Nang chuve ama asebok vachii, amanche kenuw chuve Mosi sebok pung.

²⁹Kenuw ing kemanghuw chuve Thangnang ing Mosi ningna ichongva, hava mee khaena chembe utanii ithengva ichii kenuw manghuwmah ung.”

³⁰Ama ing abasang ae, “Amachuve ingiknii varaem! Nenuw ing utanii ithengva ichii manghuwmahchuw, changvakonchu ama ing kamik ichuchu amandampa!

³¹Inuw ing ymmang-huwsah chuve isii icher mee ningna Thangnang ing rungaepeehmah, chang-vakonchu achuw yngkheh Thangnang arum vokhehkho amanden atu mee ningnache arungaepeehnah.

³²Laaruw paam abasenlimna achuw yngkheh mee ing mikchu amandam ichii siimah ridehmuw.

³³Havana mee i Thangnang taniimah vaniive, ama ing ynchiikho tuchehmahnii.”

³⁴Enuw ing embasang, “Nang isii icher ing ynring chiika kenuwchu man-chuw kachii ynchii vachii?” Amana enuw ing atakchu meekongnii tanii engkakpa.

³⁵Jesu ing meekongnii tanii engkakchu asiipa, vokhehkho ama ing yntuwhfhuwka asii, “Nang ing Mee Sapa ningnache nathachase?”

³⁶Ama ing abasang, “Oja, atakchu achuwva, kaningna iriirpeehra, amana chembe ki ing aningnache thacha chehva kata!”

³⁷Jesu ing aningna ariir, “Atakchu nang ing namupa vokhehkho ataraene nang thoh chonghak nachuw.”

³⁸Aafhuw, kathacha nahchii taka Jesu maensokna vakhupka arumsah.

³⁹Jesu ing ariir, “Laaruw paamne vajeer tunii khaena ijuwngping, chukhaenache amumah aechu imunii khaena amanche amu ae inche emumahnii khaenava.”

⁴⁰Pharisi topoh amana ong aenche ariir chongchu siiaeka aningna ensii, “kenuwkho kemik ichuva?”

⁴¹Jesu ing eningna ariir, “Nenuw nemik ichuvanave, nentaklina ynraar omahva chiiva; changvakonchu atarae nenuw ing kenuw kemusa nenchii vakhaka nentaklina ynraarchu omjaeh tahna.”