Read Moyon Naga NONGDANG 1 Bible Online

NONGDANG 1 - Moyon Naga bible

NONGDANG 1

¹O Theophilus, aren kathiimbur ne, ki ing kabaziih akhaechuve Jesu ing aateer vasah chongthang ae ningnache ynthiing laetha ruw-reng ajaar ing chonghak apeeh ae nuwting,

²vokhehkho Jesu chu ajeri aanii ipha inche ama ing nong atu ari amanchuw ae, abasenraennii ing aangkhenglaang khaena chenva.

³Inii nisommanrii sungna chongthang ae ningnache yndangka vokhehkho Thangnang iruwngpaam khaena chenkho chongka, Jesu ing ijachaam akhaang aanuwnache atatak ing atakrap ringna ichiichu ynghuwnii aajaeh ing eningna yndangsa.

⁴Jesu ing enuwthoh engaanruw raenche eningna chonghak ajeer: “Nenuw Jerusalem tanii ympeenmah dehruw, kapa chongreepchu ipivaata amanche nenuw ing kaningtanii nensii havi hehahjaehruw;

⁵Johon inchembe chiithoh baptais amantupa, changvakonchu nenuw chuve inii topoh aanuwting laetha thohche baptais tuvanenta.”

⁶Enuw ing theng aeka engaang-kongpoh raenche aningna ensii, “Aafhuw atarae apha ichiinencha iruwngpaamchu Isrel ne pivana-chiiva?”

⁷Aafhuw ing eningna ariir, “Kapa ataksah aruwreng ing amanae apha vokhehkho kumthachu nenuw ing ynghuwpham suwhmah.

⁸Chang-vakonchu ynthiing laetha nentaklina atheng inii nache nenuw ing ruwreng phavanenta; amanche Jerusalem na ing Judia aangkhenglaangna vokhehkho Samaria amanche laaruw paam avadong mahtaang aphamsiirna kasaarkhii ynsuwhva nenta.”

⁹Jesu ing havi ariir aanuwting enuw ing engenraenche atakchu ajekipa vokheh-kho ruwrduh inche aruwpa.

¹⁰Amana Jesu ing thangbaen ting yngkaechu enuw ing engenraenche enruw, peen ivaarjaeh ing ynthong ae meeniimeh inche embuum nache ngiir aeka

¹¹enriir, “Galili mee ae, nenuw ing yngkhaena ngiirchuwka thangbaen ting nengenva? Nengkaar tanii Jesu chu thangbaen ting ajeki nenuw ing nemuvaang inge, Aafhuw ing havithoh aanghakjaeh ing jungtheng vaata.”

¹²Aanuwnache enuw ing Deennii inii nikheh thehvachii ing yndah Oleep Bung na ing Jerusalem ting junganrisae;

¹³Amana enuw ing khuwruung tingche jungruwh aeka engongniichak chung eensungka nache Pitar, Johon, Jems, vokhehkho Aandriu, Philip, Thomas, Bartholomiu, Methiu, Jems sapa Alphius, vokhehkho Simon Zilot amanche Jems sapa Judas enuw vakhae ong ae.

¹⁴Enuw vakhae inge rupanuw aethoh vokhehkho Jesu amnuw Meri amanche Jesu anae ae thohche purpoh aeka Thangnang tingche anasiirche enthamsahpa.

¹⁵Ama inii sungnache Pitar ing mee chaama somnii kaarna hangiirka chong ariir.

¹⁶“Kauw kanae ae, Jesu isuwrnii khaena lam aaching Judas khaene ynthiing laetha ing Devit nerna amanchong ynthiing thiimziihchu hungchumsa.

¹⁷Judas inuw yngkaarna nong tunii khaenache ynvae vasahva.”

¹⁸(Atii mee havi inge isamah nong atu ruthamen inche ruwrae yngkheh aariipa; amanche atakchu akhup athar ing thikka aven kiiphohsa vokhehkho ariir suwhporsa.)

¹⁹Havi khaene Jerusalem na ong mee vakhae ing amanghuwpae; chukhaenache ruwraechu enuw enchong ing Akeldama ichiichuve, sii ing aariisah ruwraeva ta aeka emphuwpa.

²⁰“Amachu ynthiing la nache ynziihka omna, ‘Ama aongniichu haangrasiing; amanache achuw ingkho ongmah rasiing.’ Havikho ynziihka omna, ‘Achuw yngkheh ing ama aphamchu virasiing.’

²¹Chukhaenache mee yngkheh Aafhuw Jesu hangring khaena saar-khii ipeehchu yngkaarna ynvaeva chiiva. Atakchu Aafhuw Jesu ing inuwthoh apha vakhaena ihuung iva yntufhuwrae ynvae,

²²Johon ing baptais khaena chong ajeer raennii ing Jesu chu yngkaar tanii thangbaen ting ajeri ipha ing ynvae meeva chiiva.”

²³Chukhaenache enuw ing Barnabas enchiichak Josep (Justus kho ta aeka embakepchak), re Mathias enuw meeniichu engathohpae.

²⁴Amana enuw ing thamsa aeka enriir, “Aafhuw nang ing mee vakhae barungriir namanghuwsa, chukhaenache havana mee ynniimehne

²⁵Judas ing anongpham maka ama ongniivachii ting isi achangdenna chongthang ynsuwh naka nong tuvachii naateerchu imansiisara.”

²⁶Enuw ing achuw ningna bukvaate ta aeka engkhaena engentah nache Mathias ningnache buksa, amana atakchu chongthang suum arii yngkheh kaartingche aruming ynvaesa.