Read Moyon Naga NONGDANG 13 Bible Online

NONGDANG 13 - Moyon Naga bible

NONGDANG 13

¹Entiok na om ruwrthiing nache jaephar ae vokhehkho mee amanchuw mee ae Barnabas, Simion (abachii yndup enchii), Sairene tanii Lusius, Herot iruwng ing ajuhsah anae ynsuwh vokhehkho Sol ong ae.

²Enuw ing Aafhuw rum aeka vokhehkho maaru entongraenche ynthiing laetha ing ariir, “Barnabas re Sol i kanong khaena ka-eennah ae, chukhaenache enuwkha atii asik ing ikhaepeehsa aeruw.”

³Enuw ing maaru tong aeka vokheh-kho enthamsah aanuwtingche entaklina engkik siiaeka embathenpae.

⁴Chukhaenache jinge ichii ing ynthiing laetha inche enuwchu chiir aeka tungsae; amanche amana ing Saipras iphanii ing ruwkuwng nache vaongsae.

⁵Enuw ing Salamis aphamchu vatung aeka engongraenche, Jehudi ae meekongnii chaap nache Thangnang chongchu entongpa. Changlae Johon kho enuwchu ibomnii khaena engaanruwfhuwpa.

⁶Enuw ing siaeka chiirikpaam vakhae iraenchir aeka Joppa envatung tahnache, amanache achuw yngkheh disuur ihae Thangnang chong aba-rungriir ynthiingmah ing atong aruming Bar-Jesus ichii Jehudi ae ichummah jaephar yngkheh yntuwhsae.

⁷Ama i chiirikpaam aafhuw aruming Sergius Polus ichii iveerpak pasarpa thohche ynruwhak ae. Chiirikpaam aafhuw inche Barnabas re Sol chu eenka Thangnang chongchu rungaenii khaena asirpa.

⁸Changlaenche disuur ihae Elimas (Grik chongna arumingva) ama inge chiirikpaam aafhuwchu Thangnang chong athacha tanii abarehnii khaena enuwchu ajeehniipa.

⁹Changvakonchu Pol kho enchiichak Sol ing ynthiing laetha ing sipka aningting enteehka ariir,

¹⁰“Runam barungriir ireen umlae sapa, ichumchu najeehnii nang Aafhuw ichum tachu ichummah ting bareh ningka nachii nanongtu tanii manchen mahva nachiiva?

¹¹Enla, atarae Aafhuw kikchu nataklina omna, nang namik chunaka apha topoh iseeh ing paam-khuw mumahtanii.” Aphachak nache ahakchaangchu ruwrduh re ynthim ing abaruwpa vokhehkho ama ing achuw yngkheh ningting akikna ibachuw nuwna iruwsaruw taka ajongpa.

¹²Ama isuwhchu paam aafhuw inche amutah nache, Aafhuw khaena entong nache aruwriimka athachapa.

¹³Atii Pol ing aanruwfhuw ae thohche Paphos na ing ruwkuwng ongnii aeka Pamphilia na om perga tingche hungruwhsae. Amanache Johon ing enuwchu bathenka Jerusalem tingche hunganrisa.

¹⁴Changvakonchu enuw ing Perga hengaraen aeka Pisidia na ing Entiok ting hungtungsae. Amana Deennii inii nache meekongnii sungting varuwh aeka ongsae.

¹⁵Amanache vajeer chonghak re jaephar ae thiimziihchu empa aanuwnache meekongnii aapuh aenche eningna chong enjeriirpa, “Unae ae, nenuw ing mee ae kaarna ynthohsahnii iriirfhuw chong omnave iriirpeeh saruw.”

¹⁶Chutahnache Pol ing hangiirka akik ithohka ariir, “O Isrel mee ae vokhehkho Thangnang achiipak mee ae rungaeruw,

¹⁷Isrel mee ae khaenache Thangnang ing afhuw fhuwven aechu eeteer peehpae vokhehkho enuw ing Ijeep lipahna marpah mee ing engonglae, enuwchu amanruung peehpae vokhehkho amatanii Thangnang inche abaen ithohka aruwpae.

¹⁸Vokhehkho kum sommanrii sungna lamrakna empa ynsuwhka enuw thohche ijachaam akhaang fhuwpae.

¹⁹Aafhuw ama ing kanaan paamna jaat sarii ipaar aechu mamaangka Isrel paam uurnii khaenache kum chamanrii songa chak apeehpae.

²⁰Aanuwting chembe jaephar Samuel ipha ing Aafhuw ama ing vajeer aafhuw aechu apeehpae.

²¹Ama aanuwnache enuw ing iruwng aniihsahpae; amana Thangnang ing Benjamin sungkhur tanii Kish asapa Sol chu kum somanrii khaena apeehpae.”

²²Changvakonchu Aafhuw ing marakna Sol chu mantehka Devit chu iruwng khaenache iteerka athinpa; ama akhaena Aafhuw ing asaarkhii ynsuwhka ariir, “Kabarung-riirna ki ing kamanden Jesse asapa Devit chu kaphapa, ama ing kamanden aangkheng tuvaata.”

²³Havana pasarpa tuti bahsuwm tanii achongreep inuwzii ing Thangnang ing Isrel khaena eekarpeeh Jesu chu ahenbasuwpa.

²⁴Ama ing aandangmah rirae Johon ing mee vakhae ningna maen ing isii icher tanii barungriir huungnii khaena baptais turuw taka thamin atongpa.

²⁵Chukhaenache Johon ing anong amanchiphana ariir, “Ki i achuwva ichii ing ymmanden nahchuw? Ki Aafhuw chumahping, changvakonchu kaanuwna thengvachii Aafhuw chuve akhingop runoh rapkho bajohva kachii matik ichasahmah meeping.”

²⁶Abraham eengkuw siti ae vokhehkho nengkaarna Thangnang achii mee ae, manlaenpeehnii chongchu ynning nache ynjebathenpeehpa.

²⁷Jerusalem na ong aere aapuh aenche Deennii inii chaapna jaephar ae chong chaap empachu manghuwchehmah aeka, enuw ing jaephar ae chong chaapchu mapung mampha aeka Jesu chu rumahsae.

²⁸Enuw ing atakchu ithehnii khaena amiraar tuwhchehmah khang ae nare, Aafhuw chu ithehnii khaena Pilaat ningna eniihpa.

²⁹Aafhuw khaena maen ing ynziihchu enuw ing mapung emamphachir tahnache, atakchu khros tanii basum aeka thaen sungna emantorpa.

³⁰Changvakonchu Thangnang ing Jesu chu ithii ae kaartanii amanringpa;

³¹Aafhuw thoh ynruwhak ing Galili na ing Jerusalem ipha inche ihungsihak ae ningnache Aafhuw ing inii aajaeh sungna yndangka, atarae enuw inche mee ae ningna asaarkhii ynsuwhnae.

³²Ataraenkho havane kenuw ing afhuw fhuwven ae ningna Thangnang chongreep omvasah isa chongchu neningna kenjereensa;

³³amachuve Thangnang ing Jesu chu hembasuwka inuw vakhae ynsiti ae ningnache areer abasuw chakpa; vokhehkho havi vaange avomaniinii ynthiing la nakho abaziihsa, “Nang i ki kasapa vachii; ataniine ki nangpachu ynsuwhsing.”

³⁴Thangnang inche ithii ae kaartanii Aafhuw chu amanringpa vokhehkho Aafhuw chu maangvachii ting utaraen-kho athar bukmahnii ichii khaenache Thangnang ing jinge ajeerpa: “Ki ing Devit ningna chongreep katu ynthiing vokhehkho bor vakhaechu neningna pivakachuw.”

³⁵Chukhaenache ynthiing la nakho ajeer sareeh, “Nang ing naningtanii ynthiing amachu maangvachii thaen mamumah tanii.”

³⁶Thangnang ing amandenchu Devit ing aring raenche tuka aanuwnache thiksa, amanche ampa ae thohche yndimsa vokhehkho thaensung nache maangsa.

³⁷Changvakonchu Thang-nang ing amanring Aafhuw chuve maangmahsa.

³⁸Chukhaenache kauw kanae ae, havi imanghuw peehruw, Aafhuw havi ajaarnache isii akuhva ta ungka kentongsahnah.

³⁹Nenuw Mosi vajeer chonghak ajaar ingkhe imanchum chehmah, changvakonchu Aafhuw Jesu havi ajaarna chembe mee vakhaechu chumpeh vaata.

⁴⁰Chukhaenache jaephar aeng enriir-chu nentaklina asuwhniimah ing ynriimsaruw:

⁴¹Enruw thosamah mee ae, ingikkho ngikruw, ichenkho chenruw; akhaechuve nenuw nema-tamna ki ing nong yngkheh katu; achuw ynngkheh ing amachu itongpeeh khangnakho thachamah tanuw.

⁴²Pol re Barnabas ing meekongnii tanii hungsuwh aeka engaangkae raenche mee aenche ihungvi Deennii inii nache vathengreeh nuwna imanchuwsaruw ta aeka enthamsahpae.

⁴³Mee aenche meekongnii tanii enchiir aanuwnache, Pol re Barnabas chu Judaijam ening Jehudi vokhehkho Reentaang mee aenche enganuw enjiipa. Chutahnache enuw ing Thangnang tungsiih nache icheepther ing empaarnii khaenache riir aeka engathohsahpae.

⁴⁴Hungvi vachii Deennii inii nache khuwruung sungna ong mee vakhae aenche Aafhuw isa chongchu isiinii khaena thengsae.

⁴⁵Jehudi aenche mee inempak itheng aechu emutah nache kallak aethoh ynruw ing Pol chu inahfhuw aeka vokhehkho ningjak apeehpae.

⁴⁶Changvakonchu Pol re Barnabas ing enthona isapak ing hangchongsae: “Amaensana Thang-nang chong isa i neningna itongpham isuwhva, changvakonchu nenuw ing rumah chuwka vokhehkho ichen naemah ringkumchu ipha nentaksah ing nemandenmah vakhaka, kenuw ing nenuwchu bathen ningchuwka reentaang mee aeting sivakenta.

⁴⁷Haviva Aafhuw ing keningna chonghak ympeehchu: Laaruw paam mee vakhaechu ikarpeeh phanii khaenache, ki ing nangchu reentaang mee ae ireng phanii kabasuw pachii.”

⁴⁸Hava chong i reentaang mee aenche ensiitah nache inempak enrotha rohka Aafhuw chong isachu emanpahpae, vokhehkho ichen naemah ringkum khaena aateer mee ae inche thacha mee hungansuwhsae.

⁴⁹Chutahnache Thangnang chong isachu ama paam lija nache ynjarsa.

⁵⁰Changvakonchu Thangnang ynden reentaang mee rupanuw ynjasuwh ae ningnache vokhehkho khuwruung aapuh ising iveer pasar aechu Jehudi aenche sinsa aeka, Pol re Barnabas chu rumah aeka empaam tanii enthurpae.

⁵¹Chukhaenache enuw ing enrumah aechu saarkhii ynsuwhnii khaenache engkhina pirkhuwhchu bahuw aeka Ikonium tingche sisae.

⁵²Entiok nache thacha mee aechu ariirfhuwchah ing rotharoh inche vokhehkho ynthiing laetha inche isip ae.