Read Moyon Naga NONGDANG 15 Bible Online

NONGDANG 15 - Moyon Naga bible

NONGDANG 15

¹Judia tanii mee topoh aenche Entiok nache theng aeka, Mosi vajeer chonghak inuwzii ing vinchiip tumah tanuwve ikarpeeh phachehmah tanuw ta aeka thacha mee ae ningna emanchuw.

²Amana Pol re Barnabas ing enuw thoh havi khaene inempak chong ynsangsae. Chutahnache Pol re Barnabas vokhehkho Entiok na ong mee topoh aechu chongthang aere upa ae ningna Jerusalem ting havi khaene isinii khaena engathohpa.

³Chukhaenache enuwchu ruwrthiing mee aenche vathak aeka, lam nache reentaang mee aeng embarungriir enghuungchu tong aeka Phonisia vokhehkho Samaria enghengaraenpa. Hava chong khaene thacha mee aechu inempak enrotha amanrohpa.

⁴Enuw ing Jerusalem envatungtah nache ruwrthiing aere chongthang ae vokhehkho upa aenche entakchu enghebariim, amana Thangnang ing enuw thoh ynruw ing atu ari nong vakhae entongpa.

⁵Changvakonchu Pharisi ae ningting ikop ae thacha ruwr topoh aenche enriir, “Reentaang mee ae ingkho vinchiip tuvachiipae vokhehkho Mosi vajeer chonghak chukho manjiiva chiipae.”

⁶Chong-thang aere upa aenche hava chongsuwh khaene ynseernii khaena yntuwhsae.

⁷Amana inempak chong engaansang tahnache, Pitar ing hangiirka eningna ariir, “Kauw kanae ae, isivasahna Thangnang ing kichu nengkaar tanii isa chongchu reentaang mee aeng sii ae naka enthachanii ing itongnii khaena eeteerchu nenuw ing nemanghuwsa.

⁸Amanche mee vakhae barungriir amanghuw Thangnang ing ynningna atu vaangkhe ening nakho ynthiing laetha ipeehchu arupa.

⁹Thacha jaarna embarungriir manseengka, ama ing inuw re enuw ruwrakna yntanga yntheep mangom mahsa.

¹⁰Chukhaenache fhuwven aengkho amanche inuw ingkho ireen ynchehmah riingkorchu thacha mee ae riingna maniichuwka atarae ynchii khaena Thangnang taklina chaang nengenva?

¹¹Changmahva! Aafhuw Jesu tungsiih jaarna enuw thoh aanghak ing inuwkho manlaenpeeh phavataruw ichii ynthachasa.

¹²Bar-nabas re Pol ing reentaang mee ae khaena Thangnang ajaarna laetho vokhehkho ingiknii aajaeh entu emanthangchu ensiitahna mee vakhae aenche huwdaejaeh ing ongsae.

¹³Enuw ing ichong emanchi nuwna Jems ing ichong: “Kauw kanae ae irungaepeehruw!

¹⁴Thangnang ing Aafhuw aruming khaena reentaang mee ae kaartanii mee aechu irinii khaenache amaensana ynsaangkhe amikna ichuwpae ichiichu Simon ing atongpa.

¹⁵Havi jaephar ae chong thoh yntinna; jinge ynziihka omna,

¹⁶“Havi aanuwna ki junganriva kata, Devit iruwngpaam itiih vasahchu athar seemva kata, vokhehkho imaang vasahchu athar seemva kata, amanche athar vokheh manpirva kata.

¹⁷Abarii areh laaruw mee aenche vokhehkho ka-eenvasah ae reentaang mee chaap aenche kaningting huungvaatae.

¹⁸Amaensana hava vakhae i ynriir-peeh Aafhuw ing ariirnah,

¹⁹“Ki ing kamanden chuve reentaang mee aeng Thangnang ting hunganheer aechu inuw ing manjamah ae manuw.

²⁰Changvakonchu enuw ing lae ting empeeh vasah ynthiingmah peeh isah rumah, naamak itu rumah, chaang emen ithii sha vokhehkho sii isah vakhae havi tanii idahnii khaena eningna chongthen baziih taruw.

²¹Yngkhaena ynchii imbe ajaen jaen basenka khuwruung chaapna Mosi vajeer chonghak yntongka Deennii inii chaapna meekongnii nache ympaava.

²²Amana chongthang aere upa ae, ruwrthiing chaap ynchumpoh ing engkaar tanii mee topoh iteer manuwka Pol re Barnabas thoh ynruw ing Entiok ting chiirtaeruw ichii ynrusae. Enuw ing thacha mee aeng ynjasuwhpak ing entu Judas enchii Barnabas re Silas engahthohpa.

²³Amana jinge ichii ing baziih aeka enchiirpae: Chongthang vokhehkho upa amanche unae vakhae aethoh kenuw ing Entiok, Sairia amanche Silisia na ong reentaang unae ae ningna salaam kentusahnah.

²⁴Kenuw ing chonghak kempeeh mahchuw mee topoh aenche kening tanii taen aeka neningna vinchiip tuvanenchiiva amanche Mosi vajeer chonghakchu ngahva nenchiiva ichii chong ing nenbarungriir amanja vokhehkho nenbarungriir amangiir chehmahchu kensiipa.

²⁵Kenuw ing barungriir yngkhehpang yntuwhpoh ungka, mee iteer manuwka keningsiih Barnabas re Pol thoh ynruw ing neningting ijechiir ing sakvaata ichii ing kemandenva,

²⁶enuw ae i Aafhuw Jesu Khrista khaena enringkum empeeh meepae.

²⁷Chukhaenache kenuw ing Judas re Silas kenjebathenva; enuw ing neningna hava chong khaene manthang vaatae.

²⁸Havana iriirmah arumah imahnaka nentaklina peehrik ynreenmah ing sakvaata ichii ing ynthiing laetha re kenuw ingkho kenrupa:

²⁹Lae ting ympeeh vasah isah rumahnii, sii isah vokhehkho chaangna imen sha isah rumahnii amanche naamak itu rumahnii. Nenuw ing hava vakhae i ngahtanuwve neng-khaena isava. Nentaklina isa ivaar omlasii.

³⁰Chukhaenache enuw ing chiir aeka Jerusalem nache vatungsae. Enuw ing mee aechu mangkong aeka chongthenchu empeehpa.

³¹Enuw ing empatah nache barungriir ynthohsahnii vakhaka enrotha irohsah.

³²Atii Judas re Silas entaksahchu jaephar paekhaka enguw enae aechu chong ing ithohsa aeka vokhehkho embarungriir emanpirpae.

³³Apha topoh enuw ong aeka enjechiir ae enguw enae ningting idaejaeh ing hunganrisae.

³⁴Chukhaenache Silas inchembe amana ong ing sakvaata ichii ing amandenpa.

³⁵Pol re Barnabas ing Entiok nache ong aeka mee areh ae thohche Aafhuw chongchu manchuw aeka vokhehkho entong.

³⁶Inii topoh aanuwna Pol ing Barnabas ningna ariir, “Inuw ing Aafhuw isa chong yntongnii khuwruung chaap nakhe unae aechu ynsaangkhe tanae ichii khaena athar ynrimanuwka va entae.”

³⁷Barnabas ing Johon Maak chu enuw thoh ynrufhuw ningka achiipa.

³⁸Changvakonchu enuwchu Paamphilia na bathen aeka nongtuna enuw thoh ynruw ing isihakmah havichu enuw ing ynrufhuwva enchiichu sakmahnii ichii Pol ing amandenpa.

³⁹Amana ynrumah aeka enuw ynsaesae, Barnabas ing Maak ruwka Saipras phanii ing ruwkuwng nache sisae.

⁴⁰Changvakonchu Pol ing Silas iteerka, thacha mee aenche entakchu bor piaeka enuw sisae.

⁴¹Ama ing Sairia vokhehkho Silisia phanii ing sika ruwrthiing vakhaechu amanpirpa.