Read Moyon Naga NONGDANG 17 Bible Online

NONGDANG 17 - Moyon Naga bible

NONGDANG 17

¹Pol re Silas ing Amphipolis vokhehkho Apolonia na hungsi aeka Jehudi ae meekongnii om Thesalonika nache thengsae.

²Pol ing atuchak inuwzii ing meekongnii nache varuwhka Deennii inii vathumchak ynthiing thiimziihchu enuw thoh manseerka,

³Khrista ing ijachaam khaangnaka ithii ae kaartanii hangring vachiichu, ki ing neningna katong Jesu havi ama Khrista chuva taka isajaeh ing ariir peehpae.

⁴Enuw engkaar tanii mee topoh Thangnang emanden Grik ae tanii mee aanem vokhehkho rupanuw ae aapuh tanii aanem ing thacha aeka Pol re Silas ningting kaahsae.

⁵Changvakonchu Jehudi aenche kallak aeka ihaesingmah ae kaartanii ichamah mee aechu khuum aeka mee emangkong. Enuw ing khuwruung nache ynnahnii basuw aeka amana Jason eenchu enuw ing nam aeka entakchu mee ae kaarna jenbasuwnii khaena enjong.

⁶Changvakonchu enuw ing entakchu entuwhmah tahnache, Jason vokhehkho unae topoh aechu khuwruung aapuh ae maana veruw aeka uung ae, laaruw paam akhup athar amanguur mee ae inge hava nenkho thengnae.

⁷Enuw ae i Jason ing aripae vokhehkho Jesu ichii iruwng reentaang yngkheh omna ta aeka enuw vakhae inge Kesar chonghak areh aphuw ing entunah.

⁸Amana meenem aere ama khuwruung aapuh aenche hava chong i ensiitahna jaasae.

⁹Chukhaenache enuw ing Jason vokhehkho areh aechu saarkhii tuaeka embathenpa.

¹⁰Amanache unae aenche anikungna Pol re Silas enuwchu jaenna Beria ting emansipa. Enuw ing amanache envatungtah nache Jehudi ae meekongnii tingche varuwhsae.

¹¹Enuw ae inge Thesalonika mee ae akheer ing embarungriir isa, akhaechuve enuw ing chongchu manghuw nungka enchii ing iraang aeka, amanche ynthiing thiimziihchu jinge ichii vamo ta aeka anasiirna engatoh.

¹²Chukhaenache enuw mee aanem ing vokhehkho ynjasuwh Grik rupanuw ae, pasar aenche enthachapa.

¹³Changvakonchu Thesalonika Jehudi aenche Pol ing Beria nakho Thangnang chongsae atongnah ichii emanghuw tahnache enuw ing theng aeka, mee aechu sinsa aeka chongsuwhsa.

¹⁴Anikung narapche auw anae aenche Pol chu chifhuw ipha ing isinii khaena embathenpa, amanche Silas re Timothi chuve changche ongsae.

¹⁵Changvakonchu avethak mee aenche Pol chu Athens ipha ing enghenruwpa, amanche Silas re Timothi enuwchu aningting ynlanghak ing ithengnii chonghak pha aeka enuw yngkaesae.

¹⁶Pol ing Athens na enuwchu ahahrae, ama ing khuwruungchu lae ruthaksii ing ynriim muka abarungriir nungaemahsa.

¹⁷Amatah nache ama ing meekongnii nache Jehudi aethoh, Thangnang ynden mee aethoh vokhehkho kithiirna anasiir amathoh yntuwhchak ae thohche vakhar entuhak.

¹⁸Amana Ipikiurien vokhehkho Stoik thiimziih amanghuwpak ae topoh aenche amathoh chongla emanseer. Amana mee topoh aenche ta aeka, havana ikanii mahna ichong havi inge ynchii riirningka achiiva? Areh aeng ta aeka, ama ing reentaang lipah lae khaena atong ing omna; ama ing Jesu vokhehkho hangring khaena atong.

¹⁹Amana enuw ing atakchu bachuw aeka Ariopagus ningna veruw aeka enriir, nang ing ynriir peehchii ithar havi ynchiiva ichii kenuw ing ynghuw ruvaate?

²⁰Nang ing kengana kungna reentaang chong ymmansiipeeh sachii; chukhaenache chong havi ynchiiva ichii kenuw manghuw nungka kenchiinah.

²¹Akhaechuve Athens mee aere amana ong marpah mee aenche ithar chong iriir isiichu mahnaka reentaang yntanga turu aenche ong ae.

²²Amana Pol ing Ariopagus arikna ngiirka ariir, “Athens mee ae, nenuw aangkhenglaangna inempak lae irum mee vachuw ichii kamanghuwsa.

²³Ki ing jinge ynlen ingka nenlae rumnii kaen tahna ‘Ynghuwmah Lae ningna’ tachuwka thiimkungna ynziih kamupa. Chukhaenache nenuw ing nemanghuwmah nenrum havi ki ing neningna katongva.

²⁴Laaruw paam vokhehkho asungna om peeh aangkheng aseem ama inche, Thangnang vokhehkho laaruw paam Aafhuw ynsuwh vakhaka, kik ing ynseem rumniieenna ongmah;

²⁵amanche ama ing avaehnii omka mee ae kik ing Aafhuw arum omah, Aafhuw atakrap ing aangkhengna iringnii, ihuwh kinii vokhehkho peeh aangkhenglaang ympiva.

²⁶Aafhuw ama ing sii yngkhehpang tanii jaat vakhaechu laaruw paam aangkheng phanii ing ongnii khaena ynseem peehpa, Aafhuw ama ing enganii vokhehkho ongnii lamrii amanaepa,

²⁷amanachembe enuw ing Aafhuw jong ae naka, ituwhnii khaena emangaena engkik laam ae naka jongvaatae, atak chuve inuw vakhae thoh yndah ing ongmah.

²⁸Aafhuw ningna inuw iring vamuw, ynlaap vokhehkho ipaar ynchehva, nenuw nensungsah tanii laksii yngkheh ing taka, ‘Inuw chuve Aafhuw tuti bahsuwm vamuw.’

²⁹Chukhaenache inuw Thangnang tuti bahsuwm vamuw khaka, ynthiing tanii ichiichuve mee ae ising iveer ing vokhehkho hungsem vasem sana vakhangnare, rupa vakhangnare, rung vakhangnare, amavaangche ichiiva tamanuwka ymmanden sakmahnii.

³⁰Atatak ing ymmanghuwmah aphachu Thangnang ing imanghuw peehmah, changvakonchu atiichembe apham tanglahlah mee aangkheng barungriir huungnii khaena Aafhuw ing apeehpa,

³¹Yngkhaena ynchii imbe Aafhuw ing aateer vasah mee yngkheh ing laaruw paamchu ichum ynthiing ing vajeer tuvachii inii yngkheh amanaepa. Aafhuw havi inge ithii ae kaartanii hangring inche mee vakhaena ithachanii ama ing ympipa.”

³²Enuw ing ithii ae ing hangring khaena ensiitahna topoh aenche emaniisah, changvakonchu topoh aenchembe havi khaene athar naning tanii siisava kenta enchii.

³³Chutahnache Pol ing engkaar tanii sisa.

³⁴Changvakonchu pasar mee topoh aenche aningting kaah aeka enthacha, ama kaarnache Dionisius Ariopagus, Damaris ichii rupanuw yngkheh vokhehkho enuw thoh ynruw ing areh aekho ynvae ae.