Read Moyon Naga NONGDANG 19 Bible Online

NONGDANG 19 - Moyon Naga bible

NONGDANG 19

¹Apollo ing Korinthia nache aonglae, Pol ing chungpaam lamting veraenka Ephisia nache va-tungsa. Amanache sebok topoh aechu ama ing aantuwhfhuwpa.

²Pol ing eningna ariir, “Nenuw ing nenthacha laenche ynthiing laetha nengaraang e? Enuw ing embasang, ‘Kenuw ing ynthiing laetha omna ichiikho siimah ung.’

³Pol ing eningna ariir, ‘Chunuwcha, nenuw ing ynchiina baptais nentuva?’ Enuw ing ta aeka, ‘Johon baptais itu nachenva.’”

⁴Pol ing ariir, “Johon aanuwna jungtheng vachii Jesu chu thachava nenchiiva taka Johon ing mee aechu barungriir huungnii khaena baptais amantupa.”

⁵Hava chong i enuw ing ensiitah nache, athar Jesu ruming nache baptais entupa.

⁶Aanuwnache Pol ing entaklina akik siika athamsah tahnache ynthiing laetha eningna thengsa; amana enuw ing reentaang reentaang chong inche Thangnang isa chongchu enjeerpa.

⁷Enuw vakhae chuve pasar mee suum ariiniipae.

⁸Pol ing Ephisia ae meekongnii nache varuwhka Thangnang lipah khaena manseer aeka, vokhehkho maneem aeka tha ynthumpha ing thona isapak ing amanchuw ae.

⁹Chong iriir arumah ae vokhehkho thachamah ae, mee ae maana isamah chong ichong ae kaartaniichu hungsuwhka, sebok aechu ynruwfhuwka amanche thiimziih een Tairanus ichii nache anasiir chong ynsang ae.

¹⁰Havi kumnii sungna suwhjaehsa; chu-khaenache Asia sungna ong vakhae, Jehudi aengkho amanche Grik aengkho Aafhuw isa chongchu ensiipa.

¹¹Amana Thangnang ing isuwh thaangthaang mah laetho Pol kik nache amantupa;

¹²amatah nache aningtanii rumaan vakhangnare, chanhgmahka peen vakhangnare ina ae ningting enghenchitah nache, riirae mangkhiing chaap entaklina omahchirsa vokhehkho isamah umlae vakhae chukho eningtanii suwhchirsae.

¹³Aanuwnache Jehudi thiimziih ynghuw ae hungsi vasi atumee topoh aenche, Pol ing atong Jesu chu suursa ungka nenuwchu chonghak kempeeh nahchuw ta aeka, isamah umlae ing ichuwng mee ae taklinache Aafhuw Jesu rumingna isuursah embasenpa.

¹⁴Havi Jehudi ae aanchung jaethiim aruming Skiva ichii pasar mee sarii chupae.

¹⁵Changvakonchu isamah umlae inche abasang ae, “Ki ing Jesu chukho kamanghuwsa amanche Pol chukho kamanghuwsa, changvakonchu nenuw achuw vachuw?”

¹⁶Isamah laetha ichuwng mee inche eningting vakhuwngka, enuwchu achehpae. Chutahnache enuw ing ama eensung tanii peendiirchah ing yncheh ynchang aeka ensuh ing taensae.

¹⁷Ephisia sungna ipaar ae vokhehkho Grik mee vakhae aenche emanghuwpa; vokhehkho enuw vakhae taklinache ynchik niikho suwhsa, Aafhuw Jesu ruming chukho inempak hungruung sehsehsa.

¹⁸Amana athacha om mee aajaeh ing theng aeka entu enri isii vakhaechu enriirsahpa.

¹⁹Disuur aeka nong atu mee aanem aengkho enthiimbuwr vechi aeka mee vakhae maekung nache misung tingche embathupa; enuw ing amenchu enteentah nache lising songa apha.

²⁰Jinge ichii ing Aafhuw Thangnang isa chongchu hungruungka vokhehkho hungpir sehsehsa.

²¹Atii hava nong vakhae i amanchi-chir aanuwting, Pol ing Mesidonia, vokhehkho Akaia veraen ningka Jerusalem ipha ing sikata ichii ing alaethana mandenka ariir, “Ki ing amachu phaningka aanuwna Rom kho vamuva kachiiting buksa.”

²²Ama abom ae Timothi re Erastus enuw mee ynniichu Mesidonia ting chiirka, atak chuve apha topoh khaena Asia nache ongsa.

²³Apha changlaenche ichum Lam khaena inempak chong suwhsa.

²⁴Akhaechuve Demetrius ichii pasar sana rupa aseem inche Aartemis siihnii iseeng aphamchu seemka, ihae ising mee khuumka ama nong ituchu amangongpa.

²⁵Ama ing enuw vakhae vokhehkho enongtu aanghak mee aechu khuumka ariir, “Mee ae, hava nong i yntutahna inuw vakhae ing lerchii ymphasa ichii nenuw ing nemanghuwsa.

²⁶Havana kik ing ynseem chaap i thangnang mahva taka Pol inge Ephisia nakho, Asia paam aphamsiir nakho sika mee vakhaechu maneemka embarungriir amanghuungnah ichii nemu nensiisa.

²⁷Chukhaenache inuw vakhae ing yntu nong i jungmaanglo chiinah, amanche rumingkho simahnii, changpangmahka Asia sungna ong mee vakhae ing aning iruwpak lae Aartemis eenkho ikaniimah ynsuwh vaata, vokhehkho ama aruungnii chukho hungmaang vachii ing omna.”

²⁸Ama chongchu enuw ing ensiitahna inempak enthirfhuwr ing uung aeka Ephisia ae Aartemis ing iruungsehva enchii.

²⁹Amatah nache khuwruungchu fhuwm ynvae ing sipsa, amana Pol ing aanruwfhuw Mesidonia mee Gaius vokhehkho Aristarkus chukho enuw ing suwr aeka, kuurva tunii iruungpak een tingche hungtaensae.

³⁰Pol ing mee ae kaartingche varuwh ningka achii, changvakonchu thacha mee aenche akhaampae.

³¹Chutahnache ama aanchaarfhuw ae Asia sungna aaruung ae buumting vemanruwh aeka amasak mandang mahruw ta aeka iruung ae ningnache enthamsahpa.

³²Amana mee areh aeng chong yngkheh, amanche mee areh aengkho asiksik chong ing uungsae. Chutahnache mee changjaeh inem itheng aechu enghuw inempak tamsa, vokhehkho ynchii khaena yntinvamuw ichiikho manghuwmahsae.

³³Chukhaenache Alekjendar chu mee ae kaarna enjebasuwpa, akhaechuve Jehudi aeng atakchu mee ae maensok ting enjetuwr sehsehpa, chutahnache mee ae kaarna akik ithohka ihah phehruw taka ariir.

³⁴Atakchu Jehudi meeva ichii emanghuwtah nache, mee vakhae apha topoh iseeh ing, Ephisia ae Aartemis lae Daina inge iruungsehva ta aeka iruur yngkhehpang ing uungsae.

³⁵Khuwruungna nongtu mee iruung inche mee changjaehchu daereng ing mangongka chong ariir, “O, Ephisia pasar ae!” Ephisia khuwruung sungna Aartemis lae havi jupitar tanii ijungbuw aruthaksii ing lae eenchu arungva ichii amanghuwmah mee omah.

³⁶Ama chongchu irumah enchehmah vakhaka daereng ing vokhehkho embarung mansikru aeng enrungaepa.

³⁷Lae een taniina embaruwhmah vokhehkho inuw ynlaechu enjuummah enuw ichu nenuw ing nenghenruwpae.

³⁸Chukhaenache achuw yngkheh ing Demetrius vokhehkho anongtufhuw ae takline enrumah omnave, vaapa ngiirnii een haangna vokhehkho ruwreng ideen ae ongnae; amanache enuw ynrensah ae rasiing.

³⁹Changvakonchu nenuw ing reentaang thaechii chong khaena nenjong manave, vajeer inuwzii ing lipah siti aangkonglae chong chiva-chiiva.

⁴⁰Ataniinii khaena chembe vaathuh suwhnii omah vakhaka ynrensah manuwve yntaklina isii ikha suwhnii vatah, vokhehkho havi khaene inuw ing akhae iseeng ing picheh mahmuw.

⁴¹Havi ariir aanuwna ama ing mee vakhaechu amangkaepa.