Read Moyon Naga NONGDANG 20 Bible Online

NONGDANG 20 - Moyon Naga bible

NONGDANG 20

¹Emanseer chongchu emanchi aanuwting, Pol ing sebok aechu eenka ynthohsahnii chong ajeerthoh lamsuw thaen aeka atak chuve Mesidonia ting isinii khaena kar akhiingpa.

²Ama ing ama paam tingche avasiraenche enuwchu inempak ithohsa aeka Grees ipha ing sisa.

³Amanache tha ynthum cheengka Sairia phanii ing ruwkuwng ongnii ningka sikata achiiraensiim Jehudi mee aeng atakchu enjeehnii tahnache, ama ing Mesidonia yntongting ynritah kata ichii ing amandenpa.

⁴Changvakonchu Beria tanii Pirhus sapa Soptar ing atakchu aanruwfhuwpa; amanche Thesalonika ae, Aristarkus re Sekundus vokhehkho Derbe tanii Gaius, amanche Timothi; vokhehkho Asia ae, Taikikus re Trophimus, enuw aechu ama ing aanruwfhuwpae.

⁵Enuw inche maen henginsa aeka Tros nache kenuwchu ynghahpae.

⁶Chor ynvaemah tar isah kuurva aanuw tingche, kenuw ing Philipi na ing ruwkuwng nache vasi ungka inii nirunga sungna Tros nache embuumna vatung ungka inii nisarii cheengsung.

⁷Niisin hungvi ahaarpa inii nache kenuw ing tar sahnii khaena kempurpoh tahnache, Pol ing atuknuw karkhiing ningka achii khaenache ama ing enuwchu manchuwka apha jaenchim aphapa.

⁸Kempurnii een chung kaanache jaemi inempak ynreng.

⁹Pol ing thamin atongchu apha ahungseehtah nache bangrengna ong Iutikus ichii ilerchu amik ikhuw ing namka ajaarcha chungtanii ka avomanthumnii tanii jungbukka ithii ing enjungadompa.

¹⁰Amatah nache Pol ing jungchumka atakchu jedomka ariir, nenuw jamahruw; ama alaetha omna.

¹¹Aanuwnache Pol ing hangkarka tarchu bakhiika ensahpa. Amana enuwthoh khuwvaar ipha ing thamin tongka sisa.

¹²Enuw ing ilerti chu iring ing eenting ruw aeka enrotha inempak irohsah.

¹³Kenuw ing ruwkuwng omnii ipha ing vasi ungka amanche Asos phanii ing ruwkuwng vaongsung; amana Pol kho ongrasiing ichii ing kemanden, changvakonchu ki kakhi ing sivakata taka chong avemanthangpa.

¹⁴Ama ing Asos nache eentuwhfhuw tahna-che, kenuw ing ruwkuwngna mangong ungka Mitilen tungsung.

¹⁵Kenuw ing ruwkuwngchu vehuur ungka mathang inii nache Khios ichii kuurnache vatungsung; amana inii ninii ahenpha raenche Samos vepha ungka, mathang inii nache Miletus tungsung.

¹⁶Pol ing Asia nache apha amaangniimah khaena, Ephisia iraen manuwka ruwkuwngna sijaehtaruw ichii aba-rungriir amangiirpa; akhaechuve chehmanuwve Pentikos inii nache Jerusalem nache ongnii khaena ynnehpak ing isiung.

¹⁷Miletus tanii Ephisia ting mee vechiirka ruwrthiing upa chaap aechu aningting ivaknii khaena avamangeenpae.

¹⁸Enuw ing Pol ningtingche envathengtah nache ama ing eningna ariir, “Ki ing Asia ne kavatheng ahaarpa inii nache basenka apha vakhaena nenuwthoh ynruwhak muwka ynsaangkhe ongping ichiichu nentaksah ing nemanghuwsa.

¹⁹Amachuve, kabarungriir iduwr ing, mikrachii aajaeh ynta ing, vokhehkho Jehudi aeng isamah entu inche kataklina chaang yngen aethoh ynruw ing Aafhuw meenae yngkheh ing anong katusah.

²⁰vokhehkho Jehudi ae vokhehkho Grik ae aaniimehna isii icher tanii Thangnang ningting vokhehkho Aafhuw Jesu Khrista ning-tingche barungriir ihuungnii khaena ichum saarkhii pisa ingka,

²¹nenuw ing kaaniiva nenchiichu mee vakhae maekungna vokhehkho een een nakho katong amanche kamanchuwchuw.

²²Atiive enruw, ynthiing laetha ing iphuwpka ki Jerusalem ting sining; amanache kataklina ynchiikha suwhva tamo ichii ki manghuw samah ing.

²³Havipang chuve kamanghuwsa, ymphuwpva kachii vokhehkho ija-chaam phava kachii inche kichu ihahka omna ichii ynthiing laetha ing khuwruung siirna saarkhii apeehsa.

²⁴Changvakonchu Thangnang tungsiih ajaarna ki ing isa chong saarkhii ipinii inche, Aafhuw Jesu ningtanii kapha nongpham amachu kamanchinii khaena kalaethana iruwpak ing mandenmah ing.

²⁵Atiive enruw, nenuw nengkaarna Thangnang lipah khaena tongchak ingka isibir ing, changvakonchu atii nenuw vakhae ing kamae athar vokheh mumah tanuw ichii kataksah ing kamanghuwsa.

²⁶Chukhae-nache ataniine neningna saarkhii katusahnah, nenuw achuw yngkheh maang tanuwve ki karaarnii yntanga omah.

²⁷Thangnang ing amanden vakhaechu neningna kamanthangne ki duwrmahdeh ing.

²⁸Jesu Khrista asii ing eeriivasah Thangnang ruwrthiing nenuwchu icheernii khaena nenuw nentaksah vokhehkho jao ruwrchaap nakhe nenbarungriir manruwhruw; laetha ing nenuwchu ruwrthiing aapuh ymbasuwpa.

²⁹Ki kaangkae aanuwting eentheem heemfhuw jaoruwr aseeh-mah nengkaarna thengvaata ichii kamanghuwsa.

³⁰Vokhehkho nenuw nensungsah taniirap ing enganuwchu ijiinii inche sebok aechu ivakinii areh aphuw chong ing ichong mee hungsuwh vaatae.

³¹Ama khaenache kumthum sungna richii ynruwm thoh ynruw ing siim jaen mee vakhaechu ynchah manchen samahdeh ing ichiichu eensiipeeh saruw.

³²Atii ki ing nenuwchu Thangnang ningna vokhehkho Aafhuw atungsiih chong nache kamansirsah nahchuw; havana chong inge nenuwchu ynseemsahnii vokhehkho amanthiing vasah ae kaarna iphapham om amachu neningna ipisah achehsa.

³³Ki ing achuw ningtanii sana, rupa, changmahka peendiir idik samahdeh ing.

³⁴Kakik ynniimeh inge kataksah vokhehkho kaanruwfhuw ae ikanii phanii khaenache nong katusa ichii nenuw ing nemanghuwsa.

³⁵Aangkhenglaangna ki ing neningna itupham isuwh kamandangsahpa ichiichuve, nenuw ing amachuvaang nong tutanuwka isuur mee aechu ibomsah re Aafhuw Jesu isa chongchu mandenva nenchiiting buksa, akhaechuve Aafhuw Jesu rap ing ajeer, “Aapha ithi ing aapeeh inche bor aphahakva.”

³⁶Havi riirka ama ing akheerkhuwh mansinka enuw vakhae thohche athamsahpa.

³⁷Enuw vakhae inempak ening sikka chapsae vokhehkho Pol chu ikorsa aeka amae entumpa;

³⁸Pol maechu athar vokheh mumahnii ae ichii ariir chong khaenache inempak embarungriir ijasah ae. Amana enuw ing atakchu ruwkuwng omnii ipha ing envethakpa.