Read Moyon Naga NONGDANG 21 Bible Online

NONGDANG 21 - Moyon Naga bible

NONGDANG 21

¹Enuw thoh ynsae ungka aanuw-nache ruwkuwng nache ong ungka, Kos phanii ing ichiimjaeh ing vasi ungka, inii nikheh aanuwting Rhodes chu vepha ungka amana inche Patara vatungsung.

²Amana Phonesia veraenvachii ruwkuwng vepha ungka sisung.

³Kenuw ing Saipras kenve-mutah nache, Sairia yntong tari tingche vehuur ungka vokhehkho peeh ithinfhuw om khaena Taire tingche kenuw hungruwhsung.

⁴Amanache sebok topoh aechu yntuwhfhuw ae ungka inii nisarii cheengsung; enuw ing ynthiing laetha ajaarna Pol chu Jerusalem ting asiniimah ing enriirpa.

⁵Changvakonchu enuwthoh onghak aphachu hungtangka kenuw ing kensitah nache, enuw vakhae ing enrumee, ensiti aethoh ynruw ing khuwruung taang ipha ing ynvethak sahpae, amana chifhuw ataang nache kheerkhuwh mansinsa ungka kenthamsahpa vokhehkho yngkheh yngkheh lamsuw ynthaensah ung.

⁶Kenuw ing ruwkuwng nache ong ungka, enuw chuve engeenting ynrisae.

⁷Aanuwnache kenuw ing Taire na ing chifhuwna isi ungchu ahungdong tahnache Patolemais tungsung, amana kenuw ing unae aechu salaam tu ungka enuw thohche nikheh cheengsung.

⁸Aanuw akhuwvaar nache kenuw hangiir ungka Kesaria nache hungtungsung. Amanache Jerusalem na rukuum itunii khaena ynteer vasah mee sarii kaarna Philip ichii isa chong ajeermee eensung nache ongsung.

⁹Ama asanuw rakhii iniimah Thangnang chong ajeer ae lunghah manriimeh om ae.

¹⁰Amanache kenuw ing inii topoh kencheenglae Judia tanii Agabus ichii jaephar ivatheng.

¹¹Ama ing keningna vakka Pol ing adiirriim achiimniichu verika ataksah akhi akikchu phuwpka ariir, “Ynthiing laetha ing jinge ichii ing ariirnah, havana diirriim ynchiimnii aafhuw pasarpa chu Jehudi aeng Jerusalem nache jinge ichii ing phuwp ae naka atakchu reentaang mee ae ningting pivaatae.”

¹²Kenuw ing hava chong i kensiitahna kenuw re amana ong mee aengkho Pol chu Jerusalem ting asiniimah ing kengkhaam.

¹³Chang-vakonchu Pol ing eningna abasang, “Nenuw ing chapchuwka kabarungriir nengasum i ynchii khaenava? Aafhuw Jesu aruming khaenache Jerusalem na kichu kaeshumna ong khaenapang mahka ithii khaenakho ynthongping.

¹⁴Kemaneemchu arumah tahnache manchen ungka kenriir, Aafhuw ing amandenchu ynsuwhrasiing.”

¹⁵Inii topoh kencheeng aanuwnache kempeeh bathong ungka Jerusalem ting isi kembasempa.

¹⁶Kesaria tanii sebok ae thohche vasihak ungka vokhehkho enuw ing kenuwchu itungnii khaena mamaenna sebok vasah Saipras tanii Manason eensung nache ymbathungpae.

¹⁷Kenuw ing Jerusalem kenvatung tahnache, unae aenche rotha irohpak ing ymbariimsah ae.

¹⁸Aanuw inii nache Pol ing kenuw thohche Jems ningting vaksung; amanache upa aekho ynvae ae.

¹⁹Pol ing enuwchu salaam atuae aanuwna ama anongtuna Thangnang ing reentaang mee ae kaarna atupeeh nongchu adiing aneh ing atongpa. Enuw ing amachu ensiitah nache Thangnang emampahsah.

²⁰Amana enuw ing aningna enriir, “Kenguw kenae, nang ing namusa Jehudi ae kaarne thacha mee aajaeh omnae; vokhehkho enuw vakhae ing vajeer chonghak nache embarungriir apeehsae.”

²¹Nang ing reentaang mee ae kaarna ong ae Jehudi aangkhengna ensiti aechu vinchiip tumahruw vokhehkho enunu nache simahruw tachiika Mosi vajeer chonghakchu bathenruw ichii ing namanchuw aechu enuw ing enriirnah.

²²Chukhaenache ynchii tuvaanchiiva? Akhaechuve nang thengsachii ichii enuw ing siisiingtae.

²³Chukhaenache naningna kenriir havi itupeehra; amachuve entaksah ing chongiir enrisah ae pasar mee manrii omnae.

²⁴Havana pasar ae i ynruwfhuw ae nana nataksahkho ynthiingsara, amanche enuw ing enrusae emangkuhnii khaena engkhaena ruwhvachii bathongla; vokhehkho eningna nang nakhaena enriir chongchu ichummahva changvakonchu nataksah ingkho vajeer chonghakchu ngahsiika hungsinachii ichiichu enuw vakhae ingkho manghuw vaatae.

²⁵Changvakonchu athacha vasah reentaang mee ae khaena chembe kenuw ing vajeer tu ungka lae ting peeh ympeeh, sii isah, chaangna uka ithii, lamsi ing ithii vokhehkho naamak, hava vakhae chaap tanii entaksah ing ingahnii khaenache chongthen kembathenpa.

²⁶Amatah nache Pol ing pasar aechu ynruwfhuwka animaniinii inii nache ynseeng aeka engkheng khaena ipeefhuw peehchu empeeh inii ipha ing ynthiingnii inii chivachii ynthangnii khaena rumniieen tingche ama ing hangruwhsa.

²⁷Inii nisarii ahungchidir mahrirae Asia tanii Jehudi aenche Pol chu rumniieen nache emutah nache, amana itheng mee vakhaechu sinsa aeka atakchu akikna bachuw aeka uung ae.

²⁸“Isrel pasar ae, ibomruw! Aphamsiirna inuw ymmee aechu, vajeer chonghak vokhehkho hava mapham ichu jeehniika mee vakhae amanchuwchu haviva; vokhehkho havi manthisiirka Grik mee aekho rumniieen ting henruwka ynthiing mapham havichu amanchohpa.”

²⁹Ajae isivasahna enuw ing Ephisia tanii Trophimas chu Pol ing khuwruung nache ynruwfhuwka vokhehkho rumniieen ting ahenruwva ichii ing emanden.

³⁰Chutahnache khuwruung nache inempak huwtamsa, vokhehkho mee ae ing vataen aeka Pol chu ensuwr amanche rumniieen tanii thur aeka eenkhaar aangkheng engkamchirpa.

³¹Pol chu enuw ing ithehnii khaena enjongtah nache Jerusalem sung aangkheng iraang suwhsa ta aeka laarchang aruwr aaruung ningtingche chong emanthangpa.

³²Ama ing ithupak inche laarchang ae vokhehkho chaama ter aapuh aechu ruwka ening ipha ing vataensae; amana enuw ing athurfhuw aapuh aere laarchang aechu emutah nache Pol embinchu emanchenpa.

³³Changlaenche athurfhuw aapuh iruung inche Pol chu veneengka asuwrpa, vokhehkho siirruw runoh asae ynniimeh inche phuwpruw taka chong ajeerpa. Amana atakchu achuwva vokhehkho ynchiikha atudohva taka ama ing asiipae.

³⁴Mee changjaeh inem kaarnache mee topoh aenche chong yngkheh amanche reentaang topoh aenche asik chong yngkheh riir aeka uungsae; amana huwchu atam ramthi inche ama ing atatak ichumchu manghuw chehmahka, Pol chu laarchang ongnii een sungtingche ruwruw taka chong ajeerpa.

³⁵Pol inche kaarchum nache ahangkarthoh mee changjaeh inem aenche engaburpoh tahnache, atakchu laarchang aenche engadompa.

³⁶Akhaechuve mee changjaeh inem aenche atakchu taang jenbasuwparuw ta aeka enguungnii baram ing aanuw enjiipa.

³⁷Pol chu laarchang ae ongnii eensung tingche emanruwh phana, ama ing aaruung ningnache ariir, naningna ki ing chong yngkhehpang iriirsah ruvatamo? Aaruung inche asii, “Nang Grik chong namanghuwse?”

³⁸Isivasahna miktheh mee ae pasar lising manrii aechu paamfhuw ting naruw ae Ijeep mee chumah vachii-khang?

³⁹Pol ing abasang, “Ki chuve Silisia khuwruung na om Tarsas tanii Jehudi meeping, chukhaenache mee ae ningne chong iriirnii khaena irupeehra tasa ingka kathamsahnahchii.”

⁴⁰Laarchang aaruung inche Pol ing athamsahchu arupeehtah nache, Pol ing hangiirka mee vakhaechu daereng ing ongnii khaena akik aathohsahpa. Mee ae inche daereng ing engong-raenche, ama ing Hebreeu chong ing eningnache chongsa.