Read Moyon Naga NONGDANG 22 Bible Online

NONGDANG 22 - Moyon Naga bible

NONGDANG 22

¹“Kauw kanae vokhehkho kapa kafhuw chaap ae, atarae ki ing nenuw vakhae neningna kaangahsahnii chong kariirsah i irungaepeeh saruw.”

²Ama ing Hebreeu chong ing eningna ichongchu ensiitah nache daereng ing ongsae. Amana Pol ing ariir:

³“Ki Silisia na om Tarsas tanii pasar yngkhehping, changvakonchu hava khuwruung ne Gamaliel kikna ihangruung sahping, amanche inuw vakhae afhuw fhuwven ae vajeer chonghak vakhaechu ipirpak ing hemanjii ingka kateensahva, amanche atanii nenuw vakhae ing nentuvaange, ki ingkho Thangnang khaena kaba-rungriir kamanruwhdehva.

⁴Ki ing pasar aekho, rupanuw aekho phuwp ae ingka kaeshum ting kakhum ae vokhehkho ithii ipha ingkho havana Lam khaene kamanja ae.

⁵Havi khaene Aanchung Jaethiim aengkho amanche aanchungpuh upa chaap ae ingkho saarkhiinae. Enuw eningtanii unae Jehudi ae ningna ynziih chong-then pha ingka, Damaskas na ong enuw chukho ijachaam pinii khaena vokhehkho phuwp ae ningka Jerusalem phanii ing ihenruwnii inche ki ing amatingche isi ing.

⁶“Ki ing vasi ingka inii siimchim ruvaena Damaskas kavephapha nache manghuw mangharu ing ka-ruwvaena thangbaen tanii ireng inche ynrakuwrpa.

⁷Vokhehkho laruw tingche ki jungbuk ingka iruur yng-kheh inche kaningna Sol, Sol, nang ing kichu ynchii khaena ymmanja vachii taka ariir chongchu ki ing kasiipa.

⁸Amana ki ing kabasang, ‘Aafhuw, nang achuwvachii?’ Aafhuw ing ariir, ‘Ki chuve nang ing namanja Nazaret Jesu ping.’

⁹Changlae kaanruwfhuw mee aenchembe irengchu amuae, changvakonchu kaningna ichong Aafhuw iruur chuve siimah ae.

¹⁰Ki ing kabasang, ‘Aafhuw, ki ing ynchii tuvakachiiva?’ Aafhuw inche ymba-sang, ‘Nang hangiir nana Damaskas ting varuwhra, amanache nang ing tuvanachii nong Thangnang ing amandenchu iriirpeeh vaata.’

¹¹Ama ireng inche kamik manthimka paam-khuw kamuchehmah tahnache, kaanruwfhuw aenche kakikna ibachuw aeka Damaskas khuwtingche ynruwpae.

¹²“Amana heong Jehudi aenche ynseer aeka engajapak vajeer chong-hakchu isajaeh ing amanjii Anania ichii pasar mee yngkheh inche vathengka,

¹³kabuum nache ngiirka ariir, ‘Kauw kanae Sol, nang namik namu ynsuwhrasiing!’ Aphachak nache kamik imu phasa ingka aningting kahengenpa.

¹⁴Ama ing kaningna ariir, ‘Inuw vakhae afhuw fhuwven ae Thangnang inche nangchu Aafhuw ing amanden namanghuwnii khaenache, ynthiing ichum Aafhuw amachu imunii khaena vokhehkho Aafhuw nertanii iruur isiinii khaenache eeteersahpa.

¹⁵Nang ing mee vakhae maekung nache Aafhuw thenna nang ing namu vasah, vokhehkho nasii vasah vakhaechu asaarkhii ynsuwh vaanta.

¹⁶Atarae nang ing ynchiikha nahahva? Hangiirla amanche naningna om isii icher vakhaechu aanchaamnii inche baptais tunana Aafhuw ningtingche henthamla.’

¹⁷“Ki ing Jerusalem ting hunganri ingka vokhehkho rumniieen nache kathamsahrae karuvaamna yndang kamupa,

¹⁸amanache kaningna ariir, ‘Jerusalem bathen churchurla, kakhaena nang ing saarkhii pivana-chiichu enuw ing rimahnii ae.’

¹⁹Ki ing kabasang, ‘Aafhuw, enuw entak ing emanghuwsa, ajae ki ing meekongnii chaapna Aafhuw nang ynthacha mee aechu kaeshum ting khum ae ingka vokhehkho ibinkho kabin ae.’

²⁰Aafhuw nang nasaarkhii apeeh Stephen sii aantarae, kikho embuumna ngiir ingka entu nongchu karuva, vokhehkho aatheh mee ae peendiir chukho ki ing karung.

²¹Changvakonchu Aafhuw ing kaningna sira, ki ing nangchu yndahpak reentaang mee ae ningting chiirva kachii achii.”

²²Havi phanii ing enuw inche achongchu enrungaepa; changvakonchu aanuwnache enuw ing uung aeka enriir, “Hangchii mee i laaruw paamne iring matik chaamah.”

²³Enuw ing uung aeka vokhehkho empeendiir siih aeka amanche minvaen ting pirkhuwhchu emanthuum tahnache,

²⁴Aapuh aaruung inche ataklina jinge ichii matik ing uung ae akhaechu ynghuwchehnii khaena, laarchang ae ongnii eensung tingche ruwnuwna binruw vokhehkho chong siiruw ichii ipirpak chong abathakpa.

²⁵Enuw ing atakchu runoh ing emphuwp tahnache, Pol ing abuumna ingiir laarchang chaama aapuh ningnache ariir, “Rom meechu vajeer turu inche nenbinchu nenuw nenvajeer chakva?”

²⁶Laarchang chaama aapuh inche ama chongchu asiitah nache, ama ing aapuh aaruung ningna vakka ariir, “Nang ing ynchiikha tura nachiiva? Akhaechuve ama mee i Rom mee ynsuwhsa.”

²⁷Chukhaenache aapuh aaruung inche Pol ningnache vakka chong asii, “Kaningna riirla, nang Rom mee vachii?” Pol ing “Ung” taka abasang.

²⁸Aapuh aaruung inche ariir, “Amen inempak ing irii ingka Rom mee yngkheh kaphapa.” Changvakonchu Pol ing abasang, “Ki Rom na om meeping.”

²⁹Chukhaenache aningna chong siiva enchii aenche engadahpa vokhehkho aapuh aaruung inchenkho Rom meesa ichii amanghuw tahnache, ama ing aphuwp khaenache ynchiksa.

³⁰Mathang inii nache Jehudi aeng aningna ynchii khaena miraar apeehpae ichiichu aapuh aaruung inche atatak ing manghuw ningka achiitah nache, Pol aphuwpchu abajohpa amanche aanchung jaethiim ae vokhehkho aanchungpuh vakhae ningnache meekong tunii khaena ipirpak chong amanthangpa, amana Pol chu henruwka emaensok nache amangiirpa.