Read Moyon Naga NONGDANG 24 Bible Online

NONGDANG 24 - Moyon Naga bible

NONGDANG 24

¹Inii nirunga aanuwna Aan-chung Jaethiim Ananias ing upa topoh aethoh amanche ichongnii amanghuw Tertulus thoh ynruw ing vatheng aeka lipah aapuh maana Pol chu vajeer tunii khaena enriirpa.

²Aanchung Jaethiim ing Pol chu eenka amana Tertullus ing Pol taklina amanraarnii ing chongsa: “O, ruwreng ideen Feliks! Nang najaarna kenuw idaejaeh ing vokhehkho namanden inche jaati khaena isa isamah namanchumcheh khaena

³kenuw ing inempak kemanpahsah chiithoh ynruw ing akhae aangkhengna vokhehkho apham aangkhengna kenruvachii.

⁴Chukhaenache ki ing naningna apha aseehniimah ing, naningsiihna kenchong topoh pangti rungaepeehnii khaena kathamsah nahchii.

⁵Amachuve Pol ichii pasar havi inge hungmaangnii vachii atu, laaruw paam aangkhengna ong Jehudi vakhae ae sungna imaangnii chong abasuw vokhehkho Nazaret mee aechu akikna achi aapuh ynsuwh meeva ichii kenuw ing ataklina kentuwhpa.

⁶Ama ing rumniieen rapkho mamaang kata taka atunah, changvakonchu atak i kenuw ing kensuwrva. Chukhaenache kenuw kenvajeer chonghak inuwzii ing atak i vajeer itu kengadikva.

⁷Changvakonchu Lisias ichii aanchung aaruung ing vathengka kengkik tanii isiihka

⁸ama ing araarsa ichii chongchu naningting vaknuwna vasiisaruw taka chonghak ympeehpa. Chukhaenache kenuw ing ataklina kemanraarnii vakhaechu nang ing chong nasiirae imanghuwpeehcheh vaanta.”

⁹Havana emanraarnii chong vakhae i Jehudi aengkho ynvae aeka enchong emanchimpa.

¹⁰Lipah aapuh inche Pol chu ichongnii khaena arutahache Pol ing ariir, “Nang ing kum aajaeh iseeh ing jaati taklina vajeer natuva ichii ki ing kamanghuwsahsa, chukhaenache namaana kaangahsahnii chong karotha irohpak ing kariirsahnah.

¹¹Ki ing Jerusalem na Thangnang irum kathengnii inii nisuum ariinii iraenmahri ichii nang ing ymmang-huwpeeh chehsachii.

¹²Ki ing achuw mee yngkheh thohkho chong ynjeehniimah ung, changmahka rumniieen nakho, meekongnii chaap nakho amanche khuwruung chaap nakho chong kabasuw Jehudi aeng tuwhmah ae.

¹³Enuw ing kataklina ymmanraarnii ae chongchu atarae chumna ichii aandangnii ipichehmahnii ae.

¹⁴Changvakonchu havi naningna kariirsahnah amachuve, vajeer chonghak sungna ynziihka om vokhehkho jaephar ae ynthiing thiimziih sungna ynthin vakhaechu thacha ingka, enuw ing chummah enchii Lam amachu inuwzii ing ki ing kenfhuwven ae Thangnang chu karumsahva.

¹⁵Isa mee chukho isamah mee chukho hangring vaata ta aeka entaksahrap ing enruchu, ki ingkho Thangnang ningna kaningmanden kamangomva.

¹⁶Havi khaene ki ing Thangnang vokhehkho mee vakhae ningnakho apha om vakhaena kavakhar ynthiing ing ongnii inche kataksah ing katusahva.

¹⁷“Atii kum topoh aanuwna ki ing kajaati aechu ibomsahnii khaena vokhehkho Thangnang ting ipifhuw vakhae ipisahnii khaena ithengsah ing.

¹⁸Ama apha sungnache mee ae thohkho ynruwru ing vokhehkho huwtamrudeh inche rumniieen nache katakchu ynthiing vasah inche enuw ing yntuwhpae. Changvakonchu Asia paam tanii mee topoh ae chuve ong ae-

¹⁹enuw ing kataklina miraar piniichu omnave, hava nene nama nache ngiir ae naka kataklina imanraar vachiipae.

²⁰Changmah vakhaka mee ae rap inge ki ing aanchungpuh ae maana kangiir laenne ynraar katu entuwhchu riir ae rasiing.

²¹Ithii ae ing hangring vaatae ichii khaena atanii iniine nenuw nemaana kataklina vajeer yntuchuw chuve ki ing engkaarna ngiir ingka kariirsah.”

²²Changvakonchu Feliks ing Lam akhaenache athiseh ynthiingkiir ing amanghuwcha Lisias aanchung aapuh ing athenglaenche, ki ing vajeer tupeehva kachuw taka aatorpa.

²³Aanuwnache Pol chu vaesang ing mangong nuwna ingahnii khaena vokhehkho aarang ing rukuum tupeehva enchii chukho aanthing-niimah ing, laarchang chaama aapuh ningnache ama ing chong ajeerpa.

²⁴Inii topoh aanuwtingche Feliks ing ama aarangnuw Jehudi sanuw Drusilla thoh ynruw ing theng aeka amanche Pol chu vamangeen aeka Jesu Khrista ithacha khaenache achong enrungaepa.

²⁵Changvakonchu Pol ing ichum ing ataksah yngahcheh vokhehkho nuwting vajeer omvachii khaena ama ing achongtah nache, Feliks ing ynchikka ariir, “Ataraenbe yngkaetahra, ki ing apha icha kapharae nang eenva kachii.”

²⁶Ama apha sungnache Pol inge seer ipivatamo ichii ing amandenkho amanden, chukhaenache Pol chu veer raprap chakka achong fhuwchak.

²⁷Changvakonchu kumnii ahenphatah nache Porsius Festus ing Feliks aphamchu amansirpa; amanche Feliks ing Jehudi ae ningtanii eningsiih phaningka ichii mandenka Pol chu kaeshum nache amangongpa.