Read Moyon Naga NONGDANG 25 Bible Online

NONGDANG 25 - Moyon Naga bible

NONGDANG 25

¹Atii Festus ing ama paam nache varuwhka, inii nithum aanuwting Kesaria na ing Jerusalem phanii ing vasisa.

²Amana aanchung jaethiim ae vokhehkho Jehudi ae aaruung ynsuwh ae ing Pol taklinache Festus ningna vajeer tura ta aeka enthamsahpa.

³Pol chu lamna chuwm manuwka thehtaruw ichii khaena sir aeka, Jerusalem tingche eennii khaena Festus ningna enuw ing aningsiih athamsah ae.

⁴Changvakonchu Festus ing eningna abasang, “Pol chu Kesaria na laarchang aeng rung aeka ongna; katakkho apha topoh ongpheh ningka amating sivakata.

⁵Chukhaenache nenuw nengkaarna aacheh mee aenche kithoh ynruw ing sinungka, ama amiraarchu omnave enuw ing changlaenche manraar ae rasiing taka ariir.”

⁶Amanache engkaarna ama ing inii neeriih, changmahka nisuum iraenru ing ongka, Kesaria phanii ing vasika mathang inii nache ama ing vajeernii ongnii nache ongka, Pol chu iveruwnii khaena chonghak ajeerpa.

⁷Pol ing avathengtah nache, Jerusalem tanii itheng Jehudi aenche aruvaena ngiir aeka iruwpak miraar aajaehcha piaeka haviva ichii inaemah ing enriir numnumpa.

⁸Amana Pol ing aangahsahnii ariir chongchuve haviva: “Jehudi ae vajeer chonghak taklina vakhang nakho, Thangnang rumniieen taklina vakhang nakho, Kesar taklina vakhang nakho, ki ing isii yntangakho tumahdeh ing.”

⁹Changvakonchu Festus ing Jehudi ae ningtanii eningsiih phaningka ichii amandentah nache, Pol chu abasang, “Nang ing Jerusalem ting sitaniika havana vaathuh khaene kamana vajeer itu runingka nachiinah?”

¹⁰Changvakonchu Pol ing ariir, “Kichu vajeer itunii vachii apham Kesar vajeernii ongnii maanache ki ngiirning, Jehudi ae taklina ki ing ynraar katu yntanga omah, amachu nang ingkho isajaeh ing imanghuwpeeh chiika omna.

¹¹Katak i ynraar katu meeping vanave vokhehkho ithii aru nong katu omnave, ki ithii khaena kada omah; changvakonchu mee ae inge kataklina miraar ympeeh chaap ae sungna laanglam ichum yngkheh pangkho omah nave, achuw mee yngkhehpang ingkho kichu eningting ipichehmahnii ae. Ki ing Kesar ningting vajeer tunii khaena kariirsahnah.”

¹²Amatah nache Festus ing aanchungpuh upa aethoh chong manseerka abasang, “Nang ing Kesar ningting vajeer tunii khaena nariir vakhaka Kesar ningting sivaanta.”

¹³Atii inii topoh ynghaen phehka Agrippa vokhehkho Barnis ing Kesaria nache Festus chu ivaveernii vokhehkho bariimsahnii khaena va-tungsae.

¹⁴Enuw ing apha topoh iseeh ing encheeng raenche Festus ing Iruwng Agrippa maanache Pol taklina vaathuh isuwhchu manthangka ariir, “Feliks ing kaeshum sungna thinka amah pasar mee yngkheh omna.

¹⁵Ki ing Jerusalem na kaonglae hava pasar khaene aanchung jaethiim aere Jehudi upa aeng ataklina miraar ibabuwpeehra ta aeka kaningna vajeernii khaena enriir.

¹⁶Amana ki ing eningna kariir chuve, amiraar omsa ichii apha mee inche amanraar mee ae thoh mae re mae yntuwh ing ataklina isuwh vaathuh khaenache aangahsahnii chong iriirnii apha aphamah rirae, ama meechu ynraar chuve Rom mee ae nunu mahva kachii.

¹⁷Enuw ing havane engkheng itheng ae khaenache, ki yntukrudeh ing, aanuw nikheh nache vajeernii ongnii nache ong ingka, pasarpa chu iveruwnii khaena chonghak kajeerpa.

¹⁸Ataklina miraar apeeh mee aenche enghangchong incha ki ing kamanden vaang, ataklina isamah chong yntanga enuw ing hembasuwmah ae.

¹⁹Chang-vakonchu enuw entaksah endharmo khaenache, vokhehkho ringna taka Pol ing ithii vasah Jesu khaena ireep nache enganahnii ynsuwhsa.

²⁰Chukhaenache hava vaathuh khaene ki ing ynsaangkhe siiva kachiiva ichii manghuwchehmah ingka, nang ing Jerusalem ting sinana vaathuh havi khaene vajeer itu naadiknah ta ingka kasiipa.

²¹Changvakonchu ama ing paam aapuh ningting vajeer itunii khaena ariirsah tahnache, ki ing Kesar ningting kajebathen mahri raentaang ikhumnii khaena chonghak kajeer.”

²²Agrippa ing Festus ningna ariir, “Ki ingkho achongchu siiningka kachiinah.” Festus ing abasang, “Atuknuw nang ing ama achongchu siivaanta.”

²³Atuknuwche Agrippa re Barnis enuw meenii inche thoraang iruungpak ing vatheng aeka, laarchang ipirpak aapuh ae thoh vokhehkho khuwruung aapuh iruung ae thohche mee vakhae aangkongnii nache varuwh aeka, Festus achonghak inuwzii ing Pol chu enveruwpa.

²⁴Amana Festus ing ariir, “Iruwng Agrippa vokhehkho kenuw thoh ong pasar vakhae, nenuw havana pasar i nemusa. Ama i iring matik chaamah ichii ing uung aeka Jerusalem nakho, hava nenkho Jehudi mee vakhae ing kaningna enriirpa.

²⁵Changvakonchu ama ithii phanii ynchiikho tumah ichii ki ing katuwhpa, ama atak ing iruwng ningna vajeer itu aniihnuwzii ing amachu mansinii khaena kachong kamanreeppa.

²⁶Ama akhaene ki ing kaafhuw naningna ynziihfhuw yntangakho omah. Chukhaenache siinana ki ing ynziih aruchu ituwhnii khaena nenuw nemaana vokhehkho Iruwng Agrippa, athurfhuw ing namaana atakchu kaveruwpa.

²⁷Kaeshum sungna yngkhum meechu vajeer tuniinache ynveruwtahna, ataklina emanraarnii chongkho emandangmah havichu vakhar omah ae ichii ing kamandennah.”