Read Moyon Naga NONGDANG 26 Bible Online

NONGDANG 26 - Moyon Naga bible

NONGDANG 26

¹Agrippa ing Pol ningna ariir, “Nang nataksah khaena ichong ruvaata.” Amana Pol ing akik ithohka aangahsahnii chong iriir abasenpa:

²“O Iruwng Agrippa, Jehudi aeng kataklina ymmanraar ae khaena atanii naningna kaangahsahnii chong riirsava kachii i kakhaena chembe kalaepah isapakva ichii ing kamandensahnah.

³Jehudi ae sungna om ensinii vokhehkho vaathuh isuwh aangkheng nang ing namanghuwseh yngkheh vachii. Chukhaenache ikhaangpeeh nana kachong irungaepeeh tasa ingka kathamsahnahchii.

⁴“Kanaepanglae basenka kajaati ae kaarna Jerusalem na hungpaar ingka katu kari vakhaechu Jehudi mee vakhae ing emanghuwsa.

⁵Enuw ing saarkhii pinungka ta ae nave, kenuw ing kening dharmo chu ipirpak ing emanden Pharisi tanii yngkhehping.

⁶Kempa fhuwven ae ningna Thangnang ing chongreep atunache kaningmanden om khaena, atarae havane vajeernii khaena ngiir ingka

⁷amachu iphanii khaenache kensungkhur suum ariinii ing siim jaen Thangnang chu barungriir iruwh ing rumsa ungka ningmanden phanii ing kemandensahva. Amanche havana ningmanden khaene, O Iruwng, kataklina Jehudi aeng ymmanraarpae.

⁸Thangnang ing ithii aechu manring nave, amachu ynchii khaena nenuw ing nenthacha chehmahva?

⁹“Nazaret Jesu rumingchu henbareh vebreh ningka nong tuvakata ta ingka ki ing atatak ing kamanden.

¹⁰Havi Jerusalem na ki ing katu, aanchung jaethiim ae ningtanii aatuaricheh pha ingka ynthiing mee ae aanemchu kaeshum ting kasiih ae, amanche enuwchu entheh raenche ki ingkho karusa ichii kamandang.

¹¹Amanache meekongnii chaapna enuwchu vanuh vanuh manja ae ingka, enuw ing eningchu ithipak ing enchongnii inche katu; vokhehkho entaklina ki ing ynveeh vaang reentaang khuwruung chaap tingkho kavamanang ae.

¹²“Havi khaenava ki ing aanchung jaethiim ae ningtanii aatuaricheh vokhehkho chongthen thoh ynruw inche Damaskas ting vasising.

¹³Amana inii siimchim nache O Iruwng, inii ireng athi ing aen thangbaen tanii ireng yngkheh inche katak vokhehkho kasifhuw ae chukho irakuwrka ireng-chu kamupa.

¹⁴Kenuw vakhae ing laruw ting kenbuktah nache, Hebreeu chong ing ariir iruur ki ing kasii, Sol, Sol, nang ing ynchii khaena kichu manjavachii? Iring taklina nakhi ing nahaechu nasuhnii vatah.

¹⁵Ki ing kariir, ‘Nang achuwvachii Aafhuw?’ Aafhuw inche ariir, ‘Ki chuve nang ing manjachii Jesu ping.’

¹⁶Chang-vakonchu nang hangsuw nana ngiirla; akhaechuve havi khaene ki ing nangchu kamansii vachii, amachuve nang ing kichu ymmuchii vokhehkho naningna mansiiva kachiichii ama khaenache anong itukho amanche saarkhii ipichukho naansuwhnii khaena chenva.

¹⁷Nang namee ae vokhehkho reentaang mee ae tanii, ki ing nangchu karvakachii.

¹⁸Enuw ing ynthim tanii ivaar ting vokhehkho umlae ruwreng tanii, Thangnang ningting hunganriae naka isii icherchu ikuhpeeh vokhehkho kichu ithacha ajaarna ynthiing aphavasah ae kaarna ynvaenii khaenache, ki ing nangchu emik avaarnii inche eningting kachiirvachii.”

¹⁹Ama khaenache, “O, Iruwng Agrippa! Thangbaen tanii ymmansiichu ki ing kamanjiimah changchii mahva.

²⁰Changvakonchu amaensana Damaskas mee ae ningna, aanuwting Jerusalem mee ae ningna, Jehudi ae paam aangkhengna vokhehkho reentaang mee ae ningna enuw ing barungriir huung ae naka, Thangnang ting hunganri vachiipae vokhehkho barungriir ihuung nongchu matik icha ing tuvanenchiiva ichii khaenache katongsah.

²¹Havi khaenenche Jehudi aeng rumniieen nache kichu isuwr aeka ithehnii khaena emanjongpa.

²²Changvakonchu Thangnang ning-tanii ruwreng phasa ingka isiing nakho, iruung nakho saarkhiichu pi ingka hava inii ipha inge ki ingiirsahping.

²³Khrista ing ijachaam badaarvachii vokhehkho Aafhuw inche ithii ae kaartanii amaensa hangring ynsuwhvachii khaenache Aafhuw amee ae nakho, reentaang mee ae nakho, manlaenpeeh irengchu yntong vachiiva taka jaephar aengkho, Mosi ingkho hungsuwh vachii enriir chongchu mahnaka ki ynchiikho riirmahdeh ing.”

²⁴Pol inche aangahsahnii chongchu ariirtah nache, Festus ing uungka ariir, “Pol nang baveeh sachii, nang ing inempak teensiika namanghuw ingkhe natak ymmanveehpa.”

²⁵Changvakonchu Pol ing ariir, “O Ynjasuwhpak Festus! Ki baveehmah ing, changvakonchu ichumchu ichongping.

²⁶Iruwng Agrippa! Naningna thona ompak ing ki chong chehning, akhaechuve hava vakhae i yndangmah arakiing yngkhehna isuwh mahva ichii nang ing namusa vokhehkho namanghuwsa ichii kathachasahnah.

²⁷O Iruwng Agrippa, nang jaephar aechu nathachasae? Nang ing nathachasae ichii ki ing kamanghuwsa.”

²⁸Agrippa ing Pol ningna ariir, “Nang ing kichu apha mongtehna khristen manguur kachii ynchiinahchii.”

²⁹Pol ing abasang, “Among pang-tina vakhang nakho, iseehpak vakhang nakho, naning napang mahva, ataniiniine kachong aasii vakhae aengkho, kakik kakhi ymphuwp havimah naka, ki vaange nengaan-suwhnii ing, ki ing Thangnang ting ithamsah kaadiksahnah.”

³⁰Amatah nache iruwng ingkho, lipah aapuh ingkho, Barnis ingkho amanche enuwthoh onghakpoh ae inchenkho hangiir chirsae.

³¹Enuw chiir aeka yngkheh yngkheh chongsae, “Hava mee inge ithii ipha aru vokhehkho kaeshum ting isiihniirem ynraar nong chuve ynchiikho tumah.”

³²Agrippa ing Festus ningna ariir, “Hava mee inge Kesar ting vajeer itunii khaena riirmah nave, atak i bathencheh vaanchiiva.”