Read Moyon Naga NONGDANG 28 Bible Online

NONGDANG 28 - Moyon Naga bible

NONGDANG 28

¹Kenuw vakhae ing iring kem-pha inuwtingche chiirikpaam omchu Malta va ichii kemanghuwpa.

²Ama paam mee aenche keningna inempak eningsiih emandang, akhaechuve khuksuwr siiraang vokhehkho isik om khaena enuw ing mi imansehpeeh aeka kenuw vakhaechu ymbariimsahpae.

³Pol ing itikfhuw thing mangkongka mi sungting ajebathu tahnache, mi ynsa inche baruwr yngkheh ama sungtanii hungsuwhka akikna aakherteehpa.

⁴Chutahnache amana ong mee aenche chuwr ompak baruwr inche akikna aakherteehchu emutahna, enuw yngkheh yngkheh ing enriir, “Mee havi mikthehva ynchii tahna ichingniifhuw omah. Ama ing chifhuw tanii iring phasakhang nakho, ichum vajeer inche atak i manringmahsa.”

⁵Chang-vakhang nakho ama ing baruwrchu mi sungting ithikka yntangakho tamahsa.

⁶Enuw ing turva tarammo ta aeka vokhehkho manghuw mangharu ing tiihnaka thikva tarammo ichii ing manden aeka enghah; changvakonchu enuw ing enjaeh aeka vokhehkho ataklina yntangakho ichiimahchu emutah nache embarungriir yntehka atakchu laeva enchii.

⁷Atii ama min apaang nache Publius ichii chiirikpaam aafhuw apaam yngkheh om; ama mee inche ihebariim saka inii nithum ynner paamsah omrudeh ing ymbathungsahpa.

⁸Ama-nache Publius ampa chu arii itheng ing nakka vokhehkho siithoh tursuwh isi ina ing aphapa. Amana Pol ing vaveerka vokhehkho thampeehka ataklina akik siika amandampa.

⁹Hava nong i atutah nache chiirikpaam nache ong ina chaap aengkho vatheng aeka Pol ing enuwchu amandampae.

¹⁰Enuw ingkho kenuwchu inempak ymbariimsah aethoh ynruw ing iruwpak ing yntusah ae. Amana kenuw ing ruwkuwng ting kenvaong tahnache, kenuw ing kaaniiva kenchii peehchae chaap ynthin peehpae.

¹¹Tha ynthum aanuwtingche unae ymphuwr yntaka buwtinnii om pharbuwna chiirikpaamna om ruwkuwng nache sisung.

¹²Kenuw ing Sairakus nache ruwkuwngchu sii ungka amanache inii nithum cheengsung.

¹³Aanuwnache kenuw ing ruwkuwr ungka Rejium nache vatungsung; amanache inii nikheh ong ungka, ikang tanii sii ahangraang tahnache inii ninii ahenpharae Putioli tungsung.

¹⁴Amanache kenguw kenae ae tuwh ungka, kenuwchu enuw ing inii nisarii ongpohtaruw ta aeka ynthamsahpae. Jinge ichii ing kenuw vakhae Rom lipah tungsung.

¹⁵Amana heong unae aenche kenuw thengnae ichii chongchu ensiitah nache, Appius kithiirna vokhehkho Meetungniieen ynthum enchii apham ipha ing kenuwchu ynjuhahpae. Enuwchu Pol ing amutah ae nache Thangnang chu manpahka inempak aruwreng pirsa.

¹⁶Kenuw ing Rom nache kenghung-ruwh tahnache Pol chu laarchang mee ae thohche anumpang ing ongchu enrupa.

¹⁷Inii nithum aanuwnache Pol ing Jehudi mee aaruung upa aechu eenka amangkongpae; enuw ing engaang-kongpoh raenche ama ing eningna ariir, “Kauw kanae ae, ki ing kamee ae changmahka afhuw fhuwven ae siniichu jeehniimah khang ningkho, Jerusalem kaeshum nache ong ingka Rom mee ae kiktinge ymmansirpae.

¹⁸Rom mee aenche kichu chong ynsiitah ae nache, ithehnii khaena kamiraar omahdeh khaenache enuw ing kichu bathen nungka enchii.

¹⁹Changvakonchu Jehudi mee aen-che enrumah tahnache, kamee ae ningting miraar pinii omahkhang nakho, ki ing Kesar ningting vajeer tunii khaena iriirpham isuwhdohva.

²⁰Chukhaenache havi khaene ki ing nenuwchu yntuwhnii inche vokheh-kho ichonghaknii khaena ka-eensah vachuw, akhaechuve Isrel mee aeng ningmanden emangom Aafhuw akhaenache kakik kakhine siir ing ymphuwppae.”

²¹Enuw ing aningna enriir, “Kenuw ing nakhaena Jehudi ae ningtanii chongthen phamah ung vokhehkho havane itheng mee aengkho nakhaena isamah chong manthangmah ae vokhehkho ichongkho chongmah ae.

²²Changvakonchu kenuw ing naman-denchu ynchiiva ichiichu naningtanii siinungka kenchiinah. Kenuw ing kemanghuwsa amachuve apham aangkhengna havana khristen ruwr ae khaene mee vakhae ing enrumah ing chongnae.”

²³Chukhaenache enuw ing inii manae aeka, Pol ing aongnii nache mee inempak ama inii nache thengsae. Amana eningna Pol ing Mosi vajeer chonghak na ing jaephar ae thiimbuwr na basenka Thangnang iruwngpaam khaena enuw ing enthachanii inche ziing na ing khuri ipha ing aman-chuwpae.

²⁴Mee areh aeng chembe ama ing ariirchu thacha aeka, areh aeng chembe thachamah ae.

²⁵Chutahnache enuw ensungsahna ynrumah aeka ynsaesae. Enuw ing engaansaemah rirae Pol ing eningna chong yngkheh ariir, “Ynthiing laetha ing nenpa nenfhuw ae ningna jaephar Isaia ningna isajaeh ing manchongka ariir:

²⁶‘Nang ing havana jaati ae ningne sinana riirla, nenuw ing isiichuve siivanenta, amachu manghuwchehmah tanuw, imuchuve muvanenta, nenbarungriir chuve supsuwh suwhmahnii.

²⁷Akhaechuve emik ing emu, engana ing ensii, embarungriir ing amanghuw, athar hunganlehva enchii, vokhehkho ki ing enuwchu yndam arumahnii ing, havana mee ae i embarungriir kamanurpa; Engana ing siinungka tamahsae vokhehkho emik engasiingpa.’”

²⁸Chukhaenache havana Thangnang ningtanii iringnii manlaenpeeh havi reentaang mee aeting ajenbathenva ichiichu nenuw ing manghuwva nenchiiting buksa. Enuw inche rungae vaatae.

²⁹Ama ing hava chong i ariirtah nache, Jehudi aeng enareer sungna ynnahnii aeka ynsaesae.

³⁰Pol ing vaehka aongnii een nache kumnii ongka, aningna itheng vakhae aechu abariimsah ae.

³¹Pol chu achuw ingkho parden turudeh ing, ama ing thona isa ing Thangnang iruwngpaam khaena tongka vokhehkho Aafhuw Jesu Khrista khaena manchuw aeka ong.