Read Moyon Naga NONGDANG 4 Bible Online

NONGDANG 4 - Moyon Naga bible

NONGDANG 4

¹Pitar re Johon ing mee ae ningna enchong raenche jaethiim ae, rumniieen aarung aapuh iruung vokhehkho Saduki aenche eningna inempak nungaemahsae.

²Amachuve enuw ing mee aechu Jesu ing ithii ae kaartanii hangringva ta aeka emanchuw inche ithii mee chaap hangring vaata ichii amandangniipa.

³Enuwchu suwr aeka khuwvaar ipha ing kaeshum nache engkhumpa, akhaechuve apha khuri hungvisa.

⁴Changvakonchu enchongchu sii aeka athacha ae mee aechu pasar lising runga empha.

⁵Aanuw inii khuw hungvaar nache Jehudi upa ae, aapuh ae vokhehkho thiimthang ae Jerusalem nache

⁶Aanchung Jaethiim Annas re Kaiphas, Johon vokhehkho Alekjender amanche aanchung jaethiim eengkuw vakhaekho ynvae ing yngkongsae.

⁷Amana enriknache mangiir aeka chong ensii, “Ynchii ruwrengna vokhehkho achuw rumingna nenuw ing havi nentuva?”

⁸Aphanache Pitar ynthiing laetha ing sipka eningna ariir, “Mee aapuh ae vokhehkho upa ae:

⁹Atanii kenuwchu ijachaam apha akhi ibong ningne isa nong kentupeeh khaena ynchii ruwreng ing nemansakva tatanuwka ynsii vatanuwve,

¹⁰nenuw vakhae neningna vokhehkho Isrel mee vakhae ningna kamanthangsahnah, nenuw ing khros na nentheh Thangnang ing ithii ae kaartanii amanring Nazaret Jesu Khrista ruming ajaarna mee havi inge damkiirka nenuw vakhae nemaana ngiirna.

¹¹Jesu Khrista i ynthiing thiimziih ing ariirchuva, ‘Een itu mee aeng enrimah rungchu, athurfhuwrungchu ynsuwhsa.’

¹²Achuw mee reentaang ningnakho manlaenpeeh phanii omah; Thangbaen derna inuwchu ikarvachii laaruw mee kaarna ruming akhiing reentaang achuwkho omah.”

¹³Enuw ing Pitar re Johon enthona isachu emutah nache vokhehkho thiim-ziih iteenmah meechaam meepae ichii emanghuwtah nache, inempak ngik aeka enuw Jesu thoh ynruwhaknae ichii emanghuwpa.

¹⁴Changvakonchu ina idam mee inche enuwthoh ingiirhakchu emutah nache enriirfhuw yntanga omahsa.

¹⁵Chukhaenache enuwchu aanchungpuh eensung tanii taang basuw aeka, enuw yngkheh yngkheh chong manseer aeka enriir,

¹⁶“Inuw ing entakline ynchiikha tutaruw?” Akhaechuve enuw ing ingikniipak laetho entupa ichii Jerusalem na ong mee vakhae ing emanghuwpa, amanche inuw ing amachu irumah chehmahmuw.

¹⁷Changvakonchu mee ae kaarna havi chungna athiseh ing athangsehseh niimah khaenache, enuw atarae basen naka achuw ningnakho hava rumingne ichong niimah khaena inuw ing ipirpak ing manchiih taeruw enchii.

¹⁸Chukhaenache entakchu een aeka Jesu rumingna ichongkho enchong niimah inche vokhehkho achuw ningnakho ynchuw rumahnii ta aeka chonghak apeehpae.

¹⁹Changvakonchu Pitar re Johon ing embasang ae, “Thangnang tanii chungna ithi ing nenchong kemanjii inche Thangnang mik-enna ichumva ichummahva, nenuw vajeer itupeehruw.

²⁰Kenuw ing kemu vokhehkho kensiichu ichongmah chehmah ung.”

²¹Chukhaenache aanchungpuh aenche enuwchu manang chehmahva enchii ing emutah nache ipirpak chong ing manchiih aeka embathenpae, akhaechuve isuwh nong khaenache mee vakhae ing Thangnang emanpahpae.

²²Havi kum sommanrii aaraen upa yngkheh ina taklina laetho tuaeka emandam khaena chenva.

²³Enuwchu embathen thoh, enruwr ae ningting hunganriaeka eningna aanchung jaethiim aere upa aeng enriirchu entongpa.

²⁴Ama chongchu thacha ruwr aenche ensiitah nache enuw vakhae barungriir yngkhehpang ing Thangnang ting enthamsahpa: “O Aafhuw, nang chuve thangbaen, laaruw paam, chifhuw vokhehkho asungna omchap vakhae aaseemchu vachii!

²⁵Ynthiing laetha ajaarna kempa Devit nernache ymmanjeer peehchii, ‘Ynchii khaena reentaang mee aenge hangjaehmeh embarung emansikva, vokhehkho mee aenche ynchii khaena ikaniimah aechu emandenva?

²⁶Aafhuw vokhehkho Khrista irumah nache laaruw paam iruwng chaap aeng hangiirsae, vokhehkho aapuh aenche yntuwhpohsae.’

²⁷Nang ing thou naataeh vasah yn-thiing nameenae Jesu irumah nache atatak ing Herot re Pontius Pilaat ing reentaang mee aere Isrel mee ae thohche yngkhehpang ing hava khuwruung ne

²⁸Aafhuw nakik ing vokhehkho nuwting hungsuwh vachii maen ing nasirvasah vakhaechu itunii khaenache yntuwhpohsae.

²⁹Amatah nache atiive Aafhuw, enuw ing kenuw ymmanchiih aechu ijebuwrpeehsar vokhehkho nameenae kenuwchu thona isa ing nachong isachu ichongnii ipisar.

³⁰Ina idamnii inche nachangbaen eethohpeeh sanana ynthiing nameenae Jesu ruming ajaarnache ingiknii vokhehkho laetho tunii ipisara.”

³¹Enuw ing ithamsah emanchichak thoh, enuw engongnii aphamchu ynnuhsa; vokhehkho engkheng ynthiing laetha inche sip aeka thona isapak ing Thangnang chong isachu chongsae.

³²Atii thacha mee vakhae aenche barungriir yngkhehpang ing vokhehkho laethana yngkhehpang ing omsae, amanche achuw ingkho ama ing adeensah peehchae vakhaechu katasahva ichii ing mandenmahsae. Changvakonchu endeen peehchae vakhaechu ynchumpohsae.

³³Vokheh-kho Aafhuw Jesu ing ihangring khaenache iruungpak ruwreng thoh ynruw ing chongthang aenche saarkhii empeeh ae, vokhehkho tungsiih inempak emphasah.

³⁴Engkaarna achuwkho ivaeh ichii omah dehsa, akhaechuve paam vakhang nakho changmahka ruwbaar adeen vakhae aenche juwr aeka amenchu vechi aeka,

³⁵Chongthang ae ningna emansir; amanche achuw yngkheh kaaniivachii khaena ameesiir nache asem ae.

³⁶Saipras na om Levi ichii Josep, chongthang aeng Barnabas ta aeka engeenniichak (ichiichuve thona ipeeh mee) inche

³⁷adeensah aruwrae juwrka amanche amenchu chongthang ae ningting vechika engkikna amansirpa.