Read Moyon Naga NONGDANG 5 Bible Online

NONGDANG 5 - Moyon Naga bible

NONGDANG 5

¹Aphanache Anania ichii pasar re arumee aruming Saphira enuw inche endeensah paam yngkheh enjuwrpa.

²Ama arumee ingkho amanghuw ing amenchu sarup yngkheh siika, sarup yngkhehchu vechika chongthang ae ningnache avapeehpa.

³Changvakonchu Pitar ing Anania ningna ariir, “Anania, ynthiing laetha taklina nang ing mare itunii khaena, napaam najuwr amenchu sarup yngkheh nasiihnii ing, umlae inche nabarungriir yngkhaena amansipva?

⁴Nang ing najuwrmahri raenche natasahva amanche najuwr aanuwtingche amenchu natasah vatah. Nang ing natu nong havi nabarungriirna nakharchu yngkhae-nava? Nang ing mee taklina ichummah natu changchii mahva, Thangnang taklina natuva.”

⁵Hava chong i Anania ing asiithoh ama tiihka thiksa; amana isuwhchu asii vakhae aenche inempak ynchiksae.

⁶Iler aenche hangiir aeka ahakchaangchu irom aeka, taang jenbasuw aeka envadimpa.

⁷Apha ynthum vakhae aanuw-tingche, aarangnuw ing isuwh nongchu manghuwru ing varuwhsa.

⁸Pitar ing aningna ariir, “Nenuw ing nenjuwr paam amen chakchu kaningna riirla.”

⁹Ama ing abasang, “Chumna, changjaeh pangna kenjuwr vatah.” Amatah nache Pitar ing aningna ariir, “Thangnang laethachu ennii khaena nenuw ing nenruhakchu ynchii khaenava? Enla, nafhuwsar kha aadim ae atarae eenkharkungna ngiirnae, nangkho enuw ing ivadim vaatae.”

¹⁰Aphachak nache amakho Pitar akhi derna tiihka thiksa. Iler aenche envaruwh tahnache ithiichu muaeka enuw ing atakchu idom aeka afhuwsar buumtingche envadimpa.

¹¹Ruwrthiing aangkheng ing vokhehkho isuwh nong asii vakhae taklinache ynchiknii suwhsa.

¹²Atii chongthang aenche mee ae kaarna laetho vokhehkho ingiknii inempak entupa. Amana enuw eng-khengche Solomon eensukreen nache barungriir yngkhehpang ing ong ae.

¹³Changvakonchu reentaang areh aenchembe engkaarna vaanvae chehmah ae, changkhangnare mee aenchembe engajapak ae.

¹⁴Chu-khaenache pasar kho, rupanuw kho thacha mee hungnemsae.

¹⁵Amatah nache Pitar ing ahungsirae aruthaksii ing vakhangnare achuw yngkhehkheh taklina ataknii khaenache, ina aechu lamfhuw chaap nache hembasuw aeka ijaarnii vokhehkho duup nache emantorpa.

¹⁶Jerusalem khuwruung akuurchaap tanii mee aengkho ina ae vokhehkho umlae ing ichuwng vakhae ae chukho veruw aeka engaangkong tahnache aangkheng amandampa.

¹⁷Aanchung Jaethiim vokhehkho ama aruwr ae engkheng, amanche Saduki ae ruwr aenche chongthang ae taklina inempak kallaksae; chukhaenache enuw ing isamah itunii khaena ngiirsae.

¹⁸Enuw ing chongthang aechu suwr aeka kaeshum tingche ensiihpa.

¹⁹Changvakonchu ama jaen nache Aafhuw vaarmee inche kaeshum eenkhaar vakhaechu imongka vokhehkho taang basuw aeka ariir,

²⁰“Sinuwna nenuw ing rumniieen nache ngiirnuwna mee ae ningnache iringnii chong havi khaene chongruw.”

²¹Enuw ing ama chongchu ensiitah nache, rumniieen tingche khuwvaar phana varuwh aeka mee aechu emanchuwpae. Changvakonchu Aanchung Jaethiim vokhehkho aanruwfhuw ae inche vatheng aeka aanchungpuh ae vokhehkho Jehudi upa vakhaechu een aeka, enuwchu ihenruwnii khaenache kaeshum tingche envechiirpa.

²²Changvakonchu itheng phamnae aenche entakchu kaeshum sungnache envatuwhmah tahnache hunganriaeka emanthangpa,

²³“Kaeshum eenkhaar aangkheng isajaeh ing yngkamka vokhehkho eenkhaarkung aarung mee aekho hengiir ing kenvepha ae, changvakonchu eenkhaarchu kengamong tahnache sungnache achuwkho tuwhmahsung.”

²⁴Atii aanchung jaethiim aere rumniieen aarung ae aapuh enuw inche hava chong i ensiitah nache, chongthang ae taklina ynchii isuwhva ta aeka enruwriimsa.

²⁵Amana mee yngkheh vathengka eningna ariir, “Nenuw ing kaeshum sungna nengkhum mee aekha rumniieen sungna ngiir aeka mee ae emanchuwnah ae.”

²⁶Chukhaenache aapuh inche mee ae thohche vakka chongthang aechu ahenruwpae, changvakonchu ithipak inchembe tumah ae, akhaechuve mee ae ing rung ing ideengva taemo ichii khaena ynchik ae.

²⁷Enuw ing chongthang aechu henruw aeka, aanchungpuh ae maanache emangiirpa, amanche aan-chung jaethiim inche chong siiaeka ariir,

²⁸“Hava mee rumingne mee manchuw mahruw ta ungka neningna ipirpak ing chonghak kempeehchuw.” Changvakonchu enruw, nenuw ing nemanchuw chong inge Jerusalem aphamsiirna sipsa, mee havi asiichu kentaklina babunungka ichii ing nentunah.

²⁹Changvakonchu Pitar vokhehkho chongthang aenche embasang, “Mee ae tanii changve Thangnang chong manjiiva kenta.

³⁰Nenuw ing thing taklina jamchuwka nentheh Jesu kha afhuw fhuwven ae Thangnang inche amanringpa.

³¹Isrel mee ae ningnache barungriir huungnii vokhehkho isii ikuhpeehnii khaenache Thangnang ing Aafhuw havichu Eepuh ing vokhehkho Eekarpeeh vachii ing akik tachang inche eethohpeehpa.

³²Thangnang ing Aafhuw amachu ariir amanjii vakhae ningna kikthuur apeeh ynthiing laetha re kenuw ing hava vakhae khaene saarkhii pung.”

³³Enuw ing hava chong i ensiitah nache embarung siksa vokhehkho theh ae nungka enchiipa.

³⁴Changvakonchu aanchungpuh ae kaarna thiimthang aruming Gamaler ichii mee ae ing inempak engaja, ama inche hangiirka chongthang aechu amongpang khaena taang basuwnii chong amanthangpa.

³⁵Ama ing eningna ariir, “Isrel mee ae, nenuw ing entakline ynchii tukenta nenchiiva ynriimsaruw.

³⁶Isivasah iniina upa aruming Theudas pasarpa ataksah ing ipirpak iruung mee yngkhehping ichii ing mandenka, mee chamanrii vakhae ing aanuw enjii. Changvakonchu atakchu entheh tahnache, aanuwjii aechu kiichir aeka ynchiikho ynsuwhmahsa.

³⁷Ama mee aanuwnache mee masing iteen aphanache Galili mee Judas ing ama aanuwjii topoh akhuumpa, changvakonchu amakho enthehpa vokhehkho aanuwjii vakhae ae chukho kiichirsae.

³⁸Chutahnache atarae vaathuh havi khaene neningna kariirnah, nenuw entaklina yntanga tumahruw, enum ing bathen aeruw akhaechuve enuw ing emanden vokhehkho entu enong havi laaruw mee tanii vanave chenvachii vatah,

³⁹changvakonchu Thangnang tanii vanave nenuw ing chehmah ae tanuw. Thangnang ijeehniipae ichii vara phaniiva nenta.”

⁴⁰Gamaler ing chong atahpeeh aechu aanchungpuh aenche enrupa, amana chongthang aechu een aeka embinpa vokhehkho atii Jesu rumingne ichong rumahnii ichii chongchu ipirpak ing riir aeka embathenpae.

⁴¹Chongthang aenche Jesu khaena ningjak ympha havi iphapham isuwhremva ta-aeka aanchungpuh ae ningtanii rotharohpak inche jungsuwhsae.

⁴²Anasiir nache enuw ing rumniieen nache vokhehkho eensung chaap nache manchenrudeh ing Jesu i Khrista chuva ichiichu manchuw aeka entong.