Read Moyon Naga NONGDANG 6 Bible Online

NONGDANG 6 - Moyon Naga bible

NONGDANG 6

¹Atii hava inii sungne mee hung-nem ahenthi tahnache, Grik chong ing ichong Jehudi aenche Hebreeu ae taklinache eningtanii muwkhuwnuw aechu anasiir ipeehfhuw ensemchak nache eebuwrpeeh mahsae ta aeka ichong embasenpa.

²Chutahnache mee suum ariinii aenche sebok vakhae aechu een aeka enriir, “Mee ae hungbom vabomnii khaene Thangnang isa chong itongchu ynchendoh chummahnii.

³Chukhaenache kenguw kenae ae, athang isa, ynthiing laetha ing isip vokhehkho ising iveer mee, hava nong khaene pham pivaanchii nengkaar tanii eeteer peehruw.

⁴Amana chembe kenuw ing ithamsahna vokhehkho isa chong itongnii apha khaena barungriir ruwhvaata.”

⁵Enuw ing enriir chong nache mee vakhae barungriirchu penka, enuw ing thacha re ynthiing laetha ing isip Stephen, amanche Philip, Prokorus, Nikamor, Timon, vokhehkho Parmenas amanche Reen-taang mee Judaijam ting iruwhvasah Entiok tanii Nikolos, enuw vakhae ichu iteer aeka

⁶Chongthang ae maanache emangiirpae; amana enuw ing entaklina engkik siiaeka enthamsah.

⁷Amana Thangnang isa chongchu hungruungsa; vokhehkho Jerusalem nache sebok masing hungnemsa, vokhehkho jaethiim inempak aenche ithacha emphapa.

⁸Stephen ing tungsiih vokhehkho ruwreng ing sipka iruungpak laetho vokhehkho ingiknii mee ae kaarna atupa.

⁹Freedmen meekongnii enchii ruwr ae tanii, Sairene ae, amanche Alekjendria ae, vokhehkho Silisia tanii, amanche Asia tanii hangiir aeka Stephen thohche ynjeehniisae.

¹⁰Changvakonchu ising iveer ing vokhehkho laetha thoh ynruw ing ichong nache enuw ing manraar chehmah ae.

¹¹Chukhaenache enuw ing mee topoh aechu emanriirpae amachuve, ama ing Mosi re Thangnang taklina arumah ing ichong kenuw ing kensiipa.

¹²Enuw ing mee ae vokhehkho upa ae, amanche thiimthang aechu embasohpa. Enuw aenche vasuwr aeka aanchungpuh ae maanache enghenruwpa.

¹³Enuw ing ataklina ichummah iriirnii khaena sungting mee topoh envemanruwhpa. Amana enuw aenche enriir, “Hava mee inge havana ynthiing rumniieen takline vokhehkho Mosi vajeer chonghak taklina arumah ing ichong manchen mahdeh,

¹⁴amachuve Nazaret Jesu havi inge rumniieen ichu mamaang naka vokhehkho Mosi ing ympivasah ynjiifhuwchu manteh vaata taka ama ing ariir kenuw ing kensiipa.”

¹⁵Aanchungpuh vakhae aenche aningting engenteeh tahnache, ama amaechu vaarmee mae vaang ichii ing emupa.