Read Moyon Naga NONGDANG 7 Bible Online

NONGDANG 7 - Moyon Naga bible

NONGDANG 7

¹Aanchung jaethiim aenche aningna ensii, “Hava chong i chumne?”

²Ama ing abasang, “Kauw kanae ae vokhehkho kapa kafhuw ae, irungaepeeh saruw! Apa Abraham ing Haran ting ipaarnii khaena asimahrirae, Mesopotamia nache Thangnang alaar isa ing yndangka

³aningnache, nang ing na-eengkuw nachaangru ae vokhehkho napaam nachii bathen nana ki ing mansiiva kachiichii paam tingche sira achii.

⁴Chukhaenache ama ing Kaaldia paam taniichu hungsuwhka Haran tingche hungongsa; amana ampa athik aanuwting atarae nenpaarnii paamne Thangnang ing ahung mangongpa.

⁵Changvakonchu Thangnang ing ata-sah khaena vokhehkho akhi chuwngnii vachii rapkho pimah, changvakonchu Thangnang ing aningna pivakata achii vokhehkho atuti bahsuwm aechu aafhuw engaansuwhnii inche pivakatae taka Abraham ing siti deenmah khangnare chongreep atupa.

⁶Thangnang ing aningna jinge ichii ing ariir, ‘Nang nasiti aenche mee lipah ting ongvaatae, amana mee lipah aenche kum chamanrii suwh ing engongraenche ijachaam manpha vaatae.’

⁷Entaklina ijachaam amanpha ae taklinache ki ing vajeer tuvakata, vokhehkho ama aanuwdeh nache enuw ing hungsuwh ae naka hava maphamne ki irum vaatae ichii chongchu Thangnang ing ajeer vasahva.

⁸Thangnang ing aningna nang vinchiip tuva nachiiva ichii chukho chonghak apeehpa. Chukhaenache Abraham ing Isak omchu inii neeriih ahenpha chakna vinchiip atupa; amanche Isak ing asiti Jakop chu vinchiip atupa amanche Jakop ing asapa suum ariinii afhuw fhuwven aechu vinchiip atupeehpae.

⁹“Jakop sapa aenche Josep taklina kallak aeka, enuw ing atakchu Ijeep paam tingche suwh ing enjuwrpa. Changvakonchu Thangnang ing atakchu aanruwfhuw.

¹⁰Chukhaenache ama ijachaam aajaeh tanii karpeehka Ijeep iruwng Pharo maana ningsiih phanii khaenache ising iveernii apeehpa, amana atakchu Ijeep lipah vokhehkho Pharo eengkuw taklina aapuh phamchu apeehpa.

¹¹Apha vokhehna Ijeep vokhehkho kanaan lipah nache isah taangka mee ijachaam inempak aphapae, amana afhuw fhuwven aenche isahfhuw phamahsae.

¹²Ijeep lipah nache isahfhuw infhuw chimuw bajaang ymphanah ichii Jakop ing asiitah nache, ahaarpana asapa aechu achiirpae.

¹³Avomanii vokheh avechiirtah ae nachencha Josep ing ai ae ningnache atakchu enaeva ichii amandangpa, amana Josep a-eengkuw aechu Pharo ing amanghuwpae.

¹⁴Chukhaenache Josep ing mee chiirka ampa Jakop amanche auw anae asungkhur aangkheng mee somsarii ariirunga aechu aningting ave-eenpae.

¹⁵Jakop ing Ijeep tingche vasisa, amanache atak vokhehkho asiti ae thohche thiksae.

¹⁶Enuw enghakchaangchu Sikem ipha ing henreen aeka, Abraham ing Sikem na ong Hamor asapa ae tanii seer ing aarii thaenkung nache endimpa.

¹⁷“Thangnang ing Abraham thoh ynruaeka chongreep entu aphachu ahungvitah nache, Josep amanghuwmah Ijeep ae iruwng reen-taang yngkheh ahungpaarmahri raentaangche,

¹⁸inuw ymmee aechu Ijeep lipah nache masing inem ahenthi sehsehpa.

¹⁹Iruwng havi inge inuw ynjaati taklina ijachaam pika vokhehkho inuw ynsiti aechu ren aeka afhuw fhuwven aechu ithipak ing entupae.

²⁰Apha ichiinache Thangnang maana inempak amasak isa Mosi omsa; amana atakchu ampa eenna tha ynthum enjuhpa.

²¹Amana atakchu enrentah nache Pharo iruwng sanuw inche naeduungchu tuwhka asapa basuwnii khaena ajuhpa.

²²Mosi chu Ijeep ae thiimziih vakhae ising iveernii khaena amanchuwpa. Chutahnache Mosi ichongtah nakho amanche nong itutah nakho ruwreng ipir mee hungansuwhsa.

²³“Mosi ing kum somanrii ahenpha raenche auw anae Isrel siti aechu enningka ichii abarungriirna ahe-mandenpa.

²⁴Mosi ing enuw engkaar tanii meechu Ijeep mee yngkheh inche ichummah ing amanangchu amutah nache bomka Ijeep meechu athehpa.

²⁵Ama akik ing auw anae akarpeehsa ichiichu enuw ing emanghuwsa ichii ing amanden, changvakonchu enuw ing manghuwmahsae.

²⁶Mathang inii nikheh nache enareersahna ynna aechu muka, enuwchu engaanchaarnii khaena ama ing mee ae, nenuw unae yngkheh vachuw, yngkhaena jinge ichii ing ynnavachuw achii.

²⁷Changvakonchu aunae taklina ynraar atu ama inche Mosi chu ithikka ariir, “Nangchu achuw ing kentaklina aapuh vokhehkho vajeer tunii ymbasuwva?”

²⁸Nang ing ajaennii Ijeep mee natheh vaangkhe, kikho thehkachii ynchii vachii?

²⁹Mosi ing hava chong i asiitah nache ama ing Ijeep lipah tanii taenka Midian paam nache paarsa. Amanache ama ing sapa ynnii adeen.

³⁰“Kum sommanrii ahengaraen nuwting Sinai bung lampa ikor kaarna vaarmee yngkheh ing thing ana om yngkheh manchuwhka mi ichuwhchu amansiipa.

³¹Mosi ing amachu amutah nache inempak ngiksa; amanche isajaeh ing amunii ing ava-neengcha Aafhuw iruur inche ariir:

³²‘Ki nangpa nangfhuw ae Thangnang chuping, Abraham, Isak vokhehkho Jakop Thangnang ping.’ Amana Mosi ynchiimka isajaeh ing encheh mahsa.

³³Aafhuw ing aningna ariir, ‘Nakheerkhaang kha siihra, nangiirnii maphamkha ynthiing ruwruwva.

³⁴Ijeep na ong kamee ae ing ijachaam inempak emphachu kamuchirpa, vokhehkho enuw ing yngkhik aechu kasiipa, amatah nache enuwchu ikarnii khaenache ijuwngping. Atii nang huungla, ki ing nangchu Ijeep ting chiirkachii.’

³⁵“Achuw ing nangchu aapuh vokhehkho vajeer tunii ymbasuwva ta aeka enuw ing enrumah Mosi havichu thing ana ymbarna mi ichuwh lampa nache, aningna mansiika vaarmee ajaar inche aapuh vokhehkho aakarpeeh ynsuwhnii khaena achiirpa.

³⁶Mosi havi inge Ijeep na, Isen chifhuwna vokhehkho paamfhuwna kum somanrii sungna ingiknii nong aajaeh vokhehkho laetho nong aajaeh mandangka enuwchu ahenruwpae.

³⁷Thangnang ing nenuw nemee sungtanii nengkhaena ki vaange ichii jaephar yngkheh hembasuwva kata taka Isrel siti ae ningna ajeerchu Mosi haviva.

³⁸Sinai bung nache aningna chong iriirnii khaena vaarmee thohche, vokhehkho afhuw fhuwven ae thoh ynruw ing paamfhuwna Isrel siti aethoh onghakchu haviva, ama ing ynningna ipeehfhuw iringnii chongchu ympeehpa.

³⁹Inuw vakhae afhuw fhuwven aenche ama achongchu manjiinungka enchiimah khaena atakchu eningtanii ithik aeka, enuw embarungriir Ijeep tingche piaeka Aaron ningna enriir,

⁴⁰‘Kenuw kemaana isipeeh vachii kengkhaena lae ruthaksii iseempeehruw; Ijeep tanii ynghenruw Mosi ningne ynchii suwhne ichii kenuw ing manghuwmah ung.

⁴¹Amanache enuw ing siirti ruthaksii yngkheh seem aeka, ama aruthaksii ningnache ipeehfhuw peeh vechi aeka enuw engkik ing enseemsah peeh nache rotharoh embasenpa.

⁴²Chukhaenache Thangnang ing eningtanii yngheerka minvaen derna omchaap vakhae irumnii khaena abathenpae; amachuve Thangnang jaephar ae ynthiing thiimziihna ariir haviva: ‘O Isrel mee ae eengkuw, kum sommanrii paamfhuwna nenuw ing deenkhaar thehchuwka kaningna chaatha ympeehchuw e?

⁴³Nenuw ing Molek rumniithaam vokhehkho Rephan lae ruthaksii irumnii khaena seemchuwka nenrumpa.’ Chukhaenache Babilon laar manlaen ningchuwka thurva kachuw.”

⁴⁴“Inuw afhuw fhuwven aeng paamfhuwna ensaarkhii rumniithaam kha omjaehna, amachuve namu havi inuwzii ing seemva nachiiva taka Mosi thohche chong aeka Aafhuw ing ariirpeeh khavaang ichiiva.

⁴⁵Inuw afhuw fhuwven ae emaana Thangnang ing athur ae jaati paamna enghungruwh raenche, rumniithaamchu aandom aenche Joshua thoh ynruw ing enghenchipa. Amanche Devit ipaar ipha inche amachu omjaeh.

⁴⁶Devit inche Thangnang ningsiih ajaarchu phaaka Jakop Thangnang aongnii iphanii khaenache aniihsahpa.

⁴⁷Changvakonchu Solomon ing Aafhuw ongnii khaena een atupa.

⁴⁸Changvakonchu kik ing ynseem een isapak nache Aanchungseh Thang-nang inche jaephar ing ariirvaang ongmahsa,

⁴⁹‘Ki kaaruwngpham ongnii chuve thangbaen nava, laaruw paam ichuve kakhi chuwngniiva. Aafhuw ing ariir, ki kakhaena nenuw ing ynsaangkhe ichii een tuva nenchiiva? Ki ing ongniiva kachiichu unakhenva?

⁵⁰Kakikrap ing peeh vakhae havi kaseemmah vakhang?’

⁵¹“Nenriing ipir vokhehkho nenba-rungriir re nengana vinchiip nentumah ae, nenuw apha vakhaena ynthiing laethachu nenjeehniinah. Nenpa nenfhuw aeng entuvaang, nenuwkho nentunah.

⁵²Nenuw nenpa nenfhuw aenche jaephar aechu emanangmah achuw omkhang! Ichum ynthiing Aafhuw chu juwng vaata ichii khaena maen ing aanthang mee aechu enthehpa; amanche atarae nenuw ingkho rensachuwka nenthehpa.

⁵³Nenuw vachuw vaarmee aeng Thangnang vajeer chonghak imansir aeka nenphachu, changvakonchu nenuw ing amachu manjiimahchuw.”

⁵⁴Enuw ing hava chong vakhae i ensiitahna, embarungriir nache mi ichuwngvaang enthir ifhuwr ing engha iriir aeka aningna ichong embasenpa.

⁵⁵Changvakonchu ama ynthiing laetha inche ataklina sipka thangbaen ting ahengentah nache, Aafhuw Jesu ing Thangnang tachangna ingiir alaar isachu muka ariir,

⁵⁶“Enruw thangbaen ymmongka Mee Sapa ing Thangnang tachangna ingiirchu ki ing kamusa!”

⁵⁷Changvakonchu enuw ing iruur ipirpak ing uung aethoh ynruw ing enganachu engkik ing siing aeka barungriir yngkhehpang ing aningting vataensae.

⁵⁸Amana atakchu khuwruung taang basuw aeka rung ing ideeng embasenpa; amanche saarkhii om mee aenche enpeendiirchu aruming Sol ichii iler yngkheh akhi paangna ensiihpa

⁵⁹vokhehkho enuw ing Stephen chu rung ing endeeng raenche ama ing athamsah, “Aafhuw Jesu, kalaetha i eeraangpeehsara achii.”

⁶⁰Ama ing akheerkhuw mansinka ipirpak iruur inche ariir, “Aafhuw enuw entaklina isii icher vakhae eensiipeeh samahra.” Ama ing havi riirka thiksa.