Read Moyon Naga NONGDANG 8 Bible Online

NONGDANG 8 - Moyon Naga bible

NONGDANG 8

¹Stephen enthehchu Sol ingkho aru. Ama inii nache Jerusalem na ong ae ruwrthiing chaap taklina inempak ijachaam suwhsa, amanache chongthang ae mahnaka, enuw engkheng Judia vokhehkho Samaria paam chaap tingche kiinongsae.

²Yndentahna ympideh mee aenche Stephen chu dim aeka, ama akhaenache inempak ijasah ae.

³Changvakonchu Sol ing ruwrthiing-chu mamaangchir kata taka een een nache ruwhka, pasar rupanuw aechu suwrka kaeshum ting asiih chirpae.

⁴Atii thacha mee ae ikiinong ae inche isa chongchu apham om vakhaena siaeka entongpa.

⁵Philip ing Samaria khuwruung tingche jungruwhka eningna amanache Khrista isa chongchu atongpa.

⁶Atong chongchu mee vakhae aenche ensiitahna vokhehkho laetho chukho atuchu emutah nache, enuw vakhae ing ariirnache embarungriir empeehpa.

⁷Akhaechuve eningtanii ynthiingmah umlae aenche ipirpak ing uung aeka taangting suwhsae, vokhehkho enghakchaang ithiipoh mee ae amanche khibong ae vakhae chukho amansakpa.

⁸Amatah nache khuwruung nache rotharoh inempak emphapa.

⁹Changvakonchu ama khuwruung nache isivasahna ingikniipak ruwriim-nii disuur asichinnii aruming Simon ichii pasar yngkheh om. Ama ataksah ing kikho mee yngkhehping ichii ing mandenka Samaria mee aechu enruw amanriim.

¹⁰Amatah nache enuw vakhae ing naepang na ing upa ipha ing embarungriir piaeka enriir, “Atak i Thangnang ruwreng ‘Iruungpak ruwreng’ enchiichu varae.”

¹¹Ama adisuur mahae inche enuwchu apha isivasah nache enruw amanriim khaenache enuw ing aningna embarungriir iruwhdeh ing empeehva.

¹²Changvakonchu Philip ing Thangnang lipah, vokhehkho Jesu Khrista khaena isa chong atongchu enthacha tahnache, enuw ing pasar rupanuw kho baptais entupa.

¹³Simon ataksahrap ingkho thachaka baptais tuka Philip thohche anasiirche ynruw-haksae. Amana ingiknii vokhehkho ruwriimnii laetho nong isuwhchu muka ama aruw iriim.

¹⁴Atii Samaria mee aeng Thangnang chongchu enripa ichii chongchu Jerusalem na ong chongthang aenche ensiitah nache, enuw ing Pitar re Johon chu envechiirpa.

¹⁵Enuw meenii inche Samaria nache vatheng aeka ynthiing laetha emphanii khaena Thangnang ting enthampeeh sahpae.

¹⁶Akhaechuve ynthiing laetha inche enuw achuw taklinakho juwngmahrisa, changvakonchu Aafhuw Jesu ruming napangche baptais entusah paetah.

¹⁷Apha ichiinache Philip re Johon inche entaklina engkik siipeeh aeka, amana enuw ing ynthiing laethachu emphasahpa.

¹⁸Atii chongthang aenche engkik ensiih ajaarna ynthiing laetha amamphapae ichiichu amutahna, ama ing eningna seer piaeka ariir,

¹⁹“Ki ing achuw mee yngkheh taklina kakik siiningka, ama ing ynthiing laethachu iphanii khaenache, ruwreng havi kaningnakho ipisaruw.”

²⁰Changvakonchu Pitar ing aning-na ariir, “Nang naseerkha natakthoh longkongting ibuw ynsuwhrasii, akhaechuve Thangnang kikthuurchu nang ing seer inge ynrii aruva ichii ing namandenpa.

²¹Hava nongne nang nasarup changmahka ikaefhuw yntanga omah, akhaechuve nabarungriir Thangnang maana chum-mahsa.

²²Chukhaenache nabarungriir isamah havi tanii nabarungriir huungla, amana ruvachii ing omnave, nabarungriir ing namanden amachu ikuhpeehnii khaena Aafhuw ting thamsara.

²³Nang ikhapak kallak ing isipna vokhehkho isii icher ing yngkhumchu ki ing kamusa.”

²⁴Simon ing Pitar re Johon ningna ariir, “Nenuw ing nenriir amachu kataklina yngkheh-pangkho asuwhniimah ing kakhaena Aafhuw ningting ithampeehsaruw.”

²⁵Enuw inche jinge ichii ing isajaeh ing saarkhii empeeh aanuwtingche, Samaria ae khuw aanemnache isa chongchu hentong aeka Jerusalem tingche hunganrisae.

²⁶Aafhuw vaarmee ing Philip ningna ariir, “Hangiir nana Jerusalem na ing Gaza ting isinii lam Irip tingse vasira.” Hava lam i paamfhuwva.

²⁷Chutahnache ama hangiirka sisa. Amana enruw Ithiopia ynsamvasah pasar yngkheh, Ithiopia iruwngnuw Kandaki lerchii aapaanii iruung ama inche Jerusalem ting Thangnang irum isi.

²⁸Ama ing ahunganrirae asiirgari sungnache ongka jaephar Isaia thiimbuwrchu apa.

²⁹Ynthiing laetha inche Philip ningna ariir, “Amana siirgari kuurtingse veneeng nana sihakruw.”

³⁰Amatah nache Philip ing aningnting vataensa, amana jaephar Isaia thiimbuwr apachu ama ing asiipa. Chukhaenache ama ing asii, “Nang ing napakha namanghuwse?”

³¹Ama ing abasang, “Mee yngkheh ing imanchuwmah naka ynsaangkhe ki inche manghuwva kachiiva?” Amana Philip chu ama ing hangkalla onghakta taka athamsahpa.

³²Ama ing ynthiing thiimziih apaniichu haviva: “Jaochu ithehnii khaena engkivaang Aafhuw chu engkipa, Jaoti ing amuwr engaehrae ynlaammah vaangkhe, Aafhuw ing chongmahdeh.

³³Ama ynjuursahdeh inche aningna ichumchu aripeehpa, Atak ahungsuwhnii achuw ing riirchehva takhang, akhaechuve ama aringkumchu laaruw tanii ajeripa.”

³⁴Ynsamvasah pasar inche Philip ningna asii, “Kaningna iriirpeehra, havana jaephar ing ariir ichu achuw khaenava, ataksah khaenava chang-mahka reentaang mee yngkheh khaenava?”

³⁵Philip ing ichong basenka, havana ynthiing thiimbuwr na inge Jesu isa chongchu atongpa.

³⁶Enuw ing lam nache changche enghungsiraenche chii topoh om mapham enghenphapa. Amana ynsam-vasah mee inche ariir, “Enla, havane chii omna!” Kichu baptais ymmantutah nachii ynchii parden omvachiiva?

³⁷Philip ing ariir, “Nang nabarungriir aangkheng ing thacha taniive, nang baptais itu ruvaata.” Ama ing abasang, “Jesu Khrista i Thangnang sapa chuva ichii ki ing kathachanah.”

³⁸Ama ing engongnii siirgarichu ikhaamnii khaena chong jeerka amana enuw ing jungchum aeka Philip ing atakchu baptais atupa.

³⁹Enuw ing chiisung tanii enghungsuwh nuwtingche Philip chu Aafhuw ynthiing laetha inche aruwpa; amana insam vasah inche Philip chu athar vokheh mumahsa, changvakonchu ama inempak arotha iroh isip inche sisa.

⁴⁰Changvakonchu Philip ataksah ing Azotus nache tungsing ichii amanghuwpa, amana Kesaria tingche atungmahri raentaang ama ing khuwruung vakhaena sika isa chong ahentong.