Read Moyon Naga NONGDANG 9 Bible Online

NONGDANG 9 - Moyon Naga bible

NONGDANG 9

¹Sol ing Aafhuw aanuw ajii aechu manchiih katae vokhehkho thehkatae taka Aanchung Jaethiim ningtingche vaksa,

²vokhehkho Aafhuw Lamchu ajii ae pasar kho rupanuw kho achuw yngkhehchu tuwh ningve phuwp ae ningka Jerusalem ting ahenruwnii ae inche Damaskas meekongnii nache yndangnii khaena chongthen ipira taka aningna aniihpa.

³Ama ing vasika Damaskas avepha phanache manghuw mangharu ing thangbaen tanii ireng inche atakchu arakuwrpa.

⁴Amatah nache atakchu ruwruwna jungbuksa, amana Sol, Sol, nang ing kichu ynchii khaena ymmanang vachii taka aningna ajeriir iruur yngkheh ama ing asiipa.

⁵Amana Aafhuw nang achuw vachii taka asiipa. Aafhuw inche abasang, “Ki chuve nang ing ymmanangchii Jesu ping.”

⁶Changvakonchu nang hangiir nana khuwruung ting varuwhra, amanache nang ing tuva nachiichu naningna manthang vaata.

⁷Ama ing asifhuw pasar aenchembe iruur chucha sii aeka mee chuve achuw tangakho emumah tahnache chongchehru aeng ngiirsae.

⁸Amana Sol ing laruw tanii hangiirka paamkhuw athiirtah nache yntanga muchehmahsa; chutahnache enuw ing akikna bachuw aeka Damaskas tingche enruwpa.

⁹Amanache inii nithum sungna ama paamkhuw mumahsa vokhehkho thaemin kho saru ing ongsa.

¹⁰Damaskas nache khristen mee yngkheh aruming Anania enchii pasar yngkheh ong. Ama aruvaamna yndang inche ariir, “Anania!” Ama ing abasang, “Aafhuw, havane ki ongning.”

¹¹Aafhuw ing aningna ariir, “Hangiir nana ichiimjaeh lamkha vejiinana vasira, amana Judas eenna Tarsas tanii Sol enchii pasar yngkhehchu jongra; ama ing athamsahnah.

¹²Anania inche varuwhka paamkhuw amuchehnii khaena athampeehchu Pol ing ruvaamna amu.

¹³Anania ing abasang, “Hava pasar inge Jerusalem na ynthiing namee ae taklinache isamah atuchu mee aajaeh ningtanii ki ing kasiipa.”

¹⁴Aafhuw nang ynrum mee vakhaechu isuwrnii khaena aanchung jaethiim ae ningtanii aatuarichehnii aphapa.

¹⁵Aafhuw ing aningna ariir, “Sira, reentaang mee ae, iruwng ae vokhehkho Isrel siti ae maana karumingchu amandangnii khaena ki ing amachu kaateerpa.”

¹⁶Ama ing kakhaena ijachaam inempak khaangva chiichu aningna mandang vakata.”

¹⁷Anania ing vasika eensung tingche varuwhsa amana ataklinache akik siika ariir, “Kauw kanae Sol, nang ing imusah naphanii khaena vokhehkho ynthiing laetha ing nasipnii inche, nang ing lamna navasirae namu Aafhuw Jesu ingkhe ki ynvechiirva.”

¹⁸Aphachak nache amik tanii ngakoh vaang ichii topoh jungbukka paamkhuw imu achehpa.

¹⁹Amana hangiirka baptais atupa vokhehkho isahtah nakho hungpirsa. Amanache Damaskas na ong ae thoche apha topoh ongsa.

²⁰Ama ing apha mamaangrudeh inche meekongnii apham chaap nache Jesu i Thangnang sapa chuva taka athaminchu atongpa.

²¹Achongchu asii vakhae mee aenche ngik aeka enriir, “Jerusalem na Jesu arum mee aechu suwrningka aanchung jaethiim ae ningting ihenruwnii khaena ithengmah vakhang!”

²²Changvakonchu Sol ing manpir sehsehka, havirap iva Khrista chu taka ariirtah nache, Damaskas na ong ae Jehudi aenche enruw riimka basangcheh mahsae.

²³Apha hungseeh aanuwnache, Jehudi aenche atakchu ithehnii khaena chong emanseerpa. Changvakonchu enuw ing thoraang entuchu Sol ing amanghuwpa.

²⁴Enuw ing siim jaen khuwruung suwngkuungchu Sol ithehnii khaenache enrung jaehpa.

²⁵Changvakonchu asebok aenche Sol chu jaenna ruw aeka polaang yngkheh nache thin aeka bang ynrong nache embabukpa.

²⁶Sol ing Jerusalem ting sika sebok aethoh yntuwhnii khaena ataksah ing amanjongsahpa, changvakonchu enuw ing atakchu sebok yngkhehva ichii thachamah aeka atakchu enchiipa.

²⁷Changvakonchu atakchu Barnabas ing ynruwfhuwka chongthang ae buumting ahenruwpa; amana Aafhuw Jesu chu lamna ama ing ynsaangkhe amuva vokhehkho Aafhuw ing aningna chong abuwhraennii vokhehkho Jesu rumingna Damsakas nache thona isapak ing isa chong atongchu, eningna ynthiingkiir ing atongpa.

²⁸Athar vokheh Aafhuw rumingna thona isa ing isa chong tongka Jerusalem nache hungsi vasi tuka enuw thohche ynruwhaksae.

²⁹Ama ing grik chong ichong ae Jehudi aechu chongfhuw aeka chong ynsang ae; changvakonchu enuw ing atakchu ithehnii khaena ensir.

³⁰Ama ensirchu auw anae aenche emanghuwtah nache atakchu Kesaria tingche ruw aeka Tarsas ting emansipa.

³¹Apha changlaenche Judia, Galili, vokhehkho Samaria aangkhenglaang sungna ruwrthiing chaapchu seemka idae empha; amanche enuw ing Aafhuw ichiisah nache vokhehkho ynthiing laetha ruwreng inche sisa aeka mee masing hungnem ae.

³²Pitar ing apham om vakhaena sika apha icha yngkhehna Lidda na ong ae Thangnang mee aechu iva-en sisa.

³³Amanache aruming Aenias ichii kum iriih ipha ing ijaarniina yntorjaeh asha paangkheh ithiipoh mee yngkheh inachu ama ing aantuwhfhuw.

³⁴Amana Pitar ing aningna ariir, “Jesu Khrista ing nangchu ymmandampa; nang hangiir nana najaarniikha seem-sara.” Aphachak nache ama hangiirsa.

³⁵Amana Lidda na vokhehkho Sharon na ong mee vakhae inche atakchu emupa. Chutahnache enuw ing Aafhuw ningting hungruwh chirsae.

³⁶Joppa nache rupanuw aruming Tabitha enchii thacha mee yngkheh ong. (Ama aruming i Grik chongna Dorkas va amanche arutho chuve “Sakhii,” achiiniiva.) Rupanuw havi inge ympehrudeh ing atusah chuve isa nong ing vokhehkho ipeehtahna amanghuw inche isip.

³⁷Ama inii sungnache ama nakka thiksa, amana enuw ing ahakchaangchu isuwpeh aeka chung eensungka nache emantorpa.

³⁸Joppa chu Lidda thoh yndahpakmah vakhaka, Joppa na ong ae thacha mee aenche Pitar ing Lidda na ongna ichii ensiitah nache, enuw ing mee ynniimeh aechu eningting ivathengnii khaena enchiirpa.

³⁹Pitar ing hangiirka enuwthoh vaksa. Ama ing avatungtah nache enuw ing chung kaatingche enruwpa. Amana muwkhuwnuw aenche chapsa aeka Dorkas ing enuwthoh engonghak laennii vokhehkho peendiir aasiipeeh aechu mandang aeka abuumna ingiir ae.

⁴⁰Pitar ing enuw vakhaechu taang basuw chirka, ama ing akheerkhuwh mansinka athamsahpa; aanuwnache vaanlehka ithii hakchaangchu enka ariir, “Tabitha, nang hangsuwra.” Ama-na Tabitha inche amik ahenbarengpa vokhehkho Pitar chu amutah nache hangsuwka ongsa.

⁴¹Amana Pitar akik ing vabachuwka avemangiirpa; aanuwnache Pitar ing thacha mee vakhaechu muwkhuwnuw ae ynvae ing een aeka iring inche eningting amansirpa.

⁴²Amana Joppa sungnache havana isuwh nong i thangka mee inempak inche Aafhuw chu entha-chapa.

⁴³Amana Pitar ing Joppa nache shavin iseem nong atu Simon ichii pasar thohche apha iseehpak ing ongsa.