Read Moyon Naga ROMIO 1 Bible Online

ROMIO 1 - Moyon Naga bible

ROMIO 1

¹Jesu Khrista ameenae vokhehkho chongthang ing eeteerka Aafhuw isa chongchu itongnii khaena Thang-nang ing yngeen Pol kaning taniiva.

²Isa chongchu ajae isivasahna Thangnang ing jaephar ae enjaarna chongreep tuka ynthiing thiimziihna ynziih chuva,

³amachuve laaruw mee hakchaang yngkheh inuwzii ing Devit tuti tanii junginlaar asapa Aafhuw Jesu Khrista khaena chenva.

⁴Vokhehkho ynthiing tanii laetha re ruwreng ipirthoh ynruwhakna ichii-chu ama ing thikka ihangring inge amandangpa, amachuve Aafhuw Jesu Khrista chuva.

⁵Laaruw mee vakhaechu thacha mee vokhehkho chongriir ynjii engaansuwhnii khaena aapuh yngkheh ing, Aafhuw tungsiih ajaar inche Thangnang ing kichu chongthang pham ynthinsahpa.

⁶Thangnang ing Jesu Khrista mee ynsuwhnii khaena yngeen nache Rom na ong nenuw chukho ynvaevachuw.

⁷Chukhaenache Rom na ong Thang-nang ningsiih apha ae, vokhehkho amee ynsuwhnii khaena yngeen nenuw vakhae ningna kabaziihnah: Inuw Apa Thangnang vokhehkho Aafhuw Jesu Khrista inche tungsiih re idaechu ympeeh ynsuwhrasii.

⁸Abasenniina, nenuw vakhae nenthachachu laaruw paam aangkheng mee ing aanseer khaenache, Aafhuw Jesu Khrista ajaarna ka Thangnang amachu kamanpahsahnah.

⁹Kabarung-riir aangkheng iruwhdeh ing asapa Jesu isa chongchu tong ingka anong katu Thangnang inche kariir i ichumva ichiichu saarkhiina.

¹⁰Apha vakhaena kathamsah nache, nenuw kaansiisachuw ichiichu Thangnang ing amanghuwsa. Thangnang ing amandenna nong katu ynsuwh nave, apha vokhehna nenuwchu ivaveernii khaena kathamsahnah.

¹¹Akhaechuve nenlaetha acheepnii khaena, ki ing nenuwchu laetha kikthuur ipeehnii khaenache nenuw thoh ki yntuwh manuwka kachiisahva.

¹²Amachuve inuw yngkheh re yngkheh ynthacha inche, nenuwkho kikho ymbomsah ymphanii khaenava.

¹³Kauw kanae ae, ki ing reentaang mee ae kaarna laetha kakhuumcheh vaange, neningnakho ikhuum kachehnii inche neningna ithengnii khaena kaniihsah birva. Changvakonchu eekhaam yngkheh omka ithengcheh mahping ichiichu imanghuwpeeh tanuwka kachiinah.

¹⁴Ki ing Grik ae ningnakho, reentaang jaat ae nakho, ising ae vokhehkho ipang ae ningnakho enlerchu katuurva.

¹⁵Amatah nache ki ing isa chongchu Rom na ong neningnakho tongpak ningka kachiisahva.

¹⁶Ki Khrista isa chong khaena kaning manjakmah ing, yngkhaena ynchii imbe atakchu athacha mee vakhae ing manlaenpeeh iphanii Thangnang ruwreng omna, amaensana Jehudi ae vokhehkho Grik mee ae khaena khomba.

¹⁷Akhaechuve isa chong inge ynsaangkhe Thangnang ing mee aechu ichum ynthiing amanphapae ichiichu amandangniisa. Amachuve abasempeh raennii ing achinii ipha ing thacha ajaarna chenva. Ynthiing thiimziih ing ariirsa, “Thacha mee inche ichum ynthiing jaarna iringchu phavaata.”

¹⁸Laaruw mee aeng entu enri isamah tangmah isii icher inche ichumchu enthing khaenache, Thang-nang barungsiichu thangbaen tanii amandangpa.

¹⁹Havi Thangnang akhaena ynghuw enchehchu enuw embarungriir sungna amandangpeeh ae khaenava, yngkhaena ynchii imbe Thangnang ing eningna amandangpa.

²⁰Laaruw paam abasempehna basenka Thangnang tanii imu ynchehmah, Thangnang ningtanii ichen naemah ruwreng vokhehkho Aafhuw Thang-nang ynsuwhchu, ynseem vasah atu ari vakhae inge isajaeh ing ymmuva; amatah nache enuwchu ikuhpeehpham suwhmahsa.

²¹Akhaechuve enuw ing Thangnang chu manghuwkhang ae nare, Thangnang va ichii ing manpah mahsae, amanche Aafhuw ing yntupeeh ynripeeh chukho manghuw mahsae, changvakonchu enuw ing emandenchu ikaniimah ynsuwhsa, vokhehkho enuw empangnii barungriirchu manthimsa.

²²Enuw entaksah ing isingpung ta aeka pangsae.

²³Ithii omah Thangnang rumva enchii changdenna, enuw ing maangvachii mee ruthaksii, vaati vaata, shava ae vokhehkho baruwr khaerae enrumpa.

²⁴Chukhaenache enuw ing emanden yntirsuwh nong vokhehkho ningjaknii ichuwhmah tangmah nong itu mee engaansuwhnii khaenache Thangnang ing enuwchu abathenpae.

²⁵Enuw ing Thangnang lam ichumchu ichummah ting manguur aeka, Eeseem Aafhuw rumva enchii changdenna aruwh thangsii peeh ynseemchu enrumpa vokhehkho rukuumkho entupa; Eeseem Aafhuw chuve ichen naemah ing manpah vaanchiiva! Amen.

²⁶Havi khaene Thangnang ing enuwchu ningjaknii yntirsuwh engadik tingche abathenpae. Amana rupanuw rap ae ingkho laaruw mee nunu thoh yntinmah ing entupa.

²⁷Amanache havi vaange pasar ae ingkho anunu ing rupanuw thoh ruw ingkichu bathen aeka, enuw ing engadik nache yngkheh ing yngkheh taklina mi vaang ichuwng inche pasar nireer ingkho yntirsuwh ichohnii nong entupa, amanche enuw ing ynraar nong entu aanla phava enchiichu enuw entaksah ing aphasahpae.

²⁸Enuw ing Thangnang chu manghuw aeka enrumah vaangche, ichuwhmah nongchu itunii khaenache, Thangnang ing enuwchu arumah barungriir tingche abathenpae.

²⁹Ichum ynthiingmah, isamah, ym-phaam, vokhehkho ynjiim, hava vakhae inge bariimsae; enuw kallak ing, miktheh, ynnahnii, mee amanchae, vokhehkho mee abatir inche sipsae.

³⁰Enuw ing mee iriirsahna vokheh-kho yngkheh re yngkheh isamah ing ichong ae; Thangnang abatir ae, ningjak amanghuwmah ae, ynding, iruungchichuh, isamah nong abasuw, ampa amnuw chongriir amanjiimah,

³¹abarungriir ynthinmah, chongreep abakhii, ningsiih omah, mee akuur-siimah, ningchuwh omah,

³²hava mee ae inge hangchii nong ae i nunu ing entu aenche ithiipham suwhna ichii Thangnang vajeerchu manghuw ae sana, amachurap itujaeh mahka amachu entu diindiin ae thohkho chongkheh enchihakpa.